იმ ლანჩხუთელ მედიკოსთა შორის, ვინც COVID-19-ის საწინააღმდეგო ვაქცინაცია გაიკეთა, „მედალფას“ კლინიკის უროლოგი ოთო ქერქაძეცაა. თუმცა, მის მიერ ფეისბუქზე გამოქვეყნებული პოსტიდან ირკვევა, რომ ვაქცინაციის გაკეთებიდან რამდენიმე წუთში მას პირის ღრუს სიმშრალე, ენის დაბუჟება და შემცივნება დაეწყო, მდგომარეობა გონების დაკარგვამდე მიდიოდა.
„ანამნეზში ვაქცინისადმი საყურადღებო დაავადებები მაქვს მხოლოდ ალერგიული რინიტი, არ ვიღებ არანაირ დრაგებს, ვარ ზომიერად სიგარეტის მწეველი. წლების განმავლობაში ჩატარებული მაქვს ყველა სახის ვაქცინაცია( ბოლოს, 2020 წლის ოქტომბერში გავიკეთე სეზონური გრიპის ვაქცინა) ყველა შემთხევამ ჩაიარა ყოველნაირი გართულებების გარეშე. ჰემოდინამიკური პარამეტრები ყოველთვის სტაბილური მაქვს T/A 100/70- 110/70 მოცემული ციფრების დიაპაზონში ვატარებ. ასევე რამდენიმე სიტყვით მინდა შევეხო ვაქცინაციის დროს შექმნილ ქაოტურ საორგანიზაციო საკითხებს, როდესაც მთელი წლის განმავლობაში გაფაციცებული ელოდები ვაქცინის შემოსვლას, მთელი ქვეყნის საინფორმაციო მოწოდებები აგებულია ვაქცინაციის ლოკალური ადგილების გამართულობაზე. აკეთებ ელექტრონული Booking-ის სისტემას, სადაც ჩემისთანა მოკვდავები გადიან რეგისტრაციას და აკეთებენ ჯავშანს, ამ დროს ვაქცინაციაზე მისულ ადამიანებს გვხვდება ვიღაც ხეპრე და გვეუბნება რომ დღეს ვაქცინას ვეღარ მივიღებთ, რადგან ჯამში 10 ადამიანი თუ არ მოგროვდა ისე ფლაკონებს ვერ გახსნიან, რიგში მყოფი ადამიანები კი დაავადებათა კონტროლის ცენტრიდან ვიღებთ მესიჯს, რომ დათქმულ დროს თუ კაბინეტში არ გამოვცხადებოდით ჯავშანი გაგვიუქმდებოდა. ვაქცინაციაზე ლოკალურად პასუხისმგებელი პირის პოზიცია იყო რომ დაავადებათა კონტროლის ცენტრი ურევდა და მათი ბრალეულობა არ იკვეთებოდა. მოკლედ, რიგში მყოფი ადამიანების დაჟინებული მოთხოვნით მივიღეთ სასურველი და ასე ნანატრი ვაქცინა. ძალიან გამაკვირვა ვაქცინაციაზე მომუშავე ზოგერთი ადამიანის ნასროლმა რეპლიკამ თურმე “შხამს” ვინ წაგვართმევს.
ვაქცინის გაკეთების შემდეგ გადავინაცვლე დაკვირვების ოთახში , სადაც ნახევარი საათი უნდა ვყოფილიყავი მეთვალყურეობის ქვეშ. ამ პერიოდის განმავლობაში მესენჯერში ვწერდი მეგობარს და ველოდებოდი დროის გასვლას. ვაქცინაციიდან 10-15 წუთის შემდეგ ორივე ხელის მტევანი გამიწითლდა , ენა დამიბუჟდა, დამეწყო შემცივნების ეპიზოდები, ასევე მივდიოდი გონების დაკარგვამდე, მქონდა პირის ძლიერი სიმშრალე, მომათავსეს მიმღებ განყოფილებაში სადაც ჩამიტარდა ჰემოდინამიკური პარამეტრების მონიტორინგი T/A 140/80, p-102, spo2-98, გამიკეთდა დიმედროლი და სუპრასტინი 1ამპ. ი/ვ. ჩივილებიდან მიგრძელდებოდა მხოლოდ პირის სიმშრალე, დინამიკაში თავს ვგრძნობდი უკეთესად. ვაქცინაციიდან დახლებით ერთ საათში ჩივილები აღარ მქონდა, ვაპირებდი კლინიკიდან წასვლას, რის გამოც საწოლზე წამოვჯექი, დახლებით 5 წუთში ისევ დამეწყო ზემოთ აღნიშნული სიმპტომატიკა, აღსანიშნავია რომ დროის მცირე მონაკვეთში წნევის პარამეტრები T/A-130/80-200/100 დიაპაზონში რამოდენიმეჯერ შეიცვალა. სასწრაფოდ მომცეს ანტიჰიპერტენზიული პრეპარატები, ასევე, გამიკეთეს ი/ვ 1ამპ დიაზეპამი. ჩივილები მიგრძელდებოდა და მოვითხოვე ბათუმის რეფერალურ კლინიკაში გადაყვანა. ანტიჰიპერტენზიული პრეპარატის მიღებიდან 1 საათის შემდეგ ჩემი ჰემოდინამიკური პარამეტრები საშუალოდ 150/70 მდე დასტაბილურდა. ვაქცინაციიდან 5 სათში დამეწყო ქვემო კიდურების ძლიერი ტკივილი, ყელის ტკივილი“, _ განმარტავს ლანჩხუთელი ექიმი და იქვე დასძენს, რომ „დღეის მდგომარეობით, თავს ვგრძნობ ძალიან კარგად, საკუთარ არჩევანს ვაქცინის გაკეთებასთან დაკავშირებით არ შევცვლიდი. გართულებები ინდივიდუალურია. აუცილებლად გავიკეთებ ვაქცინის მეორე დოზას!!“
იგი მიიჩნევს, რომ ასტრაზენეკას ვაქცინის გაკეთება არ არის რეკომენდირებული 65 წელს ზემოთ პაციენტებისთვის: „ჩვენ რეკომენდაციის დარღვევით დავიწყეთ და საჯაროდ ასაკოვანი ადამიანი ავცერით, პაატა იმნაძეს ვგულისხმობ. მაშინ, როცა ჩვენი ვარდის კოკორივით ჯანდაცვის მინისტრი აუცრელი გვყავს და ყველანაირი ხერხით ცდილობს ვაქცინიდან თავის დაძვრენას“.
