გუშინ ცნობილი გახდა რომ, ანტონიო კონტესა და “ნაპოლის” პრეზიდენტი აურელიო დე ლაურენტისის მოლაპარაკებები უშედეგოდ დასრულდა.
კონტემ “ინსტაგრამზე” გამოქვეყნებული პოსტით ახსნა, რომ ამ მომენტში ოჯახთან ერთად დასვენებით სურს დატკბეს, თუმცა მიზეზი, სავარაუდოდ, სხვაა. მან სამწლიანი კონტრაქტი და სეზონურ გასამრჯელოდ 8 მილიონი ევრო მოითხოვა, რასაც დე ლაურენტისი არ დათანხმდა.
ასე რომ, რუდი გარსია, როგორც მინიმუმ, მომავალი სამი მატჩისას ნეაპოლური გუნდის თავკაცი იქნება. არსებობს სათადარიგო გეგმაც, რომლის მიხედვით, ამ სამ შეხვედრაში წარუმატებლობის შემთხვევაში, რუდი გარსიას დროებით უმუშევარი იგორ ტუდორი შეცვლის, რომელიც, ალბათ, უფრო დაბალ ანაზღაურებაზე იქნება თანახმა.
ანტონიო კონტესა და დე ლაურენტისის შეხვედრის შესახებ იტალიელმა ჟურნალისტმა ფაბრიციო რომანომ შემდეგი ინფორმაცია გაავრცელა:
„ანტონიო კონტეს დღეს ხანგრძლივი და პირდაპირი საუბარი ჰქონდა „ნაპოლისთან“. დისკუსია არ იყო პოზიტიური, რადგან იტალიელმა მწვრთნელმა გადაწყვიტა ახალ შესაძლებლობებს დაელოდოს. „ნაპოლის“ პრეზიდენტი დე ლაურენტისი კონტეს პირდაპირ ესაუბრა, მაგრამ არანაირი შეთანხმება არ არის. ანტონიოს ურჩევნია ახალ სამსახურს დაელოდოს“.
სხვადასხვა იტალიური გამოცემები იტყობინებიან, რომ დე ლაურენტისი გარსიას მხოლოდ კონტესთან შეთანხმების მიღწევის შემთხვევაში გაათავისუფლებდა. ახლა კი, ფრანგი სამსახურს შეინარჩუნებს, მაგრამ მას დრო მისცეს.
გუშინ, ვეტერანმა იტალიელმა ფეხბურთელმა ანტონიო კასანომ განაცხადა, რომ „ნაპოლი“ აურელიო დე ლაურენტისმა დაშალა და გულშემატკივრებმა პირველ რიგში მას უნდა უსტვინონ, არა ფეხბურთელებსა და რუდი გარსიას.
„ნაპოლი“ თუ სეზონს რუდი გარსიასთან ერთად გააგრძელებს, ჩემი აზრით, ჩემპიონთა ლიგის საგზურის მოპოვებაც გაუჭირდება, ეს უკვე სეზონის დასაწყისშიც ვთქვი. თუ კონტე მოვა, ყველაფერი შეიცვლება. სხვას რას ელოდნენ გულშემატკივრები? დე ლაურენტისმა მოიყვანა მწვრთნელი, რომელიც ფეხბურთს პრაქტიკულად ჩამოშორებული იყო და საუდის არაბეთშიც კი გაათავისუფლეს. რას ელოდნენ ფენომენი სპალეტის ადგილზე მისული ასეთი მწვრთნელისგან?
უცნაურია, რომ „ფიორენტინასთან“ მატჩის შემდეგ ფანებმა ფეხბურთელებს და გარსიას უსტვინეს, მაგრამ არა დე ლაურენტისს, რომელმაც ყველაფერი დაშალა სპალეტის გუნდიდან გაშვებით. მან კატასტროფა გამოიწვია, აღარ არის გუნდში მაგიური გარემო. მწვრთნელს არ ენდობიან, პოლიტანოც კი ეწინააღმდეგება“, – განაცხადა ანტონიო კასანომ.
გუშინ, გამოცემამ „Corriere dello Sport“ საინტერესო ინფორმაცია გაავრცელა – ხულენ ლოპეტეგი მზად არის უხელმძღვანელოს „ნაპოლის,“ თუ რუდი გარსია გადადგება.
ლოპეტეგიმ თავად შესთავაზა თავისი მომსახურება ნეაპოლელებს.
57 წლის სპეციალისტის ბოლო სამუშაო ადგილი „ვულვერჰემპტონი“ იყო. ლოპეტეგის ხელმძღვანელობით კლუბმა პრემიერლიგის 2022-2023 წლების სეზონში 41 ქულით მე-13 ადგილი დაიკავა.
ლოპეტეგი ასევე ხელმძღვანელობდა მადრიდის „რეალს,“ „სევილიას,“ „პორტუს“ და ესპანეთის ეროვნულ გუნდს.
ამასობაში კი „ნაპოლის“ ანდრე-ფრანკ ზამბო ანგისა გამოაკლდა. კამერუნელმა ფეხბურთელმა ბარძაყის დაზიანება „ფიორენტინასთან“ მატჩში მიიღო და სამედიცინო შემოწმებამ ტრავმა დაადასტურა.
ანგისა დაახლოებით სამი კვირა იუქმებს და გაუცდება „ვერონასა“ და „უნიონის“ წინააღმდეგ მატჩები. “ნაპოლისთვის” კარგი ისაა, რომ აფრიკელის ტრავმა სანაკრებო პაუზას დაემთხვა. თუმცა, ჯერ მაინც უცნობია მოედანზე მისი დაბრუნების ზუსტი თარიღი, ეს შეიძლება „მილანის“ წინააღმდეგ მოხდეს.
ავტორი
