გუშინ 21 წლის ხვიჩა კვარაცხელიამ „ნაპოლის“ შემადგენლობაში პირველი ოფიციალური მატჩი ჩაატარა. ნეაპოლური გუნდი სტუმრად „ვერონას“ დაუპირისპირდა. 68 წუთის განმავლობაში, იმ დროში, რაც მას ლუჩანო სპალეტიმ გამოუყო ხვიჩა მოედანზე საუკეთესო იყო – მან გოლი და საგოლე გადაცემა მიითვალა.
ხვიჩა პირველად მე-18 წუთზე დაემუქრა „ვერონას“ კარს, ბურთი ოდნავ აცდა მიზანს. 29-ე წუთზე მასპინძელთა კუთხურს კევინ ლაზანიას გოლი მოჰყვა, რასაც ხვიჩამ კარში ზუსტი დარტყმით უპასუხა, ლორენცო მონტიპომ ბურთი კუთხურზე მოიგერია.
37-ე წუთზე ირვინგ ლოსანომ მარჯვნიდან ჩააწოდა, ოსიმენი ბურთს ვერ შეწვდა, თუმცა ხვიჩამ ახლო მანძილიდან თავით დაარტყა და პირველი გოლი იტალიის ჩემპიონატში…
პირველი ტაიმის მესამე დამატებულ წუთზე ხვიჩას აქტიურობის შემდეგ, ნიგერიელმა თავდამსხმელმა ოსიმენმა ლუჩანო სპალეტის გუნდი დააწინაურა – 1:2.
მეორე ტაიმი „ვერონას“ გოლით დაიწყო და თომა ანრიმ ანგარიში გაათანაბრა – 2:2. 55-ე წუთზე „ნაპოლის“ სწრაფი კონტრშეტევა ხვიჩას პასით და პიოტრ ჟელინსკის გოლი – 2:3. 65-ე წუთზე ლობოტკამ „ნაპოლის“ მე-4 გოლი გაიტანა. 68-ე წუთზე სპალეტიმ პირველი ცვლილება განახორციელა, ხვიჩას ნაცვლად მოედანზე ელიფ ელმასი შევიდა. სტუმართა მეხუთე გოლი შეცვლაზე შესულმა მატეო პოლიტანომ გაიტანა. საბოლოოდ „ნაპოლიმ“ „სერია – A” დამაჯერებელი გამარჯვებით დაიწყო – 5:2.
ესპანეთის „ლა ლიგის“ პირველობის საწყის ტურში გიორგი მამარდაშვილის „ვალენსიამ“ კლუბ „ჟირონას“ უმასპინძლა და დაამარცხა – 1:0.
რასაკვირველია გიორგი მამარდაშვილი „ვალენსიას“ კარს იცავდა. მასპინძლები უპირატესობას ფლობდნენ, თუმცა მატჩი სანახაობრივი არ გამოდგა და სახიფათო მომენტები იშვიათად იქმნებოდა. პირველი ტაიმის დასასრულს საჯარიმოდან დარტყმული ბურთი ცოცხალ კედელში „ჟირონას“ მცველ ვალერის ხელზე მოხვდა და „ვალენსია“ თერთმეტმეტრიანი დარტყმით სოლერმა დააწინაურა.
52-ე წუთზე უხეშობისთვის მსაჯმა წითელი ბარათით „ვალენსიას“ მცველი ერაი კომერტი გააძევა. მიუხედავად ამისა, სტუმრებმა ბევრი მომენტი ვერ შექმნეს, მხოლოდ ერთხელ დაარტყა შორიდან ძლიერად ალეიშ ვიდალმა, რომელიც ქართველმა მოიგერია.
21 აგვისტოს „ვალენსია“ სტუმრად ბილბაოს „ატლეტიკს“ დაუპირისპირდება.
შოთა არველაძე კი ინგლისის „ჩემპიონშიპის“ მესამე ტურის საუკეთესო მწვრთნელად დასახელდა. შოთას გუნდმა „ნორვიჩი“ 2:1 დაამარცხა.
საქართველოს ნაკრებისა და ფრანგული „მეცის“ თავდამსხმელი გიორგი მიქაუტაძე შესანიშნავ სპორტულ ფორმაშია. მიქაუტაძე შედეგიანი მოქმედებით „ლიგა 2“-ში ჩატარებულ სამივე შეხვედრაში გამოირჩა (2 გოლი და 1 საგოლე პასი). ბოლო ტურში გიორგიმ „ვალანსიენს“ გაუტანა, მისმა გუნდმა კი ანგარიშით 2:0 მოიგო.
თამაშის შემდეგ „მეცის“ ქართველმა თავდამსხმელმა კომენტარი გააკეთა:
„მიუხედავად იმისა, რომ მეორე ტაიმში „ვალანსიენმა“ წნეხში მოგვაქცია, შევძელით გამკლავება და სასურველი შედეგის მიღწევა. მეორე გოლის გატანა უფრო ადრეც შეგვეძლო. მადლობას ვუხდი „მეცის“ გულშემატკივრებს ოვაციებისთვის და იმედი მაქვს, მთელი სეზონი ასე გაგრძელდება“.
„მანჩესტერ იუნაიტედის“ ვარსკვლავი კრიშტიანო რონალდო შეიძლება გუნდის გარეშე დარჩეს. პორტუგალიელს ზაფხულში კლუბის გამოცვლა სურდა, თუმცა მისმა აგენტმა ჟორჟე მენდეშმა ახალი სამსახური ვერ მოუძებნა და მას კვლავ ქალაქ მანჩესტერში დარჩენა მოუწია.
პრემიერ ლიგის ახალი სეზონი კი „იუნაიტედისათვის“ და რონალდოსთვის საშინლად დაიწყო. პირველ ტურში „ბრაიტონთან“ საშინაო მატჩში გუნდის მწვრთნელმა ერიკ ტენ ჰაგმა კრიშტიანო სათადარიგოთა შორის დატოვა, რადგან მას შეკრების დაწყებიდანვე არ გაუვლია გუნდთან წვრთნა და თანაც, ერთ-ერთი ამხანაგური მატჩის დასრულებამდე მოედანი დატოვა.
ტენ ჰაგს რონალდო მე-2 ტურში გასვლაზე “ბრენტფორდთან” დასჭირდა, თუმცა ვეტერანმა ვარსკვლავმა ვერც იქ ივარგა და ვერც რაიმე სახეირო გააკეთა. „მანჩესტერი“ 0:4 დამარცხდა, რონალდომ კი შეხვედრის შემდეგ ტენ ჰაგს გვერდი აუარა, ზედაც არ შეხედა და ხელიც არ ჩამოართვა.
გუშინ ბრიტანულმა გამოცემამ „Sky Sports“ გაავრცელა ინფორმაცია, რომ კლუბის უფროსობას პორტუგალიელის მსგავსი საქციელი ძალიან არ მოსწონს. ისინი მოვლენების განვითარებას დააკვირდებიან. თუ რონალდომ ცუდი ასპარეზობა და ცუდად მოქცევა გააგრძელა, „მანჩესტერ იუნაიტედში“ მასთან კონტრაქტის გაწყვეტაზე მუშაობას დაიწყებენ. ასეთ შემთხვევაში რონალდო უკლუბოდ დარჩება. ბოლო ცნობით მისი დამატება „მილანსა“ და „ინტერს“ შესთავაზეს, თუმცა ამ გუნდებმა უარი განაცხადეს.
ავტორი
