„გურია ნიუსის“ მიერ მოპოვებული ინფორმაციით, ადგილობრივი თვითმმართველობის არჩევნებზე, ოზურგეთის მუნიციპალიტეტის მერობის კანდიდატად „ქართული ოცნება“ ავთანდილ თალაკვაძეს წარადგენს.
ავთანდილ თალაკვაძე საქართველოს პარლამენტის წევრის არჩილ თალაკვაძის ძმაა და ის საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, სსიპ-საგანგებო სიტუაციების კოორდინაციისა და გადაუდებელი დახმარების ცენტრის უფროსად მუშაობდა.
როგორც ჩვენი წყარო ამბობს, „ქართული ოცნების“ ოზურგეთის რაიონულ ორგანიზაციაში ერთობლივად შეჯერებული ჰქონდათ, მერობის კანდიდატად წარედგინათ ოზურგეთის მუნიციპალიტეტის საკრებულოს თავმჯდომარის მოადგილე, გიორგი ღორჯუმელიძე. თუმცა, ჩვენივე წყაროს ცნობით, „ქართულმა ოცნებამ“ „ქვემოდან“ შეთავაზებული კანდიდატურა, „ზემოდან“, თავისივე კანდიდატურით ჩაანაცვლა.
შეეფერება თუ არა ეს ყველაფერი სინამდვილეს, სახელდება თუ არა ავთანდილ თალაკვაძის კანდიდატურა, საკრებულოს თავმჯდომარე დავით დარჩია ამბობს, რომ რაიონული ორგანიზაცია არ იღებს გადაწყვეტილებებს. იმოქმედებენ ისე, როგორც ცენტრალური სტრუქტურები ურჩევენ, როგორ გადაწყვეტილებასაც „ქართული ოცნება“ მიიღებს.
_ კი, არის დასახელებული ავთანდილ თალაკვაძის კანდიდატურა. ჩვენ ადფილზე არაფერს ვწყვეტთ, როგორც გადაწყვეტს ცენტრალური სტრუქტურები, პარტია „ქართული ოცნება“ ვისაც დაასახელებს, ეს არის ჩვენთვის მისაღები.
_ ბატონო დავით, ოზურგეთში, ადგილობრივ არჩევნებზე, მერობის არაერთ კანდიდატზეა საუბარი სხვადასხვა პარტიიდან. ასევე არაოფიციალურად ცნობილია, რომ მოქმედი მერი კონსტანტინე შარაშენიძე დამოუკიდებლად კვლავ იყრის კენჭს. როგორია თქვენი აზრი?
_ „ქართული ოცნება“ არავის ზღუდავს, იყაროს კენჭი არჩევნებზე. არჩევნებზე კი არა, ზოგადად, ეს ხელისუფლება არავის ზღუდავს, მოსინჯოს საკუთარი შესაძლებლობები იქ, სადაც სურს, – გვითხრა დავით დარჩიამ.
ჩვენ არაერთხელ ვცადეთ, დავკავშირებოდით ავთანდილ თალაკვაძეს, მაგრამ, ჯერჯერობით, ის არ პასუხობს ჩვენს სატელეფონო ზარს.
„გურია ნიუსი“ ეცდება, მალე მოიპოვოს და შემოგთავაზოთ ავთანდილ თალაკვაძის კომენტარი.
ავტორი: მარინა ჩიხლაძე
