საქართველოს ნაკრების მატჩების შემდეგ ხვიჩა კვარაცხელია „ნაპოლიში“ უკვე დაბრუნდა. ქართველმა ფეხბურთელმა გუნდის ახალი მწვრთნელი ვალტერ მაძარი გაიცნო, რომლის ხელმძღვანელობით პირველად ივარჯიშა.
კვარას გარდა, ნეაპოლელებს სანაკრებო შეკრებიდან იენს კაიუსტე და ლეო ოსტიგორი დაუბრუნდნენ, ბაზაზე ასევე ელოდებიან ჯოვანი დი ლორენცოს.
ვიქტორ ოსიმენი ჯერჯერობით, ინდივიდუალურად ვარჯიშობს და იქნება თუ არა, „ატალანტასთან“ მატჩისთვის ხელმისაწვდომი, უახლოეს დღეებში გაირკვევა.
ამასობაში, გუშინ, „სტადიო მარადონასთან“ ნეაპოლელმა გულშემატკივრებმა ბანერი განათავსეს, რომლის მესიჯი ნათელია: ფეხბურთელებმა უნდა გააცნობიერონ, რომ სკუდეტოს მოგებით ისინი ხელშეუხებლები არ არიან:
„მწვრთნელმა გადაიხადა, მაგრამ ყველა ფეხბურთელისთვის გასაგები უნდა იყოს: სკუდეტოს მოგება დაუსჯელობას არ განიჭებთ!“
„ნაპოლი“ 25 ნოემბერს, სტუმრად ბერგამოს „ატალანტას“ დაუპირისპირდება.
გუშინ, ფაბიო კანავაროს ყოფილმა აგენტმა ენრიკო ფედელემ „ნაპოლისა“ და ხვიჩა კვარაცხელიას შესახებ ისაუბრა.
„ნეაპოლში დიდი ნაკლი გვაქვს: გვიყვარს ინდივიდუალური წარმოდგენები. ორი კვირის წინ ვსაუბრობდით ნამდვილი კვარაცხელიას დაბრუნებაზე, რომელმაც შემდეგ ისევ ჩააგდო თამაში. ჯაკომო რასპადორი გოლს გაიტანს თუ არა, მაშინვე ვამბობთ, რომ ნამდვილი ფორვარდია. სინამდვილეში კი, ფეხბურთელები გრძელვადიან პერსპექტივაში უნდა შევაფასოთ.
კვარა ხშირად ცდილობს დრიბლინგს, მაგრამ მის გარეშე მოედანზე ნიჭი არ ჩანს, არავინ არის მის გარდა, ვინც ერთი-ერთზე ითამაშებს. ხვიჩა კლაუდიო სალას არ ჰგავს: სალა ცოტა გოლს იტანდა, კვარა ასეთი არ არის, ის სალაზე და ბრუნო კონტიზე ტექნიკურია და გოლებითაც უფრო შედეგიანია, თუნდაც გუნდში ნაკლები წვლილი შეიტანოს“,- თქვა ფედელემ.
გუშინ, გიორგი მიქაუტაძის შესახებ, „Ajax Showtime“ ფრანგული „მეცის“ სპორტულ დირექტორს, პიერ დრეოსის ესაუბრა.
„მიქაუტაძე განსაკუთრებული ბიჭი და განსაკუთრებული მოთამაშეა. ის არ არის მაღალი და სწრაფი, მაგრამ ნებისმიერ დროს შეუძლია გოლის გატანა. ის საჯარიმოს ფეხბურთელია. მას აქვს იმის უნარი, რომ მოძებნოს გამოსავალი ისეთ სიტუაციაში, სადაც ეს, თითქოს, შეუძლებელია. მისი საუკეთესო პოზიცია თავდასხმაა. როგორც ფორვარდს, მას აქვს კარგი დრიბლინგი და ბურთთან ერთად ძალიან სწრაფია, ბურთის გარეშე კი სისწრაფით არ გამოირჩევა.
თავდასხმის პოზიციაზე ის უფრო მაღალ დონეზე ითამაშებს. დარწმუნებული ვარ, რომ მას სეზონში 20 გოლზე მეტის გატანა შეუძლია. გიჟი არ ვარ, მას ეს მართლა შეუძლია. თუ მის პოზიციაზე ათამაშებ, მიქაუტაძეს აქვს იმის უნარი, რომ გახდეს ძალიან კარგი და განსაკუთრებული ფორვარდი. ფლანგზე და თავდამსხმელის უკან თამაშზე თავს ვერ დავდებ.
წინა სატრანსფერო ფანჯრის დროს აშკარა იყო, რომ ის გუნდს დატოვებდა, მაგრამ სეზონის დასაწყისში „მეცში“ სამი თამაში მაინც ჩაატარა. მან ორი გოლი გაიტანა და საგოლე გადაცემაც შეასრულა. ბევრი ფეხბურთელი ასეთ სიტუაციაში თამაშს არ მოინდომებდა, რადგან სახიფათო იქნებოდა. მიქაუტაძემ კი ვარჯიში და თამაში გააგრძელა, რაც მის პიროვნებას აღწერს. მას ფანტასტიკური სული და კარგი მენტალიტეტი აქვს.
ბევრ კლუბს სურდა მიქაუტაძის გაფორმება. კლუბებს იტალიიდან და ინგლისიდან, ასევე ისეთ გუნდებს საფრანგეთიდან, როგორებიც „ლიონი“ და „რენი“ არიან. გიორგიმ კი მითხრა, რომ ინგლისურ კლუბს ესაუბრა, მაგრამ იქ სათამაშოდ მზად არ იყო. მან „აიაქსი“ აირჩია, რადგან ეს იყო კარგი კლუბი კარგი ფილოსოფიით. ის ძალიან ჭკვიანია. დამიჯერეთ, „აიაქსი“ მას რამდენიმე წელიწადში ძალიან ძვირად გაყიდის. ამაზე არ იდარდოთ.
ეს არის დიდი კლუბი, რომელსაც დიდი ისტორია აქვს. მიქაუტაძისთვის ეს წინგადადგმული ნაბიჯია. „აიაქსი“ მსოფლიოში ერთ-ერთი საუკეთესო კლუბია და იქ ყოველთვის ნიჭიერი ფეხბურთელები თამაშობენ. კლუბი კარგ ფილოსოფიაზე არის აწყობილი. მჯერა, რომ ეს მიქაუტაძის კარიერისთვის სწორი ნაბიჯია“, – განაცხადა „მეცის“ სპორტულმა დირექტორმა.
ავტორი
