ლიეტუვის პარლამენტის საგარეო ურთიერთობათა კომიტეტმა ბელარუსში ჩატარებულ არჩევნებს გაყალბებული უწოდა და მოუწოდა ქვეყნის ხელისუფლებას, ალექსანდრე ლუკაშენკო ბელარუსის ლეგიტიმურ პრეზიდენტად არ ცნოს. ამის შესახებ ინფორმაციას Delfi ავრცელებს.
როგორც გამოცემა წერს, ლიეტუვამ, ბელარუსში ხელახალი არჩევნების ჩატარება მოითხოვა.
„ამ განცხადებას ყველა პარტია ეთანხმება. მოვუწოდებთ სხვა დემოკრატიული ქვეყნების პარლამენტებს, დააფიქსირონ ასეთივე პოზიცია და ევროკავშირთან ერთად ბელარუსში არჩევნების ხელახლა ჩატარება მოვითხოვოთ“, – განაცხადა საგარეო ურთიერთობათა კომიტეტის წევრმა ჟიგიმანტას პავილიონისმა.
გამოცემა ,,delfis” -ის ინფორმაციით, საგარეო კომიტეტმა ბელარუსის ხელისუფლებას, ოპოზიციისა და სამოქალაქო საზოგადოების წარმომადგენელთა გათავისუფლება მოთხოვა.
ასევე, კომიტეტმა ლუკაშენკოს მშვიდობიანი მომიტინგეების წინააღმდეგ ძალის გამოყენების შეწყვეტისკენ, სიტყვის თავისუფლებისა და სხვა სამოქალაქო უფლებების დაცვისკენ მოუწოდა.
როგორც გამოცემა წერს, კომიტეტი, ასევე მოუწოდებს ლიეტუვის მთავრობას, ბელარუსს სანქციები დაუწესოს. ბელარუსის საკითხთან დაკავშირებით ლიეტუვის პარლამენტი რიგგარეშე სესიაზე იმსჯელებს.
ბელარუსში საპრეზიდენტო არჩევნები 9 აგვისტოს გაიმართა. ბელარუსის ცენტრალური საარჩევნო კომისიის მონაცემებით, ქვეყნის საპრეზიდენტო არჩევნებში ალექსანდრე ლუკაშენკოს ამომრჩეველთა 80.23%-მა დაუჭირა მხარი, ხოლო მის მთავარ მეტოქეს, სვეტლანა ტიხანოვსკაიას – 9.9%-მა.
ბელარუსში სამართალდამცველებმა საპრეზიდენტო არჩევნების წინასწარი შედეგების გამოცხადების შემდეგ ქუჩაში გასული დემონსტრანტების წინააღმდეგ წყლის ჭავლი და ხმოვანი ყუმბარები გამოიყენეს. ქვეყნის მასშტაბით დემონსტრანტებსა და სამართალდამცველებს შორის შეტაკებებს ჰქონდა ადგილი. საპროტესტო აქციების მსვლელობისას სამართალდამცველებმა დაახლოებით 3 ათასზე მეტი ადამიანი დააკავეს. შსს-ს განცხადებით, მინსკში საპროტესტო აქციის ერთი მონაწილე დაიღუპა.
