გუშინ იტალიურ მასმედიაში საინტერესო ინფორმაცია გავრცელდა. აღმოჩნდა, რომ არგენტინის ნაკრებისა და „ატლანტა იუნაიტედის“ ნახევარმცველი ტიაგო ალმადა შეიძლება მიმდინარე წლის ზაფხულის სატრანსფერო პერიოდში „ნაპოლიში“ გადავიდეს.
ნეაპოლური კლუბის სპორტულ დირექტორს კრისტიანო ჯუნტოლის 21 წლის ფეხბურთელი ძალიან მოსწონს და მოლაპარაკებები დასკვნით ეტაპზეა.
ტიაგო ალმადა „ველეს სარსფილდის“ აღზრდილია, 2022 წლიდან კი აშშ-ში ასპარეზობს. არგენტინის ნაკრების რიგებში ალმადა მსოფლიოს ჩემპიონი გახდა.
ბრიტანული მედიის მტკიცებით, „ნაპოლის“ მთავარი მწვრთნელი ლუჩანო სპალეტი ლონდონის „ჩელსის“ ინტერესის სფეროშია. „ჩელსის“ სეზონის ბოლომდე ფრენკ ლამპარდი უხელმძღვანელებს, მაგრამ გადაწყვეტილია, რომ ის გუნდს ზაფხულში დატოვებს, შესაბამისად, ლონდონელები ახალ მწვრთნელს ეძებენ.
ბრიტანელი ჟურნალისტები წერენ, რომ მთავარი ფავორიტი იულიან ნაგელსმანია, მაგრამ ის სიაში ერთადერთი არ არის. ლონდონელები სპალეტის მიწვევაზეც სერიოზულად ფიქრობენ.
იტალიელ სპეციალისტს „ნაპოლისთან“ ხელშეკრულება მიმდინარე სეზონის ბოლოს ეწურება, რომლის განახლება კლუბს სურს, მაგრამ ფაქტია, ჯერ ახალი კონტრაქტი არ გაფორმებულა.
გუშინ იტალიურ მასმედიაში საინტერესო ინფორმაცია გავრცელდა – „ნაპოლის“ პრეზიდენტმა აურელიო დე ლაურენტისმა თავდამსხმელი ვიქტორ ოსიმენი 150 მილიონ ევროდ შეაფასა და ნაკლებ ფასად ვერ შეელევა.
მიუხედავად ოსიმენის სამსახურით რამდენიმე მდიდარი ევროპული კლუბის დაინტერესებისა, დე ლაურენტისს უნდა, ნიგერიელი და მისი წარმომადგენლები კონტრაქტის გაგრძელებაში დაარწმუნოს. თავად ვიქტორი თავის ამჟამინდელ გუნდში თავს ბედნიერად გრძნობს და სრულყოფა სურს.
„მანჩესტერ სიტის“ მთავარმა მწვრთნელმა პეპ გვარდიოლამ „ნაპოლის“ შესახებ ისაუბრა:
„როცა ამ შეჯიბრში ისე თამაშობ, როგორც „ნაპოლი“ მთელი სეზონი თამაშობდა, მართლაც შესანიშნავად და ასეთი უპირატესობით უსწრებ „სერია A“-ში „მილანს“, ხალხს სჯეროდა, რომ ჩემპიონთა ლიგაზეც ადვილად აჯობებდა.
„მილანთან“ თამაში, რომელსაც უდიდესი ისტორია აქვს, ჰგავს „ბაიერნთან“ თამაშს. არც კი ვიცი, მათ რამდენი ტიტული აქვთ მუზეუმში. რა თქმა უნდა, შეიძლებოდა ლოზანოზე პენალტის დანიშვნა, რაც გავლენას მოახდენდა მატჩზე, მაგრამ რადგან „ნაპოლიმ“ წააგო, უნდა ვთქვათ, რომ ცუდი გუნდია? არა, ასე არ არის. „ნაპოლი“ იტალიის ჩემპიონი გახდება და მომდევნო სეზონში ისევ ეცდება ჩემპიონთა ლიგაზე წარმატებით ასპარეზობას“, – განაცხადა პეპ გვარდიოლამ.
გუშინ, ბელგიური „სერენის“ ყოფილმა მთავარმა მწვრთნელმა ჟან-ლუი გარსიამ გიორგი მიქაუტაძის ამჟამინდელი ასპარეზობა შეაფასა:.
„სეზონის დასაწყისში ვიწინასწარმეტყველე, რომ 15-20 გოლს გაიტანდა. ჩემთვის გაუგებარი იყო, „მეცმა“ ის „სერენში“ იჯარით როგორ გამოუშვა შეტევაში მათი სირთულეების გათვალისწინებით. ამიტომ, არ მესმოდა, რატომ იყო ეს ფეხბურთელი ჩემთან. ამ ბიჭმა ჩემზე შთაბეჭდილება მაშინვე მოახდინა. ის სტილით ძალიან მაგონებს ჟან-პიერ პაპენს. ჭკვიანურად მოძრაობს, მარჯვენა ფეხით მისი დარტყმა კი თოფიდან გასროლას ჰგავს. ნიჭიერი, ჭკვიანი და შრომისმოყვარეა.
სეზონის დასაწყისში 4-2-3-1 სქემაში მას მარცხენა შემტევად ვათამაშებდი, მაგრამ 4-5 თვე ამ პოზიციაზე ტყუილად დაიკარგა, მიუხედავად იმისა, რომ გოლები მაინც გაჰქონდა. ის საკუთარ თავს ფორვარდის პოზიციაზე სრულად გამოხატავს, მისი ადგილი საჯარიმოშია. ფილიპ გაიოს რომ ვესაუბრე, მაშინვე ვუთხარი, რომ „მეცს“ ეს ბიჭი უნდა დაებრუნებინა, რაც შეიძლება მალე! გიორგი მაღალი ხარისხის ფეხბურთელია, ისევე, როგორც ჯალოუ და მაზიზი, რომლებიც „მეცს“ ასევე „სერენში“ იჯარით ჰყავდა გამოშვებული“.
გიორგი მიქაუტაძე „სერენში“ 2020-2022 წლებში თამაშობდა და ორივე სეზონში გუნდის საუკეთესო ბომბარდირი იყო. მიმდინარე სეზონში ქართველი ფორვარდი 17 გოლით საფრანგეთის „ლიგა 2“-ის საუკეთესო ბომბარდირია.
იტალიურ ფეხბურთში მორიგი „აურზაურია“. „იუვენტუსის“ სარჩელი 15 ქულის დაკლებასთან დაკავშირებით იტალიის ეროვნული ოლიმპიური კომიტეტის სასამართლომ ნაწილობრივ დააკმაყოფილა.
კლუბს 15 ქულა, რომელიც 3 თვის წინ დააკლეს, დაუბრუნდა, მაგრამ დროებით. საქმე თავიდან განსახილველად სააპელაციო სასამართლოს გადაეცა, რომელმაც საბოლოო განაჩენი 30 დღის ვადაში უნდა გამოიტანოს.
შედეგად, საბოლოო განაჩენამდე მაინც, „იუვენტუსს“ 59 ქულა აქვს და სატურნირო ცხრილში მესამე პოზიცია გადავიდა. თუმცა, ტურინულ კლუბს „ნაპოლიმდე“ 16 ქულა აშორებს. სამაგიეროდ, მხოლოდ 2 ქულით ჩამორჩება „ლაციოს“, ხოლო ჩემპიონთა ლიგის ნახევარფინალისტ გუნდებს სოლიდურად უსწრებს: „მილანს“ 6 და „ინტერს“ 8 ქულით.
