ოზურგეთის მუნიციპალიტეტის საკრებულოს განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიაში უკვე განიხილეს 2019 წლის ბიუჯეტის პროექტი.
როგორც “გურია ნიუსისთვის” ხდება ცნობილი, კომისია მერიას რეკომენდაციის სახით მიმართავს, რომ 2019 წელს გაიზარდოს ბაღებში მომუშავე პერსონალის შრომითი სარგო.
“ბიუჯეტის წარმოდგენილ პროექტში სკოლამდელი აღზრდისა და განათლების დაფინანსება განსაზღვრულია 4 200 000 ლარით, რაც ემსახურება საბავშვო ბაღებში სრულფასოვანი სააღმზრდელო გარემოს შექმნას, ახალი ჯგუფების გახსნას და კეთილმოწყობას, მატერიალურ-ტექნიკური ბაზის გაუმჯობესებას, კვების რაციონის გამრავალფეროვნებას და ძირითადი აქტივების მიმდინარე შეკეთებას და მოვლა-შენახვას. თუმცა, ბიუჯეტში არ არის გათვალისწინებული არც ერთი ახალი საბავშვო ბაღის მშენებლობა, იმ ფონზე, როცა აღსაზრდელთა კონტიგენტის სიდიდის გამო საბავშვო ბაღების ჯგუფები გადატვირთულია. კომისია მოითხოვს 2019 წლის ბიუჯეტის პრიორიტეტების დოკუმენტში აისახოს აღნიშნული პრობლემა და კონკრეტულად, საკითხის სიმწვავის გამო, ქალაქ ოზურგეთის ზვანი-მოიდანახეს უბანში დაიგეგმოს ერთი, მინიმუმ, 4-ჯგუფიანი საბავშვო ბაღის მშენებლობა.
ასევე, გათვალისწინებულ იქნას სკოლამდელ დაწესებულებებში დასაქმებული პერსონალის ხელფასის ზრდა, მინიმუმ, 50 ლარის ოდენობით. მუნიციპალიტეტისთვის დღემდე გადაუჭრელ პრობლემად რჩება შშმ პირთა ინტეგრაციის საკითხი. სამწუხაროდ, არამც თუ მუნიციპალიტეტის ინფრასტრუქტურა, ოზურგეთის მუნიციპალიტეტის ადმინისტრაციული შენობაც კი არ არის ადაპტირებული და შშმ პირებზე მორგებული. კომისია მიზანშეწონილად მიიჩნევს 2019 წლის ბიუჯეტში ოზურგეთის მუნიციპალიტეტის ადმინისტრაციულ შენობაში შშმ პირებზე გათვლილი ლიფტისა და ადაპტირებული სველი წერტილების მოწყობას”, _ აღნიშნულია რეკომენდაციაში, რომელიც უკვე გაეგზავნა ოზურგეთის მუნიციპალიტეტის მერიას.
ხელფასების ზრდას ითხოვს, ასევე, ფრაქცია “ოზურგეთელ მშრომელთა და ხელმოკლეთა ინტერესებისთვის” წევრები.
“სკოლამდელი განათლების დაფინანსება” (პროგრამული კოდი 04.01). აღნიშნული პროგრამის დაფინანსება 2018 წელთან (3.400) შედარებით იზრდება (4.200), მაგრამ აღწერილობაში არ არის მოცემული მომსახურე პერსონალისა და აღმზრდელების ხელფასების მატება, რაც იყო დაანონსებული. ეს პრობლემა მოითხოვს დადებითად გადაწყვეტას”, _ ამბობენ ფრაქციის წევრები.
ოზურგეთის მუნიციპალიტეტის სკოლამდელი აღზრდის ცენტრის ხელმძღვანელმა მაკა ჭყონია “გურია ნიუსთან” საუბრის დროს ამბობს, რომ წელს 33 ბაღში 300 000 ათასამდე ლარის სამუშაოები ჩატარდა.
“ეს სარემონტო სამუშაოები დღესაც მიმდინარეობს. ცენტრის ბიუჯეტი არ არის იმდენი, რომ ყველა ბაღში მოხდეს სარემონტო სამუშაოების ჩატარება. მოგეხსენებათ შენობები, სადაც ბაღებია განთავსებული, მუნიციპალიტეტის ბალანსზეა და სწორედ ოზურგეთის მუნიციპალიტეტის მერია აფინანსებს სარემონტო სამუშაოებს. 2020 წლამდე ბაღებში სარემონტო სამუშაოები უნდა დასრულდეს”, _ თქვა მაკა ჭყონიამ.
მისივე თქმით, 2019 წელს ცენტრის მწირი ბიუჯეტის ფარგლებში ბაღში მომუშავე პერსონალისთვის ხელფასების მატება არ იგეგმება:
“ხელფასების მატება უკვე იყო წელს”, _ გვითხრა მაკა ჭყონიამ.
გაითვალისწინებს თუ არა ოზურგეთის მუნიციპალიტეტის მერია კომისიების და ფრაქციების მიერ დაწერილ რეკომენდაციებს, ეს მომავალ კვირაში გახდება ცნობილი, როდესაც საკრებულოს ბიუჯეტის ჩასწორებული პროექტი დაუბრუნდება.
