გუშინ, ახლო წარსულში ცნობილმა რუსმა მწვრთნელმა და მოთამაშე ვალერი გაზაევმა ხვიჩა კვარაცხელიას შესახებ გამოცემასთან „Sport24“ ისაუბრა და ქართველი ანდრეი შევჩენკოს შეადარა.
„ხვიჩა უბადლოდ ნიჭიერი ფეხბურთელია და „ნაპოლიში“ ასპარეზობა ჩინებულად დაიწყო. იტალიაში მას შესანიშნავი პრესა აქვს და ის თაყვანისმცემლების ახალი კერპი ხდება. კვარაცხელია ავლენს ინდივიდუალური უნარების მაღალ დონეს. ყველაზე მნიშვნელოვანი ისაა, რომ ეს ყველაფერი მთელი კარიერის განმავლობაში შეინარჩუნოს, როგორც ამას ანდრეი შევჩენკო აკეთებდა.
ეს ის დონეა, რასაც მან უნდა დაუმიზნოს, რადგან ქართველს დიდი მომავალი აქვს. ყველა ნიჭს შრომა სჭირდება. ამიტომ მან უნდა გამოიჩინოს განსაკუთრებული ძალისხმევა, რათა ევროპულ და მსოფლიო ფეხბურთში თავი დაიმკვიდროს და ვარსკვლავი გახდეს.
შეიძლება ხვიჩა შევჩენკოზე უკეთესი იყოს? უკრაინელმა „ოქროს ბურთი“ მოიპოვა. თუ კვარაცხელიაც ამას შეძლებს, შემდეგ უკვე საუბარი შეიძლება“,– განაცხადა ვალერი გაზაევმა.
როგორც ცნობილია, ჩემპიონთა ლიგის მერვედფინალში გერმანული „აინტრახტი“ „ნაპოლის“ დაუპირისპირდება. წილისყრის შედეგზე კომენტარი ფრანკფურტული კლუბის სპორტულმა დირექტორმა მარკუს კრიოშემ გააკეთა.
„ჩვენ ვიცოდით, რომ 1/8-ფინალში შესანიშნავ გუნდს შევხვდებოდით. „ნაპოლი“ მართლაც კარგი კლუბია, რომელიც ჩინებულ სეზონს ატარებს. ეს რთული მეტოქეა, მაგრამ მსგავსი რამ მოსალოდნელი იყო.
არ ვფიქრობ, რომ სერიოზულად არ აღგვიქვამენ და ისიც კი არ მგონია, ჩვენთან შეხვედრით ძალიან კმაყოფილი იყვნენ“.
პირველი მატჩი 14 თებერვალს ფრანკფურტში გაიმართება, ხოლო საპასუხო – 7 მარტს ნეაპოლში.
უნგრული კლუბი „ფეჰერვარის“ ოფიციალური გვერდის ინფორმაციით ცნობილი გახდა რომ საქართველოს ეროვნული გუნდის შემტევი ბუდუ ზივზივაძე ტრავმირებულია და მალე გაირკვევა, ოპერაცია თუ დასჭირდება.
მიმდინარე წლის 11 ოქტომბერს „ფეჰერვარმა““ქართველი თავდამსხმელი მეორე გუნდში გადაიყვანა. სწორედ ამ მეორე გუნდში ითამაშა საქართველოს ნაკრების მოთამაშემ რეგიონული ლიგის მატჩი „ნადიკანიზასთან“, რომელშიც 0:5 დამარცხდა, ზივზივაძე კი 23-ე წუთზე დაშავდა (მხარი დაიზიანა) და შესაცვლელი გახდა.
„ჩვენმა ქართველმა თავდამსხმელმა მხრის ტრავმა მიიღო და თამაში ვეღარ გააგრძელა, რადგან სასწრაფოდ დასჭირდა საავადმყოფოში გადაყვანა. გამოკვლევების შედეგები უახლოეს დღეებში გახდება ცნობილი და გადაწყდება, იქნება თუ არა საჭირო ოპერაცია“, – ამ სახის განცხადება გაავრცელა კლუბის პრესსამსახურმა.
გუშინ ფიფას ყოფილმა პრეზიდენტმა ზეპ ბლატერმა ფეხბურთში მსოფლიოს 2022 წლის ჩემპიონატის კატარში გამართვის გადაწყვეტილებაზე ისაუბრა. ბლატერის თქმით, თავის დროზე არჩევანი აშშ–ის სასარგებლოდ უნდა გაკეთებულიყო, მაგრამ უეფას მაშინდელმა პრეზიდენტმა მიშელ პლატინიმ თავისი ხმა, საფრანგეთის პრეზიდენტის ნიკოლა სარკოზის თხოვნით, კატარს მიაკუთვნა. მალევე ცნობილი გახდა, რომ კატარმა საფრანგეთიდან გამანადგურებლები შეიძინა, რაშიც რამდენიმე ათეული მილიარდი დოლარი გადაიხადა…
„კატარი ძალიან პატარა ქვეყანაა, რომლისთვისაც ფეხბურთი და მსოფლიოს ჩემპიონატი მეტისმეტად მასშტაბური მოვლენაა. კატარის არჩევა შეცდომა იყო. აღმასკომში მოვლიპარაკეთ, რომ 2018 წლის მუნდიალს რუსეთი უმასპინძლებდა, 2022-ისას კი – აშშ. იქნებოდა ერთგვარი მშვიდობის ჟესტი, თუკი დიდი ხნის პოლიტიკური მოწინააღმდეგეები რიგ–რიგობით გაუკეთებდნენ ორგანიზებას მუნდიალებს.
მაგრამ ფიფას კონგრესის წინ პლატინიმ დამირეკა და მითხრა, რომ ჩვენი გეგმა ვერ განხორციელდებოდა. მიშელი პრეზიდენტ სარკოზის სასახლეში იყო მიწვეული, რომელმაც მანამდე კატარის პრინცი მიიღო. სარკოზიმ სთხოვა პლატინის: “იქნებ რამე გააკეთოთ კატარისთვის, როდესაც მსოფლიოს ჩემპიონატის მასპინძელს აირჩევენ“.
პლატინიმ მკითხა, რას გავაკეთებდი თავად, თუკი ჩემი პრეზიდენტი რაღაცას მთხოვდა. ვუპასუხე, რომ ამაზე არასდროს მიფიქრია, რადგან შვეიცარიას პრეზიდენტი არ ჰყავს. საბოლოოდ ასეც გამოვიდა. პლატინის ხმების წყალობით, მუნდიალი კატარს ერგო და არა – აშშ–ს. შესაძლოა, საქმე ფულს ეხებოდა. ნახევარი წლის შემდეგ კატარმა საფრანგეთისგან 14,6 მილიარდი დოლარის ღირებულების გამანადგურებლები იყიდა“, – გამოაქვეყნა ბლატერის სიტყვები გამოცემამ „Voetbal International“.
გუშინ გამოცემამ „Libertad Digital“ საინტერესო ინფორმაცია გაავრცელა, – მადრიდის „რეალის“ ყოფილი მთავარი მწვრთნელი ზინედინ ზიდანი მსოფლიოს 2022 წლის ჩემპიონატის შემდეგ საფრანგეთის ნაკრების დამრიგებელი გახდება.
ზიდანს აქვს უკვე შეთანხმება საფრანგეთის ფეხბურთის ფედერაციასთან იმაზე, რომ ის დიდიე დეშამს შეცვლის მსოფლიოს ჩემპიონატის დასრულების შემდეგ.
დიდიე დეშამის მოქმედი კონტრაქტი საფრანგეთის ფეხბურთის ფედერაციასთან 2022 წლის დეკემბრამდეა ძალაში. ზიდანი ნებისმიერ შემთხვევაში ჩაუდგება სათავეში ნაკრებს, რა შედეგიც არ უნდა აჩვენოს მან მსოფლიოს ჩემპიონატზე.
ავტორი
