უზენაესმა სასამართლომ დაუშვებლად ცნო მესამე პირთა საკასაციო საჩივარი და ძალაში დატოვა სააპელაციო სასამართლოს გადაწყვეტილება _ საქმე ეხება ქალაქ ოზურგეთის მუნიციპალიტეტის ყოფილი თანამშრომლების კუკა ბარამიძის და თინათინ სარიშვილის საქმეს, რომლებმაც ოზურგეთის მუნიციპალიტეტის მერიას და ოზურგეთის მუნიციპალიტეტის საკრებულოს სასამართლოში ყველა ინსტასიაში მოუგეს. უფრო კონკრეტულად ბარამიძე და სარიშვილი მობილობის და რეორგანიზაციის პროცესში გამოცემული ოზურგეთის მუნიციპალიტეტის მერიის სამართლებრივი აქტების და ოზურგეთის მუნიციპალიტეტის საკრებულოს 2018 წლის #45 დადგენილების ბათილად ცნობას; მობილობის წესით თანამდებობაზე გადაყვანის დავალდებულებას; მერიის უკანონო მოქმედებით გამოწვეული იძულებითი განაცდურის ანაზღაურებას და ამასთან ერთად ხელფასზე დაკლებული ანაზღაურების ნაწილის დაუყოვნებლივ ჩარიცხვის დავალდებულებას ითხოვდნენ.
კუკა ბარამიძის თქმით, ამჯერად საქმე მათ წინააღმდეგ სასამართლოში ოზურგეთის მუნიციპალიტეტის იურიდიული სამსახურის თანამშრომლებმა კლიმენტი ცერცვაძემ და თამარ ბაქანიძემ აღძრა.
უზენაესი სასამართლოს გადაწყვეტილებაში ვკითხულობთ: ამდენად, საკასაციო სასამართლო იზიარებს მოცემულ საქმეზე სააპელაციო სასამართლოს მიერ გაკეთებულ სამართლებრივ შეფასებებს. რომელიც თავის მხრივ არსებითად ეყრდნობა პირველი ინსტანციის სასამართლოს მიერ დადგენილ ფაქტობრივ გარემოებებს და მიიჩნევს, რომ სააპელაციო სასამართლომ სწორად გადაწყვიტა დავა. ამასთან, არ არსებობს საკასაციო საჩივრის განხილვის შედეგად მსგავს სამართლებრივ საკითხზე საქართველოს უზენაესი სასამართლოს მანამდე არსებული პრაქტიკისაგან განსხვავებული გადაწყვეტილების მიღების ვარაუდი. სააპელაციო სასამართლოს გასაჩივრებული გადაწყვეტილება ასევე არ ეწინააღმდეგება ადამიანის უფლებათა და ძირითად თავისუფლებათა დაცვის კონვენციას და ადამიანის უფლებათა ევროპული სასამართლოს პრეცედენტულ სამართალს. ამასთან, საქმის განხილვისა და საკასაციო სასამართლოს მიერ საქმეზე ახალი გადაწყვეტილების მიღების საჭიროება არ არსებობს, არც სამართლის განვითარებისა და ერთგვაროვანი სასამართლო პრაქტიკის ჩამოყალიბების თვალსაზრისით. ამდენად, საკასაციო სასამართლო მიიჩნევს, რომ მოცემულ საქმეს არ გააჩნია არავითარი პრინციპული მნიშვნელობა სასამართლო პრაქტიკისთვის, ხოლო საკასაციო საჩივარს – წარმატების პერსპექტივა“
ოზურგეთის მუნიციპალიტეტის მერიის იურიდიული სამსახურის უფროსი ლაშა თავაძე “გურია ნიუსთან“ საუბრის დროს ამბობს:
“ოზურგეთის მუნიციპალიტეტის მერია აღასრულებს უზენაესი სასამართლოს მიერ მიღებულ გადაწყვეტილებას.“- გვითხრა ლაშა თავაძემ.
მკითხველს შევახსენებთ, რომ ამ საქმის განხილვა სასამართლო დარბაზებში, დაახლოებით, სამი წელი გრძელდებოდა.
