ოზურგეთელ მოზაიკოს ლალი თავართქილაძეს, რომელიც პროფესიით მედიკოსია და თავის თავს „თვითნასწვლ-ღვთითნასწავლ“ ხელოვანს უწოდებს, კარგად იცნობს ჩვენი მკითხველი. ოზურგეთში, მთელ საქართველოში, ასევე არაერთ თვალსაჩინო ადგილზე თუ მეგობრების ოჯახებში, ბევრგან არის არის მისი მოზაიკაში გაცოცხლებული ნამუშევრები.
ახლახან ლალი თავართქილაძე, საერთაშორის პროექტში : „ყველანი ერთად მსოფლიოში ბავშვთა შიმშილის დასამარცხებლად“, აქტიური მონაწილეობისთვის, ორი სპეციალური დიპლომით დააჯილდოვეს.
მისი, როგორც მოზაიკოსი ხელოვანის თვალსაწიერი ძალიან არაორდინალური და ფართოა.
პროექტის დამაარსებელია ფონდი “კონინი”, ბავშვთა სოლიდარობის ფონდი, რომელიც არგენტინაში შეიქმნა. მან სახელოვნებო გზით, ბავშვთა დასაცავად და დასახმარებლად გააერთიანა მსოფლიო ხელოვანები. პროექტის მოთხოვნაა, მოზაიკურ პანოზე ფიგურირებდეს ბავშვის ხელები. მათ ლოგოზეც ბავშვის ხელებია.
პროექტში გაერთიანებულია 5 კონტინენტის 61 ქვეყანა.
_ საქართველოში, სამწუხაროდ, მოზაიკის ოსტატები უკვე აღარ არიან, მე ღვთის განგებულებით ვმუშაობ. ზოგადად ვიყენებ შერეულ ტექნიკას: მოზაიკას, ასევე ზღვის ნიჟარებს, ბიჟუტერიას, ძველ ნივთებს. მოზაიკის მასალა მამაჩემისგან შემომრჩა, ის მრავალმხრივ განვითარებული ადამიანი იყო – ექიმი, არქიტექტორი, მხატვარი, მოზაიკოსი. ამ საერთაშორისო პროექტს ვახორციელებ ოზურგეთსა და ურეკში. მიხარია, რომ ჩემი პანოებით, ჩემი სამშობლო საქართველო, ჩემი შესაძლებლობის ფარგლებში, გავაცანი მსოფლიოს, ამ პროექტის მონაწილეებს და ყურადრების ცენტრში მოექცა, _ ამბობს ქალბატონი ლალი.
„გურია ნიუსი“ ულოცავს მეგობარ ქალბატონს, მრავალმხრივ ნიჭიერ ხელოვანს, ლალი თავართქილაძეს წარმატებას. ვუსურვებთ კვლავ მრავალ გამარჯვებას.
ავტორი: მარინა ჩიხლაძე
