„ხელისუფლებამ არჩევანი უზნეობის სასარგებლოდ გააკეთა. ქვეყანაში სამართლიანობა გაუფასურდა. მიხეილ სააკაშვილის რეპრესიული რეჟიმის დროს უსამართლობის ბურჯები ის მოსამართლეები იყვნენ, რომლებზეც არჩევანი „ქართულმა ოცნებამ“ გააკეთა“, _ აღნიშნა „გურია ნიუსთან“ პოეტმა, საზოგადოებრივი მოძრაობა „დაიცავი საქართველოს“ თავმჯდომარემ დავით მაღრაძემ.
მისივე თქმით, ბიძინა ივანიშვილსა და მიხეილ სააკაშვილს შორის უშინაარსო დაპირისპირება უნდა დასრულდეს.
_ბატონო დავით, „დაიცავი საქართველო“, რომელიც „ნაციონალურ მოძრაობის“ რეჟიმს ებრძოდა, „ოცნების“ ხელისუფლებაში მოსვლიდან მეშვიდე წლისთავზე აქტიურდება, რა არის აღნიშნულის მიზეზი? და ასევე, რამდენად დიდია ალბათობა იმისა, რომ მოძრაობაში გაერთიანებული „ოცნებიდან დემარშით წასული დეპუტატები ეკა ბესელია, ლევან გოგიჩაიშვილი, გედევან ფოფხაძე და სხვანი ვიხილოთ?
_ მოსახლეობას ახსოვს საზოგადოებრივი მოძრაობა „დაიცავი საქართველო“, რომელმაც სააკაშვილის რეპრესიული ხელისუფლების სახლში გაშვებაში გადამწყვეტი როლი შეასრულა. ახლა ორგანიზაციის განახლების საჭიროება დავინახეთ. მნიშვნელოვანია, რომ „დაიცავი საქართველოში“ ბევრი სათანადო კვალიფიკაციის, ენერგიისა და ერუდიციის მქონე ახალგაზრდა გავაერთიანოთ. ეკა ბესელია, ლევან გოგიჩაიშვილი და გედევან ფოფხაძე აღნიშნული ორგანიზაციის სათავეებთან თავიდანვე იდგნენ და ორგანიზაციას შემოუერთდებიან თუ არა, ეს მათი გადასაწყვეტია. კარი ჩაკეტილი არავისთვის გვაქვს. ჩვენთვის მთავარია, რომ საქართველოში ორპოლუსიანობა, ბიძინა ივანიშვილსა და მიხეილ სააკაშვილს შორის უშინაარსო დაპირისპირება უნდა დასრულდეს.
_ საპრეზიდენტო არჩევნებამდე თქვენ „ქართული ოცნების“ გულმხურვალე მხარდამჭერი იყავით. არჩევნების შემდეგ, რატომ გაიყო თქვენი და მმართველი პარტიის გზები?
_ ხელისუფლებამ არჩევანი უზნეობის სასარგებლოდ გააკეთა. ქვეყანაში სამართლიანობა გაუფასურდა. მიხეილ სააკაშვილის რეპრესიული რეჟიმის დროს უსამართლობის ბურჯები ის მოსამართლეები იყვნენ, რომლებზეც არჩევანი „ქართულმა ოცნებამ“ გააკეთა. მიხეილ სააკაშვილისა და ბიძინა ივანიშვილის დაპირისპირება შინაარსისგან დაიცალა. საქართველო ამ უშინაარსო ორპოლუსიანი დაპირისპირებისგან უნდა გათავისუფლდეს.
_ ქვეყნის ორი მთავარი პარტიისთვის პოლიტიკური პაექრობის გამოცხადება ნიშნავს იმას, რომ “ქართული ოცნებას“ პოლიტიკური წონით „ნაციონალურ მოძრაობასთან“ აიგივებთ?
_“ქართულ ოცნებასა“ და „ნაციონალურ მოძრაობას“ პოლიტიკური წონით ერთმანეთს არ შევადარებ, რადგან მიხეილ სააკაშვილის რეჟიმი, „ქართული ოცნებისგან“ განსხვავებით, რეპრესიული მანქანა იყო. ამ ყველაფრის მიუხედავად, ჩანს, რომ მმართველმა პარტიამ არჩევანი უზნეობის სასარგებლოდ გააკეთა. ყველას კარგად უნდა ესმოდეს, რომ წინა რეჟიმის მსხვერპლები ლევან მუსურიძე და მიხეილ ჩინჩალაძე კი არა, სანდრო გირგვლიანი და ბუტა რობაქიძე იყვნენ. იმისთვის, რომ საზოგადოებას შორის ეროვნული თანხმობა მიღწეული იყოს, სამკვდრო-სასიცოცხლო დაპირისპირება პოლიტიკურ პაექრობაში უნდა გადაიზარდოს. საქართველოში გაკერპებული ჰყავთ, როგორც სააკაშვილი, ისე ივანიშვილი. ჩვენი ქვეყანა კერპთაყვანისმცემლობისგან აუცილებლად უნდა გათავისუფლდეს.
_ დღეს არსებულ პარტიათაგან რომელიმეს საზოგადოებრივი მოძრაობა „დაიცავი საქართველო“ 2020 წლის საპარლამენტო არჩევნებში მხარს დაუჭერს? თუ პოლიტიკაში მესამე ძალის არარსებობის ფონზე, საპარლამენტო არჩევნებში მონაწილეობას თავად აპირებთ?
_არჩევნებში მონაწილეობას არ ვაპირებ. წინა რეჟიმის გასტუმრების შემდეგ, ჩემს მეგობრებთან ერთად საზოგადოებაში დავრჩი და ახლაც ასე იქნება. ჩვენ პოლიტიკურ პარტიად არ გარდავიქმნებით. ამ ეტაპზე არ არსებობს პარტია, რომელსაც 2020 წლის საპარლამენტო არჩევნებში მხარს დავუჭერთ. შევეცდებით, საზოგადოებისთვის მისაღები პარტიის შექმნას ხელი თავად შევუწყოთ.
