“კინოს იღებენ ომზე და დეკორაციებისთვის სჭირდებათ ეს დანგრეული შენობები?!”

ლანჩხუთის საკრებულოს ბოლო სხდომაზე, სხვადასხვა საკითხის განხილვისას, კვლავაც გაიჟღერა მუნიციპალიტეტის მიმართებაში ქვეყნის რკინიგზის დეპარტამენტის უმოქმედობის საკითხებმა.

ფაქტია, რომ ამ უწყებას უამრავი პრობლემა დაუგროვდა იმ სარკინიგზო მაგისტრალის ირგვლივ, რაც ლანჩხუთის მუნიციპალიტეტის ტერიტორიაზე გაივლის. თვალშისაცემია განადგურებული ინფრასტრუქტურა, რომელიც ემსახურება მოქალაქეთა ამ სახის სატრანსპორტო გადაადგილებას. დაწყებული ქალაქის ცენტრალური რკინიგზის სადგურიდან, სოფლების ბაქნებით გაგრძელებული, იმდენად სავალალო მდგომარეობაა, მეტი რომ არ შეიძლება. თუ არ ჩავთვლით “შტადლერის” ტიპის მატარებელს, რომლითაც სარგებლობის პატივი ხშირად არ გვეძლევა, სხვა სარკინიგზო ტრანსპორტი კი ვერავითარ კრიტიკას ვერ უძლებს. იმდენად მოძველებულია ეს მატარებლები, შეხედვისთანავე უნებურად ის ავადსახსენებელი 90-იანების წლები გაგახსენდება, რომელიც უკვე კარგა ხანია გავიარეთ და სულ სხვა მოლოდინებში ვართ არსებული რეალობიდან გამომდინარე. მაგრამ არა, ბათუმი–ქუთაისის ელექტრომატარებელის “ჩახრიგინების” ფონზე, რკინიგზაში ისევ მეოცე საუკუნეა.

სხდომაზე რკინიგზა თავდაპირველად გიორგი გახარიას პარტიელმა, ჯუმბერ ბლაგიძემ ახსენა, რომელიც სხდომას არ უშვებს, სუფსის რკინიგზის სადგურის სიახლოვეს არსებული ჯართის გატანის საკითხი არ მოიკითხოს, მაგრამ დღემდე ამაოა მისი ცნობისმოყვარეობის დაკმაყოფილება. შეგახსენებთ, რომ უკვე წლებია, სუფსაში, სადგურის მიმდებარე ტერიტორიაზე ჯართის გროვა ყრია, რის გამოც იქაურობა ჯაგნარად და ქვეწარმავლების ბუდედაა ქცეული. ისიც ვიცით, რომ ჯართი რკინიგზის დეპარტამენტის საკუთრებაა და ტერიტორიიდან გატანაზეც ზრუნვა ამ უწყებას მართებს, თუმცა, ჯერჯერობით, ეს ვერ მოხერხდა.

“სუფსის რკინიგზის სადგურის წინ ეიფელის მიერ ნაშენები ხიდი რომ ყრია დაშლილი, რა გახდა ამ ჯართის გატანა?! ბარდებით და ჯაგნარით გაივსო იქაურობა, ქვეწარმავლების ბუდედაც იქცა და მოსახლეობას ეს პრობლემა ძალიან აწუხებს. გთხოვთ, პირად კონტროლზე აიყვანოთ და მოაგვაროთ ეს საკითხი”, _ უკვე მერამდენედ მიმართა ასე ჯუმბერ ბლაგიძემ მუნიციპალიტეტის მერს.

ბევრი საკითხით გადაღლილი დეპუტატების თვალწინ, ბლაგიძეს ამ თემაზე დეპუტატებმა გოჩა ჯანაშიამ და გია გოგუაძემაც აუბეს მხარი. “ლელოს” დეპუტატი ხუმრობის ხასიათზეც კი დადგა და ხსენებული ჯართი “გრენლანდიას” შეადარა:

“გაიტანეთ გრენლანდია!!! ხომ გახსოვთ “ცისფერი მთები”? ზუსტად იმ სურათივითაა ეს ჯართი. და საერთოდაც, ვინმემ მოიკითხეთ ეს რკინიგზის დეპარტამენტი, ცოცხალია თუ მკვდარი? რა უბედურებაა, რას ჰგავს ბაქნები, ლანჩხუთის სადგური. რა ხდება, გაგვაგებინონ, კინოს იღებენ ომზე და დეკორაციებისთვის სჭირდებათ ეს დანგრეული შენობები, თუ რა უბედურებაა, სადამდე უნდა ვიყოთ ასე”?  _  სარკაზმით შეფუთა გოჩა ჯანაშიამ რკინიგზის უწყების უპასუხისმგებლობა.

გია გოგუაძემ კი რკინიგზის წარმომადგენელთა სხდომაზე მოწვევა და ადგილზე არსებულ პრობლემებზე დასმულ კითხვებზე პასუხების მიღება მოითხოვა:

“რა გახდა ბოლოს და ბოლოს, მოვიწვიოთ დეპარტამენტის წარმომადგენლები. გადაეცით მათ, რომ საკრებულოს აქვს მათთან შეხვედრის მოთხოვნა. წარმოიდგინეთ, რკინიგზა ყველაზე მეტადაა დაქცეული, იქედან წამოსული ხალხი კი, ზოგი პარლამენტში, ზოგიც მთავრობაში ყველაზე მეტად ფულიანია. ამ დროს კი არც ლიანდაგი არ ვარგა, არც _ ვაგონი, არც _ სადგური და არც _ ბაქანი”, _ თქვა გოგუაძემ.

“ბოლო პერიოდს ნამდვილად ვერ ვიტყვი, მაგრამ წინა წლებში არაერთხელ მქონდა კომუნიკაცია რკინიგზის დეპარტამენტთან, როგორც წერილობით, ისე პირადად. სუფსაში ჯართის თემას რაც შეეხება, ტერიტორია, სადაც ეს ჯართი ყრია მუნიციპალიტეტის საკუთრებაა. რკინიგზა დაგვპირდა, რომ გაიტანდნენ ამ ჯართს, მაგრამ დღემდე არაა გატანილი. გასულ წელს რკინიგზას საკმაოდ გაეზარდა შემოსავლები და გვქონდა მიმართვა. რა თქმა უნდა, მანამდეც ვითხოვეთ, რომ ის სადგურები, რომლებიც მუნიციპალიტეტის საკუთრებაშია, მათთვის გადაგვეცა, მაგრამ, ჯერჯერობით, პასუხი არ მიგვიღია. ახალ წერილს უახლოეს დღეებში მოვამზადებთ და გავაგზავნით”, _ ასე უპასუხა ლანჩხუთის მერმა, ალექსანდრე სარიშვილმა ოპოზიციის კითხვებს რკინიგზის თემაზე.