გუშინ, გორში, „თენგიზ ბურჯანაძის“ სახელობის სტადიონზე საქართველოს ეროვნულმა გუნდმა მიმდინარე წლის უკანასკნელი მატჩი ჩაატარა, ამხანაგურად უზბეკეთს დაუპირისპირდა და დავით ვოლკოვის გოლით 1:0 დაამარცხა _ ეს ვილი სანიოლის გუნდის ზედიზედ მესამე გამარჯვებაა.
პირველ ტაიმში საქართველოს ნაკრებს სათამაშო უპირატესობა არ ჰქონია, პირიქით, უზბეკებს უფრო სახიფათო მომენტები ჰქონდათ. თუმცა, 41-ე წუთზე ზურიკო დავითაშვილმა მარჯვნიდან ჩააწოდა და ვოლკოვმა, რომელიც ნაკრებში მეორე შეხვედრას ატარებდა, თავით დასწრებაზე ითამაშა _ 1:0.
მეორე ტაიმში ყველაზე სახიფათო მომენტი შეცვლაზე შესულმა ხვიჩა კვარაცხელიამ შექმნა _ მისი დარტყმული ძელმა მოიგერია.
შვედეთის ნაკრებთან ჩინებულად ჩატარებული შეხვედრის შემდეგ იტალიურ სპორტულ მედიაში ხვიჩა კვარაცხელიას გადაბირება კლუბ „ნაპოლის“ შესთავაზეს.
გამოცემა „Grand Hotel Calciomercato“-სთან საუბარში ცნობილი იტალიელი ჟურნალისტი ჯანლუკა დი მარციო საქართველოს ნაკრებისა და ყაზანის „რუბინის“ ფეხბურთელის ხვიჩა კვარაცხელიას შეძენას იტალიურ „ნაპოლის“ ურჩევს.
დი მარციომ, რომელიც სატრანსფერო სიახლეების მხრივ მსოფლიოში ერთ-ერთი საუკეთესო ინსაიდერია, „ნაპოლის“ სპორტულ დირექტორ კრისტიანო ჯიუნტოლის ხვიჩას შესახებ რჩევაც მისცა.
„ხვიჩა კვარაცხელია იმ პროფილის ფეხბურთელია, რომელიც „ნაპოლიში“ ძალიან კარგად წარმომიდგენია. 20 წლისაა, საქართველოში დაიბადა და ამჟამად ყაზანის „რუბინში“ თამაშობს. მარცხენა გარემარბია, არ ექცევა წნეხის ქვეშ და აქვს დარტყმები, რომელსაც მაყურებლის აღფრთოვანება შეუძლია. მან იცის დიდ თამაშებში გაბრწყინება. გრძელი ფეხებით, 183 სმ. სიმაღლის, მემარჯვენეა, მაგრამ დაამტკიცა, რომ მარცხენა ფეხის გამოყენებაც კარგად შეუძლია. ფიზიკურადაც კარგია, ფეთქებადი. შესანიშნავი აჩქარება აქვს და ტემპის შეცვლა შეუძლია. ტექნიკურადაც ბრწყინვალეა, შეუძლია დრიბლინგი მაშინაც კი, როცა მეტოქის დაცვაში სივრცეები არ არის, თანაც ორივე ფეხით”.
„ნაპოლის“ მარცხენა გარემარბის პოზიციაზე გუნდის კაპიტანი და სიმბოლო ლორენცო ინსინიე ჰყავს, მაგრამ 30 წლის იტალიელს სეზონის ბოლოს კონტრაქტი ეწურება და კლუბის ხელმძღვანელობასთან მის განახლებაზე ვერ თანხმდება. იმედია დიეგო მარადონას გუნდი ქართველი მოთამაშით სერიოზულად დაინტერესდება.
ხვიჩა კვარაცხელიას, ალბათ, უფრო გაუმართლებს, ვიდრე საბა კვირკველიას. „მეტალისტი-1925“-ის ქართველმა მცველმა უკრაინული გამოცემა „ფუტბოლისთვის“ მიცემულ ინტერვიუში „ლესტერში“ განუხორციელებელ ტრანსფერზე ისაუბრა:
„ინგლისელებთან მოლაპარაკებები მართლაც მიმდინარეობდა. მაშინ „ლოკომოტივში“ ჩინებული სეზონი მქონდა – რუსეთის ჩემპიონები გავხდით, ლიგაში 29 მატჩი ჩავატარე, ცოტა გოლი გავუშვით და ნაკრებშიც ყველა შეხვედრაში ვითამაშე. რატომ არ გამოვიდა „ლესტერში“ გადასვლა? საბოლოო წინადადებით არ მოუმართავთ. ყველაფერი მოლაპარაკებების ეტაპზევე დასრულდა“.
გუშინ ესპანურმა გამოცემამ „Marca“ „ვალენსიას“ სატრანსფერო გეგმებს სპეციალური წერილი მიუძღვნა და ყურადღება იმ ფეხბურთელებზე გაამახვილა, რომელთა კონტრაქტის გამოსყიდვაც „ღამურებს“ შეუძლიათ.
„ვალენსიას“ გიორგი მამარდაშვილის, ალდერეტესა და დუროს გაფორმება 12.5 მილიონ ევროდ შეუძლიათ. ეს მცირე თანხაა ასეთი დონის სამი ფეხბურთელის სანაცვლოდ.
ქართველი მეკარე „ვალენსიაში“ სარეზერვო გუნდში სათამაშოდ გადავიდა და კლუბს მისი კონტრაქტის გამოსყიდვა 1 მილიონ ევროზე ნაკლებად შეუძლია, ოღონდ ეს პუნქტი პირველ იანვრამდე უნდა აამოქმედონ. მან სასტარტო შემადგენლობაში 5 მატჩი ჩაატარა, მაგრამ შეცდომების გამო კარი სილესენს ჩააბარა. მისი შემადგენლობიდან ამოვარდნა „სევილიასთან“ დაშვებულ შეცდომებს მიაწერეს, თუმცა მთავარი მწვრთნელი ხოსე ბორდალასის თქმით, გიორგის შანსი აუცილებლად კიდევ მიეცემა.
გუშინ გამოცემამ „El Nacional“ გაავრცელა ინფორმაცია რომ ბრაზილიელი ნეიმარი „პსჟ“-ს 2021/22 წლების სეზონის დასრულების შემდეგ დატოვებს.
პარიზული კლუბის პრეზიდენტს, ნასერ ალ-ხელაიფს თავდამსხმელის გაყიდვა მომავალი წლის ზაფხულში აქვს გადაწყვეტილი, ტრანსფერისგან კი მაქსიმალურად დიდ თანხას ელის. ცნობილია, რომ ხელმძღვანელობა რამდენიმე ინგლისურ კლუბს თვითონვე დაუკავშირდა. სიაში შეხვდებით ასევე „ბარსელონასაც“.
გამოცემა „The Times“-ის მტკიცებით, „მანჩესტერ იუნაიტედის“ ხელმძღვანელობას ოლე გუნარ სულშერის შეცვლა ზინედინ ზიდანით სურს. ფრანგი მწვრთნელი მადრიდის „რეალიდან“ წასვლის შემდეგ უმუშევარია და შესაბამისად, მოლაპარაკებებისთვის ღიაა.
არ არის გამორიცხული საქმე კრიშტიანო რონალდოსა და რაფაელ ვარანის გუნდში ყოფნამ გაამარტივოს. მათ ზიდანთან წლების განმავლობაში უმუშავიათ და კარგი ურთიერთობაც აქვთ.
ზიდანამდე „მანჩესტერ იუნაიტედს“ გერმანელი მწვრთნელი რალფ რანგნიკი დაუკავშირეს, ხოლო მანამდე ანტონიო კონტესაც ხშირად ახსენებდნენ, მაგრამ იტალიელმა ლონდონის „ტოტენჰემი“ ჩაიბარა.
[sexy_author_bio]
