“კულტურის სახლის ავარიულ შენობაში სამკითხველოს დატოვება დანაშაულია”

ლანჩხუთის მუნიციპალიტეტის სოფელ ქვიანში ბიბლიოთეკის ფართთან დაკავშირებით პრობლემები უკვე წლებია, არსებობს. სოფლის ბიბლიოთეკა კულტურის სახლის სრულიად ამორტიზებულ და დანგრევისპირას მყოფ შენობაშია განთავსებული, სადაც ეზოშიც კი ჯაგნარია და ყველაზე მოწადინებულ წიგნის მკითხველსაც სურვილი არ გაუჩნდება იქ შესვლის.

სწორედ ქვიანის ბიბლიოთეკის საკითხი გააჟღერა საკრებულოს ბოლო სხდომაზე ფრაქცია “ლანჩხუთი საქართველოსთვის” წევრმა გოჩა ჯანაშიამ. მისი თქმით, სოფლის ბიბლიოთეკისთვის ოთახი ამბულატორიის შენობაშია გამოყოფილი, რომელიც მცირედ კოსმეტიკურ რემონტს საჭიროებს: “ვინმე რომ დაინტერესდეს და ითხოვოს, მაჩვენეთ, სად არის ქვიანში ბიბლიოთეკაო, სირცხვილით დავიწვებით, ისეთ ადგილასაა განთავსებული. რამდენადაც ვიცი, ორ წელზე მეტია, ბიბლიოთეკისთვის ამბულატორიის შენობაში გამოიყო ოთახი, რომელიც ელემენტარულ კოსმეტიკურ რემონტს საჭიროებს. საინტერესოა, როდის მოგვარდება ეს პრობლემა? უკვე არაერთხელ დავსვი ეს საკითხი და პასუხი არ არის”, _ ამბობს ჯანაშია.

ქვიანში ბიბლიოთეკის შენობის საკითხი რომ დროულად გადასაწყვეტია, ამას საკრებულოს წევრი მმართველი გუნდიდან ზაზა წულაძეც ადასტურებს, რომელიც წინა მოწვევის წარმომადგენლობით ორგანოში ამ სოფლის მაჟორიტარი იყო. როგორც მან საკრებულოს სხდომაზე აღნიშნა, პრობლემა წლებია, აქტუალურია და მერიაც საქმის კურსშია ამ თემასთან დაკავშირებით:

“უკვე წლებია, ეს საკითხი აქტუალურია და შესაბამისად, ყველა საქმის კურსშია. ამბულატორიის შენობაში, სადაც ბიბლიოთეკისთვის ფართია გამოყოფილი, იატაკია მოსაწესრიგებელი, რაც არ უნდა წარმოადგენდეს პრობლემას და ეს თემაც სალაპარაკო აღარ იქნება”, _ აღნიშნა წულაძემ.

სხდომას მერის პირველი მოადგილე ეკატერინე გუჯაბიძე ესწრებოდა, რომელსაც საკრებულოს წევრების მხრიდან დასმულ შეკითხვებზე პასუხის გაცემა უწევდა. კონკრეტულ თემასთან დაკავშირებით, მერის მოადგილემ განმარტა, რომ ბიბლიოთეკების მხრივ ბევრი ინიციატივაა და ეტაპობრივად ყველა საკითხი მოწესრიგდება, მით უმეტეს, რომ კულტურის დაწესებულებათა გაერთიანებას ახალი ხელმძღვანელი ჰყავსო.

ჯანაშია მიიჩნევს, რომ ყოფილი კულტურის სახლის ავარიულ შენობაში ობლად შეხიზნული სამკითხველოს იქ დატოვება დანაშაულია:

“ბიბლიოთეკების თემა ჩვენს მუნიციპალიტეტში, ზოგადად, პრობლემატურია, როგორც შენობა-ნაგებობების, ასევე, ფუნქციების შესრულების მხრივ. სამწუხაროდ, მკითხველთა რაოდენობა, გასაგები მიზეზების გამო, მცირდება, განსაკუთრებით, ახალგაზრდების მხრიდან. არც სკოლებსა და სამკითხველოებს შორის არ არის ის კავშირი, რომელიც მოსწავლეებისთვის ასე რიგად აუცილებელია. თავის მხრივ, ბიბლიოთეკართა ხელფასები მიზერულია და მხოლოდ წელს მოხდა, რომ მათი ანაზღაურება 200 ლარს მცირედით გადაცდა.

სამწუხაროდ, მატერიალურ-ტექნიკური უზრუნველყოფა თანამედროვე სტანდარტებით სამკითხველოებს არ გააჩნიათ. ახალი წიგნების შესაძენად თანხები საკმარისი არაა. ხშირ შემთხვევაში, არ არის კომპიუტერული ტექნიკა, ინტერნეტი, რაც დღევანდელი დღისთვის აუცილებელი პირობაა მკითხველთა მოსაზიდად.

მგონი, დროა, ამ სისტემის ძირეული ცვლილებების თაობაზე ვიფიქროთ. საუბარია ერთგვარი საინფორმაციო-საგანმანათლებლო ცენტრების შექმნაზე, რომლებიც სწორედ არსებული ბიბლიოთეკების ბაზაზე უნდა შეიქმნას. ამისთვის საჭიროა ახლებური ხედვა და სურვილი იმისა, რომ სულ უფრო მეტი განათლებული ადამიანი გვყავდეს სოფლებში. საამისოდ სკოლებსა და ამ ცენტრებს შორის უნდა იყოს აქტიური თანამშრომლობა, რაც მკვეთრად გაზრდის მოსწავლეთა დაინტერესებას წიგნების მიმართ.

ლანჩხუთის მუნიციპალიტეტის ბოლო საკრებულოს სხდომაზე დავინტერესდი ქვიანის ადმინისტრაციულ ერთეულში არსებული ბიბლიოთეკის ბედით, რომელიც ისეთ ადგილზეა განთავსებული, ვერც წარმოიდგენთ. ვინმე რომ მოვიდეს და მოინდომოს ამ შენობის ნახვა, თავი მოგვეჭრება. ყოფილი კულტურის სახლის ავარიულ შენობაში ობლად შეხიზნული სამკითხველოს იქ დატოვება დანაშაულია და კარგა ხანია, გამოინახა ფართი, სადაც ბიბლიოთეკა უნდა გადავიდეს. ეს ფართი იქვე არსებული ამბულატორიის შენობაში გამოიყო, რომელიც საჭიროებს მცირედ კოსმეტიკურ რემონტს და იატაკს. სწორედ, ეს ვიკითხე ამ სხდომაზე და მანამდეც, ფრაქციისა თუ კომისიის სხდომებზე, არაერთხელ.

საოცრება ისაა, მერიიდან პასუხი მივიღე, რომელიც ფრიად გაურკვეველია. მართალია, ეს პასუხი ოპერატიულად მომაწოდეს, მაგრამ იქ წერია, რომ ქვიანის ბიბლიოთეკისთვის მერია ეძებს ალტერნატიულ ფართს და როცა იპოვის, პრობლემაც მოგვარდება. ამ პასუხში გასაკვირი არაფერი იქნებოდა, რომ არა ის, რომ ფართი ორ წელზე მეტია უკვე არსებობს და იქ როდის მოხდება წიგნადი ფონდის გადატანა, სწორედ ეს მაინტერესებდა. თუმცა, მერის სახელით გამოგზავნილ ამ პასუხში აღმოჩნდა, რომ ან მოვალეობის მოხდის მიზნით გამცეს პასუხი ისე, რომ თავად მერი და მისი მოადგილე ჩააყენეს უხერხულობაში, რომლებმაც იცოდნენ, რომ ეს ფართი უკვე არსებობს, ანდა აღნიშნული ფართის გადაცემა ბიბლიოთეკისთვის გადაიფიქრეს და სხვა ფართს ეძებენ, რაც წარმოუდგენელია იქ არსებული რეალობიდან გამომდინარე”, _ ამბობს პარტია “ლელოს” წარმომადგენელი ლანჩხუთის საკრებულოში, გოჩა ჯანაშია.