იტალიის პირველობაზე, „სპეციასთან“ სტუმრად დამაჯერებელი გამარჯვების შემდეგ (3:0), „ნაპოლის“ მთავარმა მწვრთნელმა ლუჩანო სპალეტიმ კვარაცხელია – ოსიმენის დუეტი განსაკუთრებით შეაქო.
„ჩვენ გვჭირდება კვარას და ოსიმენის ხარისხი, მათი იმპროვიზაცია და ფანტაზია. ისინი კარისკენ მიმავალ გზას ხსნიან და სხვებსაც უხსნიან. იოლი არ იყო ისეთი ტემპი პოვნა, როგორსაც შეჩვეული ვართ, რადგან მოედნის საფარი ძალიან ცუდი იყო. მნიშვნელოვანია გუნდისთვის თამაში და ხელმისაწვდომობა, როგორც ეს კვარამ ოსიმენის გოლის მომენტში გააკეთა. ეს არის გუნდური თვისებები, რაც ამ ბიჭებს აქვთ.
დღეს კვარამ ოსიმენს გოლი გაატანინა, მაგრამ დარწმუნებული იყავით, რომ შემდეგში ოსიმენი გოლს უკვე კვარას გაატანინებს. ეს არის, ხელმისაწვდომობისა და მეგობრობის საკითხი, გუნდური სულისკვეთება ინდივიდუალურზე წინ დგას. კვარაცხელია პენალტისტია? დიახ, მაგრამ სხვებიც არიან, ვისაც პენალტის შესრულება შეუძლიათ“, – განაცხადა ლუჩანო სპალეტიმ.
ხვიჩა კვარაცხელიას მორიგ შესანისნავ თამაშს იტალიური მასმედია აქტიურად გამოეხმაურა.
Eurosport: „თერთმეტმეტრიანზე ძალიან ცივად იმოქმედა. შთამბეჭდავია, როცა არაფრისგან ყოველთვის პოულობს რაღაცას, რომ თავი სახიფათოდ წარმოაჩინოს. 10 გოლი გაიტანა და 12 საგოლე პასი გააკეთა ყველა ტურნირზე“.
Corriere Dello Sport: „ქართველი ტალანტი, როცა შანსი ეძლევა ცეცხლოვანია. გოლი გაიტანა და შემდეგ ოსიმენის გოლში ძალიან გულუხვად ითამაშა, რითაც ნიგერიელმა დუბლი შეასრულა“.
Tuttonapoli: „პირველ ტაიმშიც კი, როცა სივრცეები არ ჰქონდა, ყველაზე შესამჩნევი იყო, ხშირად 3-4 მეტოქე მეურვეობდა. ანგარიში უნაკლო პენალტით გახსნა, რაც მიანიშნებს, რომ პენალტისტი ის იქნება. შემდეგ კი ოსიმენთან ფანტასტიკური ურთიერთგაგება აჩვენა, როცა საგოლე პასი გაუკეთა“.
Mediaset: „როგორც მთელმა გუნდმა მასაც არ დაუწყია იდეალურად, მაგრამ როცა ბურთი აქვს, ყოველთვის ახერხებს რაღაცის გამოგონებას, რაც აპლოდისმენტებს იწვევს“.
ხვიჩა კვარაცხელიასა და ვიქტორ ოსიმენის დუეტს გამოცემამ „Spazionapoli“ სპეციალური წერილი მიუძღვნა.
„ერთი მოქანდაკე, მეორე მხატვარი. ვიქტორ ოსიმენი და ხვიჩა კვარაცხელია, შორიდან ჩამოსული უცნაური დუეტი. შეუდარებელი და საქმე მხოლოდ სტატისტიკაში არ არის. 27 გოლი და 18 საგოლე პასი ორივეს საერთო ჯამში შიშს იწვევს, მაგრამ ეს არ არის საკმარისი შემტევი დუეტის ძალის ასახსნელად, რომელიც ფაქტობრივად იერარქიას არღვევს.
ცოტა ხნის წინ უცნობი, დღეს კი უნივერსალური ენის პროფესორები. ისინი მსოფლიო ფეხბურთში ადგილის მოსაპოვებლად იბრძვიან. ორივე შორიდან ჩამოვიდა, როგორც ჩანს, ზუსტი მისიით: ევროპის დაპყრობა და ნეაპოლის აღტაცება. თანამედროვე ფეხბურთის შესანიშნავი ინტერპრეტატორები.
ერთი მოქანდაკე, მეორე მხატვარი. ერთი პოეტი, მეორე მწერალი.
მათკენ მიმართული პროჟექტორებით შეიძლება დაბრმავდე, მაგრამ მათ გაუვალი მთებიც უნდა დაიპყრონ, იმიტომ, რომ „ნაპოლის“ და ნეაპოლელებს სურთ ქუჩებში სიხარულის ყვირილი, ჩახუტება და ტირილი. ნეაპოლს გონების დაკარგვა სურს და ნეაპოლს ბოლო წლების ყველაზე ლამაზი სიზმრიდან გამოღვიძება არ სურს“.
ხვიჩა კვარაცხელიას თემას შეეხო „ინტერის“, „ფიორენტინასა“ და „ბრეშას“ ყოფილი მცველი დანიელე ადანი:
„ხვიჩა კვარაცხელია ევროპის საუკეთესოთა შორისაა, ტექნიკურად ძალიან ძლიერი გარემარბია და ყველაფერს აკეთებს: გოლები გააქვს, თანაგუნდელებს საგოლე პასებს უკეთებს და ამავდროულად მუშაობს იმისთვის, რომ თანაგუნდელებს დაცვაშიც დაეხმაროს. ამ ბიჭს ყოველთვის სწორი დამოკიდებულება აქვს. გარდა ამისა, არ უნდა დაგვავიწყდეს, რომ საუბარია ბიჭზე, რომელიც მხოლოდ 2001 წელსაა დაბადებული. ის ძალიან ახალგაზრდაა, თუმცა სწრაფად გაიზარდა. ჩამოსვლის დღიდან აჩვენა, რომ ძლიერი და გადამწყვეტია ისეთ მნიშვნელოვან ჩემპიონატში, როგორიცაა სერია A“. – განაცხადა დანიელე ადანიმ.
ესპანური მედია კი „ვალენსიას“ კარის დარაჯი გიორგი მამარდაშვილის ჩინებულ თამაშს აღნიშნავს. რომ არა ქართველის ჩინებული გარჯა, ღრმა კრიზისში მყოფი გუნდი სატურნირო ცხრილის უფრო ქვედა ნაწილში აღმოჩნდებოდა.
„ვალენსია“ ესპანეთის „ლა ლიგის“ მეოცე ტურში „ჟირონასთან“ 0:1 დამარცხდა, მაგრამ რომ არა გიორგი მამარდაშვილი უფრო დიდი ანგარიშით წააგებდა.
Superdeporte: „გუნდს სიცოცხლე შეუნარჩუნა და სამი აშკარა გოლისგან გადაარჩინა. ქართველისგან მეტს ვერ მოითხოვ“.
As: „კიდევ ერთხელ საუკეთესო. მან გუნდი პირველ ტაიმში ბევრი გოლისგან გადაარჩინა, გოლის მომენტში კი ვერაფერი შეძლო. პირველი ტაიმის ბოლოს შეცდომაც დაუშვა“.
Eldesmarque: „პირველ ტაიმში სამი შესანიშნავი სეივი ჰქონდა, რამაც გუნდი გადაარჩინა. 45-ე წუთზე დაშვებული შეცდომის მიუხედავად, საუკეთესო იყო. მეორე ტაიმში კიდევ ორჯერ იხსნა გუნდი. გოლის დროს ბურთს შეეხო“.
გუსინ, ინგლისის პრემიერლიგამ ოფიციალური განცხადება გამოაქვეყნა, რომლის მიხედვითაც „მანჩესტერ სიტი“ ფინანსური წესების 100-ზე მეტი დარღვევაში არის დადანაშაულებული.
ლიგის განცხადებით, დარღვევები 2009-10 სეზონიდან 2017-18 სეზონებამდე ყოველ წელს იყო განხორციელებული. ბრალდებების დამტკიცების შემთხვევაში, გუნდს შესაძლოა ქულები დააკლონ ან დააქვეითონ.
ავტორი
