გუშინ იტალიურმა გამოცემამ „La Gazzetta dello Sport“ ხვიჩა კვარაცხელიას მორიგი სტატია მიუძღვნა:
„ხვიჩა კვარაცხელიამ ვარჯიშზე შოუს დადგმა კვლავ დაიწყო, იმიტომ რომ ის ასეთია. როდესაც ხედავს, რომ ბურთი მასთან მიგორავს, ბავშვივით უხარია. იმ უნარებით, რაც მას გააჩნია, როდესაც ერთობა და მაღალი დონის ფინტებს ასრულებს, მისი თანაგუნდელებიც კი გაოცებულები რჩებიან. გუნდისთვის, რომელიც თურქეთში შეიკრიბა, საუკეთესო ამბავი ის არის, რომ კვარა დაბრუნდა და მზად არის, რომ გაერთოს. ალბათ არც ის არის დამთხვევა, რომ პირველ სავარჯიშო მატჩში გამარჯვებული სწორედ ის ყვითელი გუნდი გახდა, რომელშიც ხვიჩა თამაშობდა“, – წერია სტატიაში.
გუშინ, ძიუდოს საერთაშორისო ფედერაციამ გურამ თუშიშვილს ძიუდოში საკლუბო ჩემპიონთა ლიგაზე გამოჩენილ ფრანგ ტედი რინერთან გამარჯვება არ ჩაუთვალა.
მეოთხედფინალში თუშიშვილმა ლეგენდარული ტედი რინერი გორში მეოთხედფინალში დაამარცხა, მაგრამ IJF-ის სამსაჯო კომისიამ ქართველს ვაზარი არ ჩაუთვალა.
ძიუდოს საერთაშორისო ფედერაციამ ეს იმით ახსნა, რომ სამსაჯო შეცდომას ჰქონდა ადგილი და თუშიშვილის ვაზარი გაუქმებულია.
ქართულმა კლუბმა „მებრძოლმა“ ფინალში სერბულ „რედ სტარს“ 3:2 სძლია და ტურნირი მოიგო. ძიუდოს საერთაშორისო ფედერაციის გადაწყვეტილება საბოლოო შედეგზე გავლენას არ იქონიებს.
გუშინ, საქართველოს საკალათბურთო ნაკრების მცველმა რატი ანდრონიკაშვილმა ესპანურ „ლიგა ენდესაში“ პირველი შეხვედრა ჩაატარა. ქართველის „მურსია“ სტუმრად თორნიკე შენგელიას ყოფილ გუნდ „ბასკონიას“ დაუპირისპირდა და დიდი ანგარიშით მარცხი იწვნია – 73:102.
რატი თამაშში სათადარიგოთა სკამიდან ჩაერთო და 11:01 წუთში 2 ქულა და 4 გადაცემა მიითვალა. ანდრონიკაშვილმა 3-დან 1 ორქულიანი ჩააგდო, ბურთი ერთხელ დაკარგა და 3 პერსონალური ფოლი მიიღო.
ქართველმა მებრძოლმა რომან დოლიძემ კი UFC-ში რიგით მეშვიდე ბრძოლა ჯეკ ჰერმანსონის წინააღმდეგ გამართა და შვედი მეორე რაუნდში დაამარცხა.
ქართველმა UFC-ში ზედიზედ მესამე გამარჯვება მოიპოვა და დიდი ალბათობით, 2023 წელს რეიტინგში უფრო მაღლა მდგომ მეტოქეებს დაუპირისპირდება.
წარმატებული ბრძოლის შემდეგ მიცემულ ინტერვიუში, დოლიძემ მომავალ სასურველ მეტოქედ ხამზატ ჩიმაევი დაასახელა და ჩეჩენი მებრძოლი ოქტაგონზე გამოიწვია.
„ვინ მსურს მომავალ მეტოქედ? მინდა, ხამზატ ჩიმაევს ვეჩხუბო, მას დიდ პატივს ვცემ, თუ თავად სურვილი ექნება, მზად ვარ“. – განაცხადა რომან დოლიძემ.
გუშინ, რაგბი ევროპის სუპერთასის ნახევარფინალში თბილისის „შავმა ლომმა“ ავჭალის სტადიონზე ესპანური „იბერიანსი“ დაამარცხა – 41:9 და ზედიზედ მეორედ გავიდა ფინალში.
სუპერთასის პირველ გათმაშებაში „შავმა ლომმა ესპანურ „იბერიანსს“ 43:40 სძლია, ამჯერად კი მეტოქემ ქართულ გუნდს ღირსეული წინააღმდეგობა მხოლოდ პირველ ტაიმში გაუწია.
საფრანგეთის სარაგბო „TOP 14“–ის მე-12 ტურში დავით ნინიაშვილისა და ბექა საღინაძის „ლიონი“ სტუმრად „ბაიონას“ დაუპირისპირდა და 7:19 წააგო. სამწუხაროდ, მატჩის მე-10 წუთზე დავით ნინიაშვილმა მოედანი კოჭლობით დატოვა.
ფრანგული მედიის ინფორმაციით, ნინიაშვილმა ტრავმა მიიღო. დავითი ფლეტჩერ სმიტმა შეცვალა. რაც შეეხება ბექა საღინაძეს, მან მოედანზე 55 წუთი გაატარა. იმედია, რომ ნინიაშვილის ტრავმა სერიოზული არ არის და 10 დეკემბერს ჩემპიონთა თასზე მის დებიუტს ვიხილავთ.
ბრაზილიური მედიის ინფორმაციით, 82 წლის „ფეხბურთის მეფე“ პელეს პალიატიურ მკურნალობას უწევენ.
პალიატიური მკურნალობა სამედიცინო მომსახურებაა, რომლითაც რადიკალურად არ უმჯობესდება ქრონიკული, უკურნებელი დაავადების მქონე პაციენტის მდგომარეობა, არ იცვლება არაკეთილსაიმედო პროგნოზი. მისი უმთავრესი მიზანი პაციენტის მდგომარეობის დროებითი შემსუბუქება, მისთვის ტკივილისა და სხვა პათოლოგიური სიმპტომების მოხსნა, სოციალური და ფსიქოლოგიური დახმარებაა.
პელეს მსხვილი ნაწლავის სიმსივნის ოპერაცია 2021 წლის სექტემბერში ჩაუტარდა და მას შემდეგ ქიმიოთერაპიის კურსი უტარდებოდა. მიუხედავად ამისა, პელეს სიმსივნის ახალი კერები აღმოაჩნდა.
ამჟამად პელე სან–პაულუს ჰოსპიტალში იმყოფება, სადაც ხუთი დღის წინ გადაიყვანეს. ამის მიზეზი რესპირატორული ინფექცია გახდა, რომლის მკურნალობა ანტიბიოტიკებით მიმდინარეობს. საავადმყოფოს პერსონალის განცხადების თანახმად, პაციენტი საერთო პალატაშია, მისი მდგომაროება სტაბილურია და კლინიკაში კიდევ რამდენიმე დღეს დაჰყოფს.
გუშინ, პელემ სოციალურ ქსელში პოსტი გამოაქვეყნა და დაამშვიდა ადამიანები, რომლებიც მისი ჯანმრთელობის მდგომარეობის გამო ღელავდნენ.
„ჩემო მეგობრებო, მინდა, ყველამ შეინარჩუნოთ სიმშვიდე და პოზიტიურობა. ძლიერი და იმედით სავსე ვარ, მკურნალობის კურსს მივყვები. მინდა, მადლობა გადავუხადო მთელ სამედიცინო პერსონალს იმ დახმარებისათვის, რაც მივიღე. ღმერთის ძალიან მწამს და ყოველი სიყვარულის მესიჯი, რომელსაც თქვენგან ვიღებ, ენერგიით მავსებს. მსოფლიოს ჩემპიონატზე ბრაზილიის მატჩებს უყურეთ! დიდი მადლობა ყველაფრისთვის“, – დაწერა პელემ საკუთარ ინსტაგრამზე.
ავტორი
