როგორც მოსალოდნელი იყო, არგენტინელმა ლეო მესიმ „ოქროს ბურთი“ კარიერაში მერვედ მოიგო და საკუთარი რეკორდი კიდევ უფრო გააუმჯობესა.
2023 წელს მესის გარდა, ხუთეულში მოხვდნენ ერლინგ ჰოლანდი, კილიან მბაპე, კევინ დე ბრუინი და როდრი.
ქალთა შორის „ოქროს ბურთს“ „ბარსელონას“ და ესპანეთის ნაკრების ნახევარმცველი აიტანა ბონმატი დაეუფლა.
ხვიჩა კვარაცხელიამ „ოქროს ბურთის“ გამოკითხვაში მე-17 ადგილი დაიკავა და ისეთ ფეხბურთელებს აჯობა, როგორებიც ჰარი კეინი, ჯამალ მუსიალა, ბუკაიო საკა, ჯუდ ბელინგემი და სხვები არიან.
ინგლისის ნაკრების ყოფილი ვარსკვლავი და მაიამის „ინტერის“ თანამფლობელი, დევიდ ბექჰემი, ლეო მესის მიერ 2023 წლის „ოქროს ბურთის“ მოპოვებას შემდეგნაირად გამოეხმაურა.
„განსაკუთრებით სასიამოვნოა იმის თქმა, რომ ის მაიამის „ინტერის“ ფეხბურთელია და ჩვენს ქალაქშია. ლეო თავისებურად აღნიშნავს ამ წარმატებას თანაგუნდელებთან და ოჯახთან ერთად. ჩვენ კი ყველაფერს გავაკეთებთ იმისათვის, რომ დავაფასოთ ისე როგორც ამას მაიამიში აკეთებენ. დარწმუნებული ვარ, ჩვენ შეგვიძლია კარგი წვეულება მოვუწყოთ“, – განაცხადა დევით ბექჰემმა.
გასულ წელს მესიმ არგენტინის ნაკრებთან ერთად 2022 წლის ყატარის მსოფლიო ჩემპიონატი მოიგო. ის ფინალის და მთელი ტურნირის საუკეთესო მოთამაშედ აღიარეს. მუნდიალის 7 მატჩში მან 7 გოლი გაიტანა და 3 საგოლე გადაცემა შეასრულა.
მესისთვის ეს „ოქროს ბურთი“ მერვე გახლავთ კარიერაში. მანამდე ის მსოფლიოს საუკეთესო ფეხბურთელად 2009, 2010, 2011, 2012, 2015, 2019 და 2021 წლებში აღიარეს.
ლიონელ მესიმ „ოქროს ბურთის“ მოგების შემდეგ კომენტარი გააკეთა და ეს ჯილდო დიეგო მარადონას მიუძღვნა.
„მადლობა ყველას. მინდა მადლობა გადავუხადო მათ, ვინც ხმა მომცა. ჯილდოს ვუზიარებ ჩემს თანაგუნდელებს, ეს არის ის, რასაც არგენტინასთან ერთად მივაღწიე. ეს არის საჩუქარი ჩვენი გუნდისთვის და ხალხისთვის. არ მინდა დავივიწყო მბაპე და ჰოლანდი: საოცარი ფეხბურთელები, ისინი ამ ჯილდოს ალბათ მალე მოიგებენ, რადგან იმსახურებენ. აქ ძალიან ბევრი მაღალი კლასის ფეხბურთელია, მრავალი წელია ამ დაჯილდოებაზე ყოფნა მიწევს და ფეხბურთელები იცვლებიან, მაგრამ დონე არასდროს ეცემა.
ამ ჯილდოს დიეგო მარადონა ვუძღვნი, მას დაბადების დღეს უკეთესად ვერ მივულოცავდი. ვერასდროს წარმოვიდგენდი, რომ ყველა ჯილდოს მოვიგებდი, რაზეც ვოცნებობდი. ფეხბურთში ყველაფერი მოვიგე და ეს ძალიან რთულია, თუმცა მსოფლიოს საუკეთესო გუნდებში ვითამაშე და ასე უფრო ადვილია ინდივიდუალური ჯილდოების მოგება. რთული მომენტებიც გამოვიარე, მაგრამ ყოველთვის ვაგრძელებდი ბრძოლას და მადლობა ყველას, ვინც დამეხმარა, რომ არ დავნებებულიყავი. ყველაზე რთული არჩევანი ევროპის დატოვება იყო, მაგრამ ამ გადაწყვეტილებით ძალიან ბედნიერი ვარ. ბექჰემის მსგავსი მშვენიერი ადამიანის გაცნობა დამეხმარა არჩევანის გაკეთებაში. ახლა მხოლოდ ისღა დამრჩენია, რომ მიღწეულით დავტკბე, ფეხბურთში მიუღწეველი არაფერი დამრჩა. არ ვიცი, რამდენი დრო დამრჩა, სხეულს უნდა მივხედო, ვერ გეტყვით, ფეხბურთში როდემდე ვითამაშებ, მაგრამ იმედი მაქვს, კიდევ დიდხანს“, – განაცხადა ლეო მესიმ.
მოსკოვის „ლოკომოტივის“ ყოფილმა მთავარმა მწვრთნელმა, იური სიომინმა კი „ნაპოლის“ ქართველი ფეხბურთელის, ხვიჩა კვარაცხელიას მიერ სამომავლოდ „ოქროს ბურთის“ მოგების პერსპექტივაზე ისაუბრა.
„ხვიჩას ყველაფერი წინ აქვს. მას დიდი პერსპექტივები გააჩნია, ფეხბურთში ბრწყინვალედ შევიდა, თავი გამოიჩინა და ჩემპიონიც გახდა. მაგრამ „ოქროს ბურთის“ მოგება მისთვის ნაადრევია. მომავალში ყველაფერი შეიძლება მოხდეს. ხვიჩა აუცილებლად მიაღწევს წარმატებას“, – ასეთი გახლდათ იური სიომინის მოსაზრება.
პარიზში 2023 წლის „ოქროს ბურთის“ დაჯილდოების ცერემონიალს ხვიჩა კვარაცხელიაც ესწრებოდა, რომელმაც შემდეგი კომენტარიც გააკეთა.
„რა თქმა უნდა, ოცნებებშიც ვერ წარმოვიდგენდი, რომ ერთ დღეს აქ მოსვლა მომიწევდა. ძალიან მოხარული და მადლობელი ვარ აქ ყოფნის გამო. ყველა ფეხბურთელს პატივს ვცემ, ჩემთვის სასიამოვნოა მათთან ერთად ყოფნა, იმიტომ, რომ აქ შესანიშნავი ფეხბურთელები არიან და ბედნიერი ვარ, ამის ნაწილს რომ წარმოვადგენ.
ლეო მესი იმსახურებს „ოქროს ბურთის“ მოგებას. მან მოიგო მსოფლიოს ჩემპიონატი და სიტყვები არ მაქვს იმის აღსაწერად, რაც მან გააკეთა“, – თქვა ხვიჩა კვარაცხელიამ.
ავტორი
