გუშინდელი დღის მთავარი სპორტული თემა შოთა არველაძის მიერ ლევან კობიაშვილის მიმართ გაკეთებული განცხადება აღმოჩნდა.
წინა კვირას საქართველოს ეროვნული გუნდის ბოლოდროინდელი წარუმატებელი ასპარეზობა საფეხბურთო სფეროში მოღვაწე არაერთმა პიროვნებამ გააკრიტიკა, მათ შორის, ახლო წარსულში გამოჩენილმა ქართველმა მოთამაშე შოთა არველაძემ. მოგვიანებით ნაკრების თამაში ფეხბურთის ფედერაციის თავკაცმა ლევან კობიაშვილმაც შეაფასა და საკუთარ გამოსვლაში “განსაკუთრებით“ შოთა არველაძესაც შეეხო:
“დამარცხდება ნაკრები და ჩამწკრივდებიან, კომენტარებს აკეთებენ… აქ არ იყავით წლების განმავლობაში? გეკეთებინა, თუ რაღაც შეგეძლო… ერთი მოედანი არ გაგიკეთებია, დადიხარ და რაღაცებს პროფესორობ. პრობლემა კი არ მაქვს, უნდა აკრიტიკო, მაგრამ შემოგვთავაზე, თუ შეგიძლია, მოდი და იმუშავე… დგახარ, რაღაცებს პროფესორობ… შეკრება, ანტალია… თუ გინდა, გეუბნებიან, მოდი და იმუშავე. ხან რა მიზეზებს ედებიან, ხან რას. მიხედე რა შენს საქმეს”.
გუშინ შოთა არველაძემ ლევან კობიაშვილს შემდეგი განცხადებით უპასუხა:
“მიხედე რა შენ საქმეს – რას პროფესორობ“ _ რაც შეეხება ამ ფრაზას, მინიმუმ, არ ვიმსახურებ ასეთ პასუხს და დამოკიდებულებას, თუმცა, ამაზე უარესებიც ამიტანია და მომითმენია. ეროვნული ნაკრები კი ის ადგილია, სადაც 15 წელი გავატარე, სადაც ყველაზე მეტი გოლი გავიტანე და არავისზე ნაკლებ გულშემატკივრად არ ვთვლი თავს – ეს გუნდი ყოველთვის იქნება ჩემი საქმე, მოსწონს ვინმეს ეს თუ არა“.
რასაკვირველია, ეს “კინკილაობა“ ქართული ფეხბურთის განვითარების საქმეს არ წაადგება. ფაქტია რომ ეროვნული ფეხბურთი უკან-უკან იხევს და მდგომარეობის გამოსწორების იმედი, ჯერჯერობით, არ ჩანს. ამ დროს ფეხბურთის სპეციალისტების ჯანსაღი კრიტიკის მოსმენის ნაცვლად, ფედერაციის თავკაცი “არასასურველი პიროვნებების“ წინააღმდეგ ბრძოლაში ებმება.
ქართული ფეხბურთის ამჟამინდელი პრობლემების განხილვას, ალბათ, რამდენიმე წერილი დაჭირდება. საფეხბურთო ცხოვრება კი გრძელდება…
რამდენიმე დღის წინ ესპანეთის საფეხბურთო პირველობის მეოთხე ტურში გიორგი მამარდაშვილმა “ვალენსიას“ კარი ზედიზედ მეოთხედ დაიცვა და ერთგვარი რეკორდიც დაამყარა _ 20 წლის მეკარე პირველი ქართველი ფეხბურთელია, რომელიც “ლა ლიგის“ კლუბის სასტარტოში ზედიზედ მეოთხედ მოხვდა.
თბილისის “ლოკომოტივის“ ყოფილ ფეხბურთელამდე ესპანეთის უმაღლეს დივიზიონში კიდევ სამ ქართველ მოთამაშეს უასპარეზია. 2001-2002 წლების სეზონში “სოსიედადის“ მთავარმა მწვრთნელმა ჯონ ტოშაკმა გიორგი დემეტრაძე ზედიზედ სამ შეხვედრაში სასტარტოში ათამაშა. თუმცა, მისი ბასკური კარიერა წარუმატებელი გამოვიდა და 2002 წელს რუსეთში დაბრუნდა.
შოთა არველაძემ პროფესიული კარიერის დასკვნითი სეზონი (2007-08) “ლევანტეში“ გაატარა, თუმცა, ტრავმის გამო მხოლოდ ოთხ მატჩში მიიღო მონაწილეობა და ოთხივე შეხვედრაში მეორე ტაიმში ჩაერთო თამაშში.
გიორგი ქოჩორაშვილმა “ლევანტეს“ რიგებში “ლა ლიგაში“ 4 მატჩი ჩაატარა და ოთხივე შეხვედრაში მეორე ნახევარში გამოჩნდა მინდორზე. ახლახანს, 22 წლის ნახევარმცველმა კლუბთან ახალი კონტრაქტი გააფორმა, რომლის მიხედვით “ლევანტეს“ ღირსებას 2023 წლამდე დაიცავს.
მომდევნო ტურში “ვალენსია“ მადრიდის “რეალს“ უმასპინძლებს და იმედია გიორგი მამარდაშვილი კვლავ სასტარტო შემადგენლობაში იქნება.
ავსტრიული “Sky Sports“-ის ვერსიით გრაცის “შტურმის“ ქართველი ნახევარმცველი ოთარ კიტეიშვილი ბუნდესლიგის მე-7 ტურის სიმბოლურ გუნდში მოხვდა, რაც ნაკლებად მოსალოდნელი იყო, რადგან “კლაგენფურტთან“ შეხვედრაში კიტეიშვილი სათადარიგოთა სკამზე იჯდა და თამაშში მეორე ტაიმში, 59-ე წუთზე ჩაერთო, თუმცა მატჩის ბოლომდე საკმაოდ პროდუქტიული იყო და მაღალი შეფასება დაიმსახურა.
ბელგიის უმაღლეს ლიგაში 20 წლის ქართველი ფორვარდის, გიორგი მიქაუტაძის დებიუტი შედგა. “სერენი“ შინ ლიეჟის “სტანდარდთან“ 0:1 დამარცხდა. საქართველოს ეროვნული ნაკრების თავდამსხმელი სათადარიგოთა სკამზე იჯდა და თამაშში შესვენების შემდეგ ჩაერთო.
მატჩის შემდეგ გიორგი მიქაუტაძემ განაცხადა: “სერენში“ დაბრუნებით ბედნიერი ვარ. სათამაშო პრაქტიკა ძალიან მნიშვნელოვანია, თამაში მჭირდება და სწორედ ამიტომ დავბრუნდი. ლიეჟის “სტანდარდთან“ გოლის გატანის კარგი შანსი მქონდა, გოლის გატანასთან ახლოს ვიყავი. იმედი მაქვს, შემდეგ მატჩებში გოლებს გავიტან“.
ბოლო შაბათ-კვირის უმთავრესი საფეხბურთო მოვლენა მაინც კრიშტიანო რონალდუს “მანჩესტერ იუნაიტედში“ დაბრუნება გახდა. პორტუგალიელი “ნიუკასლთან“ შეხვედრისას თავიდანვე ძირითად შემადგენლობაში იყო. მატჩი “იუნაიტედის“ გამარჯვებით დასრულდა _ 4:1, რონალდუმ კი პირად ანგარიშზე ორი გოლი მიითვალა. “ძალიან ვნერვიულობდი, ალბათ არ მეტყობოდა, მაგრამ ბოლოს ასე როდის ვინერვიულე არ მახსოვს. მე მანჩესტერს ვეკუთვნი, აქ პირველად 18 წლის ასაკში მოვხვდი და მას შემდეგ ხალხი მუდამ მამხნევებს და გვერდში მიდგას. ყველგან ვითამაშე, ყველაფერი ვნახე, მაგრამ ინგლისში ფეხბურთი სხვანაირად უყვართ”, _ განაცხადა კრიშტიანო რონალდუმ მატჩის შემდეგ ინტერვიუში.
აი, რაც შეეხება “მანჩესტერ იუნაიტედის“ მთავარ მწვრთნელს, ოლე გუნარ სოლსკიაერმა განაცხადა, რომ ფორვარდი კრიშტიანო რონალდუ, შესაძლოა, გუნდის ძირითად შემადგენლობაში ვერ მოხვდეს.
“სასაცილო ისაა, რომ კრიშტიანო საკუთარ ჯანმრთელობაზე ძალზე ზრუნავს, ამიტომაც ვიცი, რომ აღდგენას სწრაფად ახერხებს. ამასთანავე, მან “იუვენტუსში“ წინასასეზონო მომზადებაც გაიარა. მნიშვნელოვანია, რომ მოედანზე ყველა გამოვიდეს და ირბინოს. ასევეა, რონალდოც, მანაც 90 წუთის განმავლობაში უნდა ირბინოს. ჩვენ სამშაბათს “იანგ ბოიზს“ ვეთამაშებით. ვნახოთ რას ვიზამთ. ისე კი ვუშვებ, რომ შესაძლოა, რონალდო ძირითად შემადგენლობაში ვერ მოხვდეს, ის ხომ 36 წლისაა“.
ამ ინტერვიუს შემდეგ ბრიტანულ სპორტულ მედიაში გაჩნდა მოსაზრება, რომ თუ რონალდუ მანჩესტერული კლუბის ძირითად შემადგენლობაში ადგილს ვერ დაიმკვიდრებს, ახალი გუნდის მოძიებას აქტიურად შეუდგება.
[sexy_author_bio]
