ლანჩხუთელი გოგონები საქართველოს თასს მეორედ დაეუფლენ

ლანჩხუთის ქალთა საფეხბურთო გუნდმა დღეს, ქუთაისის ცენტრალურ სტადიონზე, ფინალურ შეხვედრაში, ხობის „კოლხეთი“ 2:1 დაამარცხა და მეორედ გახდა საქართველოს თასის მფლობელი.

მთელი შეხვედრის მანძილზე მოქმედი ჩემპიონები დომინირებდნენ და სრულ უპირატესობას ფლობდნენ.

ანგარიში ხატია ჭყონიამ მე-13 წუთზე გახსნა, რომელიც ხობელებმა პირველივე ტაიმშივე გაქვითეს. 58-ე წუთზე თეონა თოდაძის მიერ შესრულებული ჯარიმის შემდეგ „კოლხეთის“ მცველებმა საკუთარ კარში ჩაჭრეს ბურთი. ამის შემდეგ, მეგრელებს ხიფათი აღარ შეუქმნია, გურულებმა კი რამდენიმე შანსი ვერ გამოიყენეს. საბოლოოდ, 2:1 და „ლანჩხუთი“ საქართველოს თასს მეორედ დაეუფლა.