ლანჩხუთის საკრებულოს წევრი ადამ ხუხუნაიშვილი, რომელიც, ამავდროულად, ლანჩხუთელ ბავშვებს ჭადრაკში ამეცადინებს, ადგილობრივ ხელისუფლებას შენობის პრობლემის გადაჭრის თხოვნით მიმართავს.
გასული წლის მიწურულს ლანჩხუთში ჭადრაკის სახლს ხანძარი გაუჩნდა და დაიწვა, აქაური მოჭადრაკეები, ფაქტობრივად, ღია ცის ქვეშ დარჩნენ. ახალა კი, როგორც თავად ამბობენ, ასე გაგრძელება უკვე შეუძლებელია, რადგან მეცადინეობების ჩასატარებლად მოსწავლეების ოჯახებში უწევთ სიარული.
მართალია, ჭადრაკის სახლის შენობა მანამდეც ვერ იყო მთლად სახარბიელო მდგომარეობაში და ზამთრობით მეცადინეობების ჩატარება ცენტრალური ბიბლიოთეკაში უხდებოდათ, თუმცა, ტურნირების ჩასატარებლად მაინც იყენებდნენ.
„ლანჩხუთში 10 ბავშვი გვყავს ფიდეს რეიტინგოსანი. სულ კი 70 მოსწავლე გვყავს, აქედან, 40 სისტემატურად ვარჯიშობს. ბავშვებს სახლებში ვაკითხავთ და ისე ვატარებთ მეცადინეობებს. ბოლოს ტურნირი რომ ჩაგვეტარებინა, სპორტული ცენტრის დირექტორმა საამისოდ თავისი კაბინეტი დაგვითმო. იმედია, ერთხელ და სამუდამოდ, შენობის საკითხი დადებითად გადაწყდება და შეგვექმნება პირობები, რომ მეცადინეობები და ტურნირები შესაფერის გარემოში ჩავატაროთ, ასე გაგრძელება უკვე შეუძლებელია“, _ ამბობს ადამ ხუხუნაიშვილი.
როგორც ირკვევა, ლანჩხუთელი მოჭადრაკეები ნინოშვილის ქუჩაზე მდებარე ერთ-ერთი უსახური შენობით არიან დაინტერესებულები, სადაც წლების წინ მეთესლეობის ინსპექცია იყო განთავსებული. ახლა ეს შენობა სარგებლობის უფლებით სატყეო სააგენტოს აქვს მიკუთვნებული.
აღნიშნული შენობის მოჭადრაკეებისთვის გადაცემას საკრებულოს წევრთა ნაწილიც ეთანხმება და ამბობს, რომ დასმულია საკითხი, რომ ეს უფუნქციოდ დარჩენილი შენობა მუნიციპალიტეტის ბალანსზე გადმოვიდეს, ჩაუტარდეს რეაბილიტაცია და აქ ჭადრაკის სახლი განთავსდეს.
მუნიციპალიტეტის გამგებლის ზაზა ურუშაძეს მოსაზრებით, უმჯობესია მოჭადრაკეებმა დროებით დაქირავებულ ფართში დაიდონ ბინა, რადგან უახლოს თვეებში ლანჩხუთში უნდა დაიწყოს სპორტული ცენტრის მშენებლობა, სადაც, ასევე, გამოყოფილი იქნება ოთახები ჭადრაკის მეცადინეობების ჩასატარებლადაც.
„როცა ეს სპორტული ცენტრი აშენდება, იქ ჭადრაკისთვის რამდენიმე ოთახი იქნება გამოყოფილი, საკმაოდ მაღალ დონეზე აღჭურვილი, საერთაშორისო ტურნირების ჩატარების შესაძლებლობა იქნება. ახალი შენობის გარემონტებისთვის ხარჯების გაწევას, ჯობია, დროებით, დარბაზის აშენებამდე, მოინახოს გასაქირავებელი ფართი და მე გარანტიას ვიძლევი, რომ მუნიციპალიტეტი ქირის ფულს გადაიხდის“, _ ასეთია გამგებლის პოზიცია.
საკრებულოს წევრების გიორგი ჩახვაძისა და რომან ბიწაძის მოსაზრებით კი, მოჭადრაკეებისთვის შენობის მოძიება სულაც არაა ძნელი საქმე და ქალაქის ცენტრში მდებარე ყოფილი სტამბის შენობისკენ მიუთითებენ, სადაც ახლა „ლანჩხუთის მოამბის “ რედაქციაა განთავსებული.
