2019 წლის 14 იანვარს, “ქართული თეატრის დღეს”, ლანჩხუთელი თეატრალები პარიზში შეხვდებიან.
თეატრმა პარიზში გამგზავრება საკუთარი შემონატანებით დააფინანსა. უკვე გადაწყვეტილი საქმეა, რომ ლანჩხუთის ეგნატე ნინოშვილის სახელობის სახალხო თეატრი პარიზელი მაყურებლის წინაშე დავით წერეთლის რეჟისორობით დადგმული სპექტაკლით _ “დაარქვი, რაც გინდა” _ წარდგება. ეს იქნება ლანჩხუთის ეგნატე ნინოშვილის სახელობის სახალხო თეატრისა და 2017 წელს თამარ ლოჩოშვილის მიერ პარიზში დაარსებული ქართული თეატრალური ასოციაციის “TAM-ART”-ის პირველი ერთობლივი ნამუშევრის წარდგენა ფრანგი მაყურებლის წინაშე.
გარდა ამისა, ახლო მომავალში ლანჩხუთის სახალხო თეატრი მიწვეულია მცხეთაში, ლვოვში, ტრაპიზონსა და თურქეთის სხვადასხვა ქალაქში. მანამდე კი ლანჩხუთის ნინოშვილის სახალხო თეატრი გეგმავს საახალწლოდ გამართოს “თეატრალური კვირეული”, რომელიც მიეძღვნება ქართული კინოსა და თეატრის ბრწყინვალე მსახიობის, რეჟისორის, ხელოვნების დამსახურებული მოღვაწის _ ვარლამ (ვალოდია) წულაძის 110 წლის იუბილეს.
როგორც ირკვევა, ლანჩხუთის თეატრმა ცოტა ხნის წინ მნიშვნელოვან წარმატებას მიაღწია საერთაშორისო თეატრალურ ფესტივალ “თეატრონზე”, რომელშიც მეზობელი ქვეყნების შემოქმედი კოლექტივებიც მონაწილეობდნენ _ ფესტივალი საერთაშორისო საქველმოქმედო ახალგაზრდული ცენტრი “არტ-ფესტის’’ ორგანიზებით საქართველოში ყოველწლიურად იმართება და მიზნად ფოლკლორისა და ტურიზმის განვითარებისთვის ხელის შეწყობას ისახავს.
წლევანდელ თეატრალურ ფესტივალს აჭარამ უმასპინძლა. ლანჩხუთელები ფესტივალზე კოსტუმირებული სპექტაკლით “ტომი და ჯერით” წარსდგა, რომელიც მოგვითხრობს კონფლიქტური სიყვარულის ამბავს კეთილი დასასრულით. აღმოჩნდა, რომ ლანჩხუთელთა სპექტაკლმა საკმაო მოწონება დაიმსახურა და შედეგად გამარჯვება მოიპოვა ყველა ნომინაციაში.
საბოლოოდ, ჟიურის გადაწყვეტილებით, ლანჩხუთის ეგნატე ნინოშვილის სახელობის სახალხო თეატრს გადაეცა გამარჯვებულის დიპლომი. ნომინაციაში საუკეთესო რეჟისორი დაჯილდოვდა დავით წერეთელი; საუკეთესო მოძრაობა (ქორეოგრაფია) _ ირაკლი ჩახვაძე; საუკეთესო მხატვრობა (სცენოგრაფია) _ შოთა ჭყონია; ნომინაციაში საუკეთესო პლასტიკა დაჯილდოვდნენ მსახიობები: გურამ იმნაძე, ბაჩი ხუხუნაიშვილი, ქრისტინა ლორია, ანა ურუშაძე, ირაკლი კალანდარიშვილი.
