კორონავირუსის წინააღმდეგ კიდევ ერთი ვაქცინა გამოსცადეს _ოქსფორდის უნივერსიტეტის მიერ შექმნილმა კორონავირუსის საწინააღმდეგო ვაქცინამ ტესტირებაში მონაწილეთა 70% კორონავირუსისგან დაიცვა, _ ამის შესახებ BBC წერს.
გამოცემის ინფორმაციით, პრეპარატის ტესტირებაში მონაწილეობა 20 ათასზე მეტმა მოხალისემ მიიღო. პროცესი დიდ ბრიტანეთსა და ბრაზილიაში მიმდინარეობდა. მათ შორის, ვინც ვაქცინის 2 დოზა მიიღო, კორონავირუსი 30 ადამიანს გამოუვლინდა. პლაცებოს მიღების შემთხვევაში კი, ინფიცირებულთა რაოდენობამ 101 შეადგინა.
სპეციალისტები ამ შედეგს ტრიუმფად და ამავდროულად იმედგაცრუებად აფასებენ, რადგან Pfizer-ისა და Moderna-ს ანალოგიური პრეპარატების ეფექტიანობა 90%-ს აღემატება. თუმცა, ოქსფორდის ვაქცინა მათზე იაფია და მისი შენახვა და ტრანსპორტირება გაცილებით მარტივია. სპეციალისტების აზრით, დამტკიცების შემთხვევაში, პრეპარატი პანდემიის მართვაში მნიშვნელოვან როლს შეასრულებს.
დიდი ბრიტანეთის მთავრობამ ვაქცინის 100 მილიონი დოზა წინასწარ შეიძინა, რაც 50 მილიონი ადამიანის აცრისთვის არის საკმარისი.
Pfizer-ის და BioNTech-ის ვაქცინის ეფექტიანობა 65 წელს გადაცილებულებს შორის 94%-ს შეადგენს. ამერიკული კომპანია Moderna-ს ახალი ვაქცინა კი 95%-ით ეფექტურია.
