კონკურსის გამარჯვებულები  _  „გურია ნიუსის“ ჟურნალისტები დააჯილდოვეს

ევროკავშირის მიერ დაფინანსებული პროექტის „სამოქალაქო საზოგადოების ინიციატივა“ ფარგლებში, გურიის რეგიონული ჰაბის – ინოვაციების და სამოქალაქო განვითარების ცენტრის, „პროგრესის სახლის“ მიერ, გამოცხადებული კონკურსების გამარჯვებული ჟურნალისტები გამოვლინდა.

პროგრესის სახლში განმარტეს, რომ გამოცხადებული კონკურსებიდან,  ერთი განკუთვნილი იყო მედიის წარმომადგენლებისთვის, ხოლო მეორე – სათემო ჯგუფებისთვის.

დაჯილდოების ცერემონიას „პროგრესის სახლმა“ უმასპინძლა.

მედია კონკურსის მიზანი იყო, სამოქალაქო საზოგადოების საქმიანობის წარმოჩენა და აქტიური მოქალაქეობის მნიშვნელობის ხაზგასმა. საკონკურსოდ წარმოდგენილი იყო ტრადიციული და არატრადიციული მედია საშუალებების 16 სტატია/ვიდეო მასალა. კონკურსის შედეგად სამი გამარჯვებული გამოვლინდა:

მარინა ჩიხლაძე (“გურია ნიუსი”  სტატიისთვის) “როგორ შევაჩერებთ კლიმატის უარესობისკენ ცვლილებას? – გურიის რეგიონი თავისებურ მიდგომას ითხოვს”,  გიორგი გირკელიძე – „გურულების ნადი და ნადური“ (“გურია ნიუსი”, სტატია)  და ნინო ვაშალომიძე – „საჯარო სამსახურიდან სამოქალაქო აქტივისტობამდე –კუკური ბარამიძე“ (გურია TV,  სიუჟეტი).

სათემო კონკურსის მიზანი იყო წაეხალისებინა თემის წევრების, მათ შორის ახალგაზრდებისა და ხანდაზმულების ჩართულობა ადგილობრივ დონეზე, სოფელში/თემში არსებული პრობლემის გამოვლენასა და გადაჭრაში. სათემო კონკურსის ფარგლებში, გურიის თითოეულ მუნიციპალიტეტში ერთი საინიციატივო გუნდი დაჯილდოვდა: ლანჩხუთიდან  აცანის, ჩოხატაურიდან ჯვარცხმის, ხოლო ოზურგეთიდან ვაკიჯვრის სათემო ჯგუფების მიერ წარმოდგენილი იდეები.

გამარჯვებულებს სერტიფიკატები და ვაუჩერები  „პროგრესის სახლის“ წარმომადგენელმა, ნათია ვაშალომიძემ გადასცა.

ვულოცავთ და კვლავ წარმატებებს ვუსურვებთ!

აქვე აღვნიშნავთ, რომ ჩვენი კოლეგა, გიორგი გირკელიძე ახლა  თურქეთში მკურნალობს და  ღონისძიებას ვერ დაესწრო.

პროექტი ,,სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ,დაფინანსებულია ევროკავშირისა და კონრად ადენაუერის ფონდის მიერ. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად -საქართველოს სტრატეგიული კვლევებისა და განვითარების (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP).