უკვე გადაწყვეტილი ამბავია, რომ ექსპრემიერის _ გიორგი გახარია პარტიას ლანჩხუთში მერობის კანდიდატად ელგუჯა კალანდარიშვილს წარადგენს, რომელიც წლების განმავლობაში ჯანდაცვის რეგულირების სააგენტოში მაღალ თანამდებობებს იკავებდა. ეს რომ დანამდვილებით ასეა, „გურია ნიუსთან“ საუბარში თავად კალანდარიშვილმა დაადასტურა.
რაც შეეხება საკრებულოს თავმჯდომარეობის კანდიდატს პარტიიდან, ჩვენი რესპონდენტი ამბობს, რომ ამასთან დაკავშირებით, ჯერჯერობით, გადაწყვეტილება არაა მიღებული.
„ჯერ არაა გადაწყვეტილი, ვთათბირობთ ადგილობრივებთან“, _ ამბობს კალანდარიშილი.
პარტიამ ლანჩხუთში უკვე გახსნა ოფისი და შტაბის ხელმძღვანელად დავით დობორჯგინიძე დანიშნა, რომელიც, ამავდროულად, ჯურუყვეთი-ლესის მაჟორიტარულ უბანზე პარტია საქართველოსთვის“ მაჟორიტარობის კანდიდატიც იქნება.
„დავით დობორჯგინიძესთან დაკავშირებით მე მივიღე გადაწყვეტილება, იგი საარჩევნო შტაბსაც უხელმძღვანელებს და მაჟორიტარობის კანდიდატიც იქნება ჯურუყვეთი-ლესის მაჟორიტარულ უბანზე. ვგეგმავთ ცხრავე მაჟორიტარულ უბანზე გვყავდეს ჩვენი კანდიდატი. მიმდინარეობს მოლაპარაკებები გარკვეულ პიროვნებებთან. გვინდა, რომ ყველა სოფელში გვყავდეს მაჟორიტარი“.
იყო საუბრები, რომ გახარიას გუნდში ექს-გამგებლის ზაზა ურუშაძის ძმაც მოიაზრებოდა მერობის ერთ-ერთ კანდიდატთან. ამ ფაქტს თავის დროზე „გურია ნიუსთან“ საუბარში თავად ელგუჯა კალადარიშვილიც ადასტურებდა. თუმცა, ამჯერად, როგორც კალანდარიშვილის კომენტარიდან ჩანს, შეთანხმება ვერ შედგა.
„არა, ზაზა ურუშაძის ძმა არ იქნება ჩვენთან. რაც შეეხება ზაზა ურუშაძის გუნდს, საერთოდ ყავს კი მას გუნდი?!მე, პირადად, არანაირი კავშირი არ მაქვს მასთან და არც პარტიას“, _ გვითხრა კალანდარიშვილმა.
როგორც ჩვენთვის ცნობილია, ლანჩხუთში ოპოზიციური პარტიები წინა საარჩევნოდ გაერთიანებას აპირებენ და კონსულტაციებიც აქვთ დაწყებული, როგორც მერობის, ასევე, სოფლებში მაჟორიტარების საერთო კანდიდატების შესაჯერებლად. ამასთან დაკავშირებით კითხვით ელგუჯა კალანდარიშვილსაც მივმართეთ _ გეგმავს თუ არა პარტია „საქართველოსთვის“ ოპოზიციურ ერთობასთან რაიმე სახის თანამშრომლობას.
„ჯერ ეს საკითხი არ გაგვივლია ჩვენს ხელმძღვანელობასთან. გამომდინარე იქედან, როგორი საჭიროება და აუცილებლობა იქნება, იმის შესაბამისად ვიმოქმედებთ და მათთან შეთანხმებით გადავწყვეტთ ადგილზე“, _ ამბობს პარტია საქართველოსთვის მერობის კანდიდატი.
[sexy_author_bio]
