საქართველოს ეროვნული გუნდის თავდამსხმელი გიორგი შერმადინის „ტენერიფე“ ევროპის ჩემპიონთა ლიგის ფინალში გავიდა. ქართველის კლუბმა ნახევარფინალური შეხვედრა „ჰაპოელის“ წინააღმდეგ ჩაატარა და იმარჯვა – 78:71.
შერმადინმა მოედანზე 22 წუთი და 19 წამი გაატარა. მის ანგარიშზე 14 ქულა, 7 მოხსნა და 1 ჩაჭრაა. ფინალურ შეხვედრაში „ტენერიფეს“ მეტოქე ესპანური „მანრესა“ იქნება. შეხვედრა დღეს, თბილისის დროით, 23:00 -ზე გაიმართება. საკალათბურთო ჩემპიონთა ლიგის ფინალურ სტადიას ქალაქი ბილბაო მასპინძლობს.
გუშინ ცნობილი გახდა რომ საქართველოს ნაკრების თავდამსხმელი თორნიკე შენგელია, მომავალი სეზონიდან ესპანურ „ბარსელონაში“ არ იასპარეზებს და დიდი ალბათობით კარიერას კვლავ იტალიურ „ვირტუსში“ გააგრძელებს.
გამოცემა „TuttoSport“-ის ინფორმაციით, „ბარსელონასა“ და შენგელიას შორის არსებულ შეთანხმებას გასააქტიურებლად ბოლო ვადა ჰქონდა და კატალონიელებმა გარიგების გაოფიციალურებაზე უარი განაცხადეს. კლუბის დირექტორთა საბჭომ შენგელიას გაფორმებაზე უარი ფინანსური საკითხების გამო თქვა.
იტალიური გუნდის მიზანი ევროლიგაში მოხვედრაა და ლიდერების გაშვებას არ აპირებს. „ვირტუსი“ მზადაა, შენგელიას ახალი წინადადებით მიმართოს და ხელფასის სახით, სეზონში 1.8 მილიონი ევრო შესთავაზოს. ქართველი კალათბურთელის პოზიცია ჯერჯერობით უცნობია და ბევრი რამ უახლოეს დღეებში გაირკვევა.
მომავალ კვირაში, ჩოგბურთში, „რომის მასტერსი“ გაიმართება, რომლის ძირითადი ბადის წილისყრა უკვე შედგა და ნიკოლოზ ბასილაშვილის პირველი მეტოქის ვინაობაც გაირკვა.
მსოფლიო რეიტინგის 27-ე ჩოგანი ბასილაშვილი, საწყის ეტაპზე 36-ე ჩოგან ბრიტანელ დანიელ ევანსს დაუპირისპირდება. ამ წყვილს შორის გამარჯვებულის მომდევნო მეტოქე კი ლორენცო სონეგოსა და დენის შაპოვალოვს შორის საუკეთესო იქნება.
გუშინ ლონდონის „ჩელსიმ“ დაადასტურა, რომ კლუბი გაიყიდა და მას ახალი მფლობელი ეყოლება. ინგლისური გუნდის ვებ-გვერდმა შემდეგი განცხადება გაავრცელა:
„ჩელსის“ საფეხბურთო კლუბს შეუძლია ოფიციალურად დაადასტუროს, რომ კლუბის შეძენის პირობები მფლობელთა ახალი ჯგუფის მიერ, რომელსაც ხელმძღვანელობენ ტოდ ბოელი („ლოს ანჯელეს დოჯერსის“ თანამფლობელი), „Clearlake Capital“, მარკ უოლტერი და ჰანსიორგ უისისის წინადადებას. მთლიანი ინვესტიციიდან 2,5 მილიარდი ფუნტი მოხმარდება კლუბის წილების შეძენას.
ეს თანხები განთავსდება დიდ ბრიტანეთში გაყინულ საბანკო ანგარიშზე, რათა სრულად გადაირიცხოს საქველმოქმედო საჭიროებებისთვის, რაც დაადასტურა რომან აბრამოვიჩმა. გაყინული ანგარიშიდან თანხების გადარიცხვისთვის დიდი ბრიტანეთის მთავრობის თანხმობა იქნება საჭირო. გარდა ამისა, პოტენციური ახალი მფლობელები განახორციელებენ 1,75 მილიარდ ფუნტის ინვესტიციას კლუბის შემდგომი განვითარებისთვის. ეს მოიცავს ინვესტიციას „სტემფორდ ბრიჯზე“, აკადემიაში, ქალთა გუნდში, „კინგსმიდოუს“ სტადიონში და „ჩელსის“ ფონდის მუდმივ დაფინანსებას. კლუბის გაყიდვა სავარაუდოდ მაისის ბოლოს განხორციელდება, მას შემდეგ რაც ყველა საჭირო თანხმობა იქნება მიღებული“.
სამხრეთ ამერიკაში კი დიდი საფეხბურთო სკანდალი აგორდა. ჩილეს ფეხბურთის ფედერაციამ ფიფა-ს მიმართა და ეკვადორის ნაკრების მსოფლიო ჩემპიონატიდან მოკვეთა მოითხოვა. ჩილელთა მტკიცებით, ეკვადორის ნაცვლად, მსოფლიო პირველობაზე მათ უნდა იასპარეზონ, რადგან ეკვადორელებმა წესები დაარღვიეს.
ჩილეს ფეხბურთის ფედერაციის ვერსიით, ეკვადორის ნაკრების ფეხბურთელი, ბაირონ კასტილიო კოლუმბიელია, რის გამოც სხვა ქვეყნის ნაკრებში თამაშის უფლება არ ჰქონდა. ჩილელებმა ფიფა-ს დოკუმენტებიც წარუდგინეს, რომლებშიც დასტურდება, რომ კასტილიო კოლუმბიაში დაიბადა.
ამ აურზაურის მთავარი გმირი ბაირონ კასტილია ოფიციალურად 23 წლისაა, მაგრამ ჩილეს ფეხბურთის ფედერაციის მიერ მიწოდებულ დოკუმენტებში ნათქვამია, რომ იგი სამი წლით უფროსია და რეალურად 26 წლისაა. ჩილე ითხოვს, რომ ეკვადორმა მსოფლიო ჩემპიონატის შესარჩევი ეტაპის რვა შეხვედრაში, რომლებშიც კასტილიომ მონაწილეობა მიიღო, ეკვადორის ნაკრებს ტექნიკური წაგება ჩაეთვალოს, რის შემდეგაც მუნდიალის საგზურს ჩილე მოიპოვებს.
რასაკვირველია ეკვადორის ფეხბურთის ფედერაციის წარმომადგენლებს ეს ბრალდება უპასუხოდ არ დაუტოვებიათ და ყველაფერს ტყუილი უწოდეს. მათი თქმით, ეს ჩილეს მხრიდან უსუსური მცდელობაა, რომ როგორმე მსოფლიო ჩემპიონატზე ითამაშონ.
ავტორი
