გუშინ, ახლო წარსულში ცნობილმა იტალიელმა ფეხბურთელმა ანტონიო კასანომ „ნაპოლისა“ და „მილანის“ მატჩი შეაფასა:
„მიმდინარე სეზონში პირველი მატჩი იყო, რომელშიც „ნაპოლი“ „ნაპოლი“ არ იყო, „მილანმა“ კი იდეალურად ითამაშა. მათ უკეთ ითამაშეს, უფრო მონდომებული იყვნენ. „მილანი“ ძალიან ზედაპირული გახლდათ, ბევრი შეცდომა დაუშვეს. თუმცა, ეს მხოლოდ ერთი შეფერხებაა რვა თვეში, რაც ნამდვილად შეიძლება მოხდეს. ჩემპიონთა ლიგაზე ეს წაგება „ნაპოლის“ „მილანთან“ მიმართებაში ბევრად მეტ უპირატესობას მისცემს. იქ სხვა თამაში იქნება, „მილანი“ იფიქრებს, რომ „ნაპოლის“ დამარცხება შეუძლია, რეალურად კი სრულიად განსხვავებულ გუნდს დაუპირისპირდება. „ნაპოლი“ სუპერფავორიტი იქნება და ვფიქრობ, როგორც შინ, ისე სტუმრად, მინიმუმ ორბურთიანი სხვაობით მოიგებს“, – განაცხადა ანტონიო კასანომ.
„მილანთან“ „ნაპოლის“ თამაში შეაფასა იტალიელმა ჟურნალისტმა ანტონიო კორბომაც:
„როცა უამრავ შეცდომას უშვებ „მილანის“ დონის გუნდთან, ყველაფერი ისე აღარ მიდის, როგორც გინდოდა. გუნდური თამაში ძალიან ცუდი და მწირი იყო. ამ გუნდს ალბათ აქვს ნაკლი, კერძოდ, ორი ნაკლი: პირველი ის, რომ შეცვლაზე შესულ ფეხბურთელებს ცოტა დრო აქვთ, რადგან შეცვლები დაგვიანებულია, მეორე ის, რომ კვარაცხელიას თუ გააჩერებ, მთელი გუნდიც ჩერდება.
შეიძლებოდა მარიო რუის შეცვლა, მაგრამ მისი შემცვლელი სკამზე არ იყო, პორტუგალიელი კი მოედანზე ყველაზე ცუდი მოთამაშე იყო. „ნაპოლი“ იმდენად ჩავარდა, რომ ძნელია კომენტარის გაკეთებაც“.
გუშინ, ცნობილმა რუსმა მწვრთნელმა იური სიომინმა ხვიჩა კვარაცხელიას შესახებ ისაუბრა:
„მარადონა ამ ასაკში ასე არ თამაშობდა. ის იყო ახალგაზრდა ვარსკვლავი “ბოკაში” და გადავიდა პირველ ევროპულ კლუბ “ბარსელონაში”, იმავე ასაკში კი ხვიჩა “ნაპოლის” შეუერთდა. დიეგოს ორი სეზონი კატალონიაში წარუმატებელი აღმოჩნდა.
მხოლოდ მას შემდეგ გახდა არგენტინელი ისეთი, როგორც ჩვენ ვიცით, რაც „ბარსელონადან“ ნეაპოლში გადავიდა სათამაშოდ. მან იტალიის ჩემპიონობა საერთოდ 26 წლის ასაკში მოიპოვა.
კვარაცხელია კი ბრწყინავს და ჩემპიონის ტიტულს პირველსავე სეზონში ირგუნებს. 22 წელი მას მხოლოდ თებერვალში შეუსრულდა.
ასე რომ, ამ ასაკისა და მდგომარეობისთვის მან მარადონას აჯობა და ეს გადაჭარბებულ ნათქვამად არ მიმაჩნია. ნეაპოლში პოპულარობის მხრივ, ქართველი არგენტინელს მიუახლოვდა. რა თქმა უნდა, ჯერ არ დასწევია, მაგრამ ძალიანაც არ ჩამორჩება.
ახლა, დიდი ალბათობით, ისინი „სერია A“-ს მოიგებენ და როგორც ისინი ასპარეზობენ, ჩემპიონთა ლიგის დაუფლებაც შეუძლიათ. ვფიქრობ, დარჩენილ გუნდებში საუკეთესო სწორედ “ნაპოლია”.
გუშინ, ესპანურმა გამოცემამ „Sport.es“ – საინტერესო ინფორმაცია გაავრცელა. აღმოჩნდა, რომ „სევილიას” იტალიური „ნაპოლის” არგენტინელი თავდამსხმელის, ჯოვანი სიმეონეს შეძენა სურს.
ცნობილი გახდა, რომ „სევილიას“ სპორტული დირექტორი მონჩი, ზაფხულის სატრანსფერო ფანჯრისთვის გუნდის გაძლიერების ვარიანტებს ეძებს, კლუბის არადამაკმაყოფილებელი შედეგების გამო. განსაკუთრებული ყურადღებით ანდალუსიელები სიმეონეს აკვირდებიან, რომელიც მადრიდის „ატლეტიკოს“ მთავარი მწვრთნელის, დიეგო სიმეონეს შვილია.
27 წლის ჯოვანი სიმეონემ მიმდინარე სეზონში „ნაპოლის“ შემადგენლობაში 26 მატჩი ჩაატარა, მოედანზე მხოლოდ 669 წუთი ითამაშა. არგენტინელმა თავდამსხმელმა რვა გოლი გაიტანა. სიმეონეს კონტრაქტი „ვერონასთან,“ საიდანაც ის „ნაპოლიშია“ განათხოვრებული, 2026 წლამდე აკავშირებს.
გუშინ, ბრიტანულ გამოცემას „Daily Mail“, „ლივერპულის“ მთავარი მწვრთნელი, იურგენ კლოპი ესაუბრა.
„გადადგომის არ მეშინია. ჯერჯერობით აქ ვარ გამოსადეგი და უბრალოდ თილისმა არ გახლავართ. იმისათვის ვრჩები, რომ საქმეები დავასრულო. ეს 100 პროცენტით ვიცი.
არ მომწონს რაც ბოლო დროს გუნდში ხდება. მუშაობას ვაგრძელებთ და სწორია თუ არა ჩვენი მიდგომა, ამას მომავალი გვიჩვენებს“, – განაცხადა იურგენ კლოპმა.
ფრანგული გამოცემა „L’Équipe“-ს მტკიცებით, .არგენტინელმა თავდამსხმელმა, ლიონელ მესიმ, შესაძლოა, სეზონის ბოლოს „პარი სენ ჟერმენი“დატოვოს.
არგენტინელს პარიზელთა შემადგენლობაში მხოლოდ იმ შემთხვევაში შეუძლია დარჩეს, თუ ხელფასის შემცირებას დათანხმდება.
მესის მამა და „პსჟ“-ის პრეზიდენტი, ნასერ ალ-ხელაიფი, ცდილობდნენ კონტრაქტის გახანგრძლივების პირობებზე შეთანხმებას, მაგრამ ყოველ ჯერზე ეს საკითხი უფრო და უფრო რთულდებოდა.
ასევე ვრცელდება ინფორმაცია, რომ მესი დაინტერესებულია „ბარსელონაში” დაბრუნების ვარიანტით, მაგრამ ამავდროულად, კატალონიურ კლუბს ჯერ არ გაუკეთებია ოფიციალური შეთავაზება მასთან დაკავშირებით.
ჯამში, ყველაფერი იქითკენ მიდის, რომ მესიმ შეიძლება „პსჟ“ დატოვოს. საქმე ისიცაა, რომ პარიზელებს სპორტული თვალსაზრისითაც კრისი აქვთ. კვირას „პსჟ“ „ლიონთან“ დამარცხდა – 0:1, მესის კი პარიზელმა ფანებმა უსტვინეს.
მიმდინარე სეზონში მესიმ პსჟ-ის შემადგენლობაში 24 მატჩი ჩაატარა ლიგა 1-ში, 13 ბურთი გაიტანა და ამდენივე საგოლე გადაცემა შეასრულა. მას კლუბთან კონტრაქტის ვადა მომავალ ზაფხულს ეწურება.
ავტორი
