მასწავლებლის ეროვნული ჯილდოს პირველი მფლობელი, სამოქალაქო განათლების მასწავლებელი, ლადო აფხაზავა 5 ივლისს და მის შემდგომ განვითარებულ მოვლენებს ეხმაურება. აფხაზავა ფიქრობს, რომ მომხდარ ძალადობაზე პასუხისმგებლობა ხელისუფლებას ეკისრება და ხელისუფლების მხრიდან მედიაზე შეტევა დემოკრატიაზე შეტევაა. მისი თქმით, ძალადობა სწორედ, ხელისუფლებამ წაახალისა.
ამ თემებზე აფხაზავამ “ბათუმელებთან” ინტერვიუში ისაუბრა.
“სამწუხაროდ, ხელისუფლებამ წაახალისა ეს აგრესია. ძალიან ბევრი დაუსაქმებელი ახალგაზრდაა, რომელიც არ მუშაობს, ვერ რეალიზდება, ვერც აღიარება დაინახეს რაიმე საქმეში, ვერ შედგა და ამიტომ იქ იპოვეს თავიანთი ადგილი, სადაც ძალადობრივი ნაპერწკლები გაჩნდა. ამის გამო ვიღაცამ შეაქო. სხვადასხვა მოძალადე ადამიანის ვიდეოებს ვუსმენდი და იქ ისეთ თემებზეა საუბრობენ, არც კი უკვირდებიან რას საუბრობენ, რას ლაპარაკობენ.
აი მაგალითად, ჩვენ ვაჟკაცები, ჩვენ ქართველები და ასე შემდეგ. ვაჟკაცობა იმას კი არ ნიშნავს, რომ ქალს ხელი დაარტყა ან თუნდაც კაცს”,– თქვა ლადო აფხაზვამ.
ლადო აფხაზავა ასევე პრემიერ-მინისტრის პასუხისმგებლობაზეც საუბრობს და ამბობს, რომ ახლა “საქართველოს პრემიერ-მინისტრი არ ჰყავს”. როგორც ის აღნიშნავს, პედაგოგი ახალ პრემიერს ელოდება, რომელიც სიტუაციას “უფრო დაამშვიდებს”.
“მე ველოდები ახალ პრემიერს, რომელიც უფრო დაამშვიდებს სიტუაციას, რომლისთვისაც მთავარი იქნება ადამიანების სიყვარული და თუ ქრისტიანი იქნება, ღმერთის სიყვარული. ამიტომ, მე ვფიქრობ, რომ საქართველოს პრემიერ-მინისტრი არ ჰყავს და ველოდები.
ჩვენ გვჭირდება პრემიერი, რომელსაც ექნება ადამიანური ღირებულებები. შეეშალოს თუნდაც საუბარში, თუნდაც ქოხში ცხოვრობდეს, ოღონდ ადამიანებზე იზრუნოს. ასეთ პრემიერს ველოდები”, _ თქვა აფხაზავამ.
“ბათუმელებთან” ინტერვიუში პედაგოგი ასევე განათლების პრობლემასა და ღირებულებებზე საუბრობს. მისი თქმით, ძალადობის პრევენციაზე მასწავლებლებმაც უნდა იზრუნონ და პედაგოგებმა ბავშვებს უნარ-ჩვევები და დამოკიდებულებები უნდა შეუცვალონ.
