“2021 წელს დაგეგმილია ნიგვზიანის, ჩოჩხათის, ჯურუყვეთის, ნინოშვილის ადმინისტრაციული ერთეულების ბუნებრივი გაზის საერთო ქსელში ჩართვა“, _ მოსახლეობისთვის ეს დამაიმედებელი ინფორმაცია ლანჩხუთის მერიამ 2020 წლის 17 ნოემბერს გაავრცელა ფეისბუქის საკუთარ გვერდზე.
ასევე, ცენტრალურმა ხელისუფლების მიერ 2021 წლის სექტემბერში გავრცელებულ ოფიციალურ ინფორმაციაში ვკითხულობთ, რომ მოსახლეობის ბუნებრივი გაზით მომარაგების სამწლიან გეგმაში საქართველოს მთავრობის 1716 განკარგულებით ცვლილებები შევიდა, რის თანახმადაც 2022 წელს, სრულად გაზიფიცირდება ოზურგეთის მუნიციპალიტეტის 9, ჩოხატაურის მუნიციპალიტეტის 3 და ლანჩხუთის მუნიციპალიტეტის 16 სოფელი.
“საპროექტო სამუშაოები 2021 წელს დაიწყება, ხოლო სამშენებლო სამუშაოები 2022 წლიდან განხორციელდება შემდეგ სოფლებში:
ოზურგეთის მუნიციპალიტეტის მთისპირის ადმინისტრაციული ერთეულის 3 სოფელი _ მთისპირი, ოქროსქედი, ვანისქედი;
ჯუმათის ადმინისტრაციული ერთეულის 4 სოფელი _ ჯუმათი, ძირიჯუმათი, ბოგილი, იანეთი.
მაკვანეთის თემის სოფ. გოგიეთი და დვაბზუს ნასაკირალი;
ჩოხატაურის მუნიციპალიტეტის საჭამიასერის ადმინისტრაციული ერთეულის 3 სოფელი _ ჩომეთი, კალაგონი, მამულარი;
ლანჩხუთის მუნიციპალიტეტის ნიგვზიანის ადმინისტრაციული ერთეულის 4 სოფელი _ ნიგვზიანი, არჩეული, ჩანჩეთი, ხაჯალია;
ჩოჩხათის ადმინისტრაციული ერთეულის 7 სოფელი _ ჩოჩხათი, გულიანი, კოკათი, მოედანი, შრომისუბანი, ხორეთი, ჯიხანჯირი;
ნინოშვილის ადმინისტრაციული ერთეულის 2 სოფელი _ ნინოშვილი, ყელა;
ჯურუყვეთის ადმინისტრაციული ერთეულის 3 სოფელი _ ჯურუყვეთი, ბაღლეფი, ეწერი“.
ახლა უკვე 2026 წელია და ზემოთ ნახსენები ლანჩხუთის 16 სოფლის მოსახლეობას ისევ აწუხებს კითხვა, როდიდან ექნებათ შესაძლებლობა, რომ მიიღონ ბუნებრივი აირი.
“ვინმეს ხომ არ გაქვთ ინფორმაცია, ჩოჩხათის თემში ბუნებრივი აირი შევა ექსპლუატაციაში თუ მკვდარია ეს თემა? 2024 წელში უნდა დამთავრებულიყო ჩოჩხათში, ხაჯალიასა და მიმდებარე სოფლებში, მაგრამ დღეს 2026 წელი დადგა და მაინც არ არის. იქნებ, გაგვცეთ პასუხი, საერთოდ იგეგმება ბუნებრივი აირის გაშვება?თუ ვერ კეთდება მაგის მიზეზიც გვითხარით!” _ მიმართავს მოსახლეობა ლანჩხუთის მერიას.
თემასთან დაკავშირებით მოსახლეობა სოციალურ ქსელშიც აქტიურობს.
“ყველას დარდად გვაწევს, არც გაზი, არც წყალი სოფელ მოედანში და გზაც ნორმალური არ გვაქვს. წვიმაში ბავშვები “ვალინკებით” ჩადიან გზამდე. რა ხდება? მთიანი აჭარის მივარდნილ სოფელშიც ბეტონის გზაა დაგებული. ეს ჩოჩხათი და სოფელი მოედანი რა დღეშია.
მგონი ჩოჩხათის თემში ყველაფერი მკვდარია მარტო დასანახად და რჩეულებისთვის არის გზა, წყალი და გაზი.
ჩვენ სოფელში არაფერია საერთოდ. გაზის “ტრუბები” ტყუილად გაიყვანეს“, _ წერენ პრობლემებით შეწუხებული მოქალაქეები სოციალურ ქსელში, განსაკუთრებით კი, ჩოჩხათის თემის მოსახლეობა აქტიურობს.
ლანჩხუთის მუნიციპალიტეტში გაზიფიცირების გარეშე დარჩენილი სოფლების საკითხი, მოსახლეობის მომართვის საფუძველზე, საკრებულოს სხდომაზე გააჟღერა “ძლიერი საქართველო-ლელოს” წევრმა გოჩა ჯანაშიამ და მუნიციპალიტეტის მერისგან ითხოვა პასუხი კითხვაზე, თუ რა ხდება ამ კუთხით და რა და როდის იგეგმება პრობლემის გადასაჭრელად.
როგორც ალექსანდრე სარიშვილმა განმარტა, საკითხთან დაკავშირებით მას მუდმივი კომუნიკაცია აქვს შესაბამის უწყებებთან და თებერვლის თვიდან დაგეგმილია კიდეც სარეაბილიტაციო სამუშაოების დაწყება:
“იმ ოთხ თემში, სადაც მოხდა დაქსელვა, მაგრამ არ არის ჩართული, 15 თებერვლისთვის ველოდებით წარმომადგენელს, რომლებიც დაიწყებენ დაზიანებული ობიექტების რეაბილიტაციას. ეს არის საკმაოდ დიდი მონაკვეთები, მათ შორის, ნინოშვილი, სადაც მიმდინარეობს საგზაო ინფრასტრუქტურული სამუშაოები და იქ მთლიან მონაკვეთზე აღებულია გაზიფიცირების დაქსელვა. ასევე, დაქსელვა აღებულია სუფსა–ჩოჩხათის დამაკავშირებელ მონაკვეთზეც. პირველ რიგში, მოხდება ამ მონაკვეთების რეაბილიტაცია და აღდგენა. თუმცა, მიდის მუშაობა, როგორც “სოკარის” წარმომადგენლებთან, ასევე, ტრანსპორტირების კომპანიასთან, რომ ნიგვზიანისა და ჯურუყვეთის თემებში დაიწყოს გაზიფიცირების სამუშაოები, ჩოჩხათსა და ნინოშვილის თემში კი დააგვიანდება. მე მუდმივი კომუნიკაცია მაქვს შესაბამის სამსახურებთან ამ თემასთან დაკავშირებით“, _ ამბობს სარიშვილი.
ავტორი
