თბილისში, ნოდარ დუმბაძის საერთაშორისო ფონდის დარბაზში, მწერალ ლევან ლორიას წიგნის “ბეღურები ღამით არ დაფრინავენ” წარდგენა გაიმართა.
ჩვენს კითხვაზე თუ რატომ არჩია წიგნის სათაურად “ბეღურები ღამით არ დაფრინავენ” – ლორია გვპასუხობს: _ ეს არის ერთ-ერთი მოთხრობის სახელი. მომწონს მოთხრობაც და სათაურიც, ამიტომ ავარჩიე.
როგორც წიგნის რედაქტორმა მაია მიქაიამ სიტყვით გამოსვლისას აღნიშნა, ლევან ლორია უშუალო მწერალია და ეს ეტყობა მის ნაწარმოებებსაც.
“ლევანი უშუალო ადამიანი და მწერალია. ეს უშუალობა წიგნსაც ყოველთვის ეტყობა, ეტყობა ცოტა გულუბრყვილობაც. დღევანდელი ცხოვრებისთვის შეუფერებელი გულუბრყვილობა გმირებსაც ეტყობათ. იმიტომ რომ მწერალი თავის დიდ ნაწილს დებს ყოველთვის თავის გმირებში, წიგნში და ლევანი ჰგავს ყველა თავის გმირს და ყველა თავის გმირი ჰგავს ლევანს. უფრო მეტსაც გეტყვით, ყოველი წიგნის წარდგენის საღამო ჰგავს ლევანს”,_ აღნიშნა მიქაიამ.
რედაქტორის თქმით, წიგნში შესული მოთხრობების დიდი ნაწილი უკვე იყო დაბეჭდილი სხვადასხვა ლიტერატურულ ჟურნალ-გაზეთში. აქ მოყოლილი ამბები _ ადამიანის ყოველდღიურ ცხოვრებაზე, სიხარულსა თუ ტკივილზე და, რაც მთავარია, სიყვარულზე, გადმოცემულია ხალასი იუმორითა და მასთან გაზავებული ადამიანური სევდით. აქ გაიგებთ იმ ბიჭის ამბავს, რომელიც ბიძასთან ერთად გადახდენილი თავგადასავლების შემდეგ ნანობს, რომ მამას აწყენინა; მასწავლებელზე, რომლის მოსწავლეები ადამიანებს შორის აღმართული სულიერი ბარიკადების სხვადასხვა მხარეს დგანან; კოვიდის ჟამს აღძრული სიყვარულის თუ საკუთარი ქორწილიდან გაქცეული პატარძლის ამბავს; გვიყვება ბუხუტი მასწავლებლზე, რომლის მოსწავლეებიც, დროდადრო კარატე და ფეხბურთი რომ ერთმანეთში ერევათ, სპორტთან ერთად, ცხოვრების გაკვეთილებსაც სწავლობენ; გვაცნობს კახაბერს, რომელიც ტანკით მიდის სატრფოსთან ხელის სათხოვნელად; გვიყვება ამბებს ასტრონომზე, რომელიც პრინცესა თეონას გაღვიძებას შეძლებს და ქვეყანას შვებას მოგვრის; ამბავს უცნაურ თბილისელ გოგოზე, რომელსაც სოფელში, თითქოსდა მითოსიდან გადმოსული ამირანი შეუყვარდება…
“ამ წიგნის სახით თანამედროვე ქართულ ლიტერატურას შეემატება ახალი, ვფიქრობ, განსხვავებული მოთხრობების კრებული, რომელიც ხან ტკბილი და ხან მწარე სიმართლით, მკითხველს დააფიქრებს საკუთარ მოქალაქეობრივ მოვალეობაზე, გახდის უფრო მიმტევებელს, თანაზიარს ზოგადსაკაცობრიო პრობლემების გადაჭრისას. ლევან ლორიას მოთხრობების კრებული, ბეღურები ღამით არ დაფრინავენ, ისეთ მარადიულ ღირებულებებზეა, რაც უათუოდ აღუძრავს სურვილს ყველას, ვინც ამ წიგნს გაეცნობა, თავი იგრძნოს ადამიანად, რომელსაც შეუძლია სულ ცოტათი მაინც უკეთესობისკენ შეცვალოს სამყარო”,_ ამბობს მაია მიქაია.
წიგნის წარდგენის ღონისძიებას ავტორის მეგობრები, კოლეგები და ნათესავები ესწრებოდნენ. თითქმის ყველა მათგანმა თქვა სიტყვა ლევან ლორიას შემოქმედებითი ნიჭის შესახებ, გაიხსენეს სახალისო თუ ცოტა სევდიანი მოგონებებიც.
“უდავოა, რომ ნიჭიერება უპირველეს ყოვლისა, თავისუფლებას ნიშნავს. ამ ნიშნით იკითხება ლევან ლორიას მოთხრობები. თავისუფალი თხრობა, თავისუფალი გარემო, თავისუფალი ხასიათები, თავისუფალი დიალოგები, თავისუფალი მოტივები, თავისუფალი მოტივები, თავისუფალი ფორმა და თავისუფალი თამაში. ლევან ლორიას მოთხრობა – ეს არის თამაში წესების გარეშე. ამიტომ არის ან კარნავალურ ნარატივებში ყველაფერი ყველაფერი მოულოდნელი და არაპროგნოზირებადი,”_ ამბობს ივანე ამირხანაშვილი ლევან ლორიას შემოქმედების შესახებ. აღნიშნული ციტატა წიგნის ყრდაზეცაა დატანილი.
ცნობისთვის, ლევან ლორიას მოთხრობები და ლექსები 2003 წლიდან იბეჭდება ქართულ პერიოდულ პრესაში. ის დაიბადა გურიაში, ამიტომ გასაკვირი არ არის, რომ მის ნაწარმოებებს თან ახლავს გურული იუმორი და სისხარტე. ეს კრებული ავტორის მეშვიდე წიგნია. აქამდე გამოქვეყნებული აქვს ერთი პოეტური, ოთხი მოთხრობების კრებული და ერთი რომანი. არის “ოდეონის”, “ლილეს”, ჟურნალ “განთიადის”, გოდერძი ჩოხელის და რევაზ ინანიშვილის ლიტერატურული კონკურსების პრიზიორი და ლაურეატი. აგრეთვე “წეროს” და პენ-მარათონის ფინალისტი. კულტურის, სპორტისა და ახალგაზრდობის სამინისტროს მიერ განხორციელებული პროექტის – “ცოცხალი წიგნების” წევრი.
ავტორი
