ჩემპიონთა ლიგის მეოთხედფინალში ხვიჩა კვარაცხელიას „ნაპოლი“ „მილანს“ დაუპირისპირდება. შვეიცარიის ქალაქ ნიონში ჩატარებული კენჭისყრის შემდეგ „ნაპოლი“ – „მილანის“ მომავალი ორრაუნდიანი დაპირისპირების შესახებ საკუთარი აზრი არაერთმა ფეხბურთის სპეციალისტმა გამოთქვა.
„ნაპოლის“ მთავარი მწვრთნელი ლუჩანო სპალეტი წილისყრის შედეგით უკმაყოფილო გახლდათ:
„ფრანკფურტის „აინტრახტთან“ ძალიან რთული თამაში იყო. როცა ყველა ამბობს, რომ შენ უკვე მომდევნო ეტაპზე ხარ, ფსიქოლოგიურად არახელსაყრელ მდგომარეობაში გაყენებენ და ჩვენთან ეს უკვე გააკეთეს „აინტრახტთან“ მატჩამდე. თუმცა, ადვილი თამაში სულაც არ იყო. გაგვიხარდა, რომ ეს ბარიერი დავძლიეთ, მენტალურად თავისუფლად ვითამაშეთ, მაგრამ ნეაპოლი და ისეთი გულშემატკივარი, როგორც გვყავს, ბევრად მეტს იმსახურებს.
მერჩივნა, რომ იტალიური მეტოქე არ შეგვხვედროდა. უკვე მოვისმინე მოსაზრებები და მხოლოდ ფეხბურთში არაკომპეტენტური ადამიანები საუბრობენ ჩვენთვის კარგ წილისყრაზე, რადგან ჩემპიონთა ლიგა „მილანის“ სახლია, მათ ეს ტურნირი შვიდჯერ მოიგეს და „რეალის“ შემდეგ ეს მეორე შედეგია. საკმარისია ვთქვათ, რომ მათ დირექტორ პაოლო მალდინის მარტოს აქვს ჩემპიონთა ლიგა ხუთჯერ მოგებული.
წინა დღეებში წავიკითხე, რომ „პსჟ“-ს, „მანჩესტერ სიტის“ და მსგავს გუნდებს უჭირთ ამ ტურნირის ფინალში გასვლა, რადგან საჭირო გამოცდილება არ გააჩნიათ. თუ ეს, ასეა, მაშინ უნდა ვთქვათ, რომ „მილანი“ ჩემპიონთა ლიგის ფავორიტია. მათ არა რომელიმე უბრალო კლუბი, არამედ „ტოტენჰემი“ დაამარცხეს. ობიექტურები ვრჩებით! „ბენფიკა“, „მილანი“ და „ინტერი“ ვერ იფიქრებენ, რომ ფინალში არიან? ამის გაკეთება მათაც შეუძლიათ. წონასწორობა უნდა შევინარჩუნოთ, რადგან შედეგი საუბრით არ მიიღწევა.
„მილანის“ წინააღმდეგ 20 დღეში სამჯერ თამაში? ისინი გვიცნობენ და მათ ჩვენ ვიცნობთ, ერთმანეთს ორივე კარგად ვიცნობთ. კრიზისული პერიოდი, რომელიც ყველა გუნდში დგება, გადალახეს. ამ სამ მატჩში ის გაიმარჯვებს, ვინც კონკრეტულ თამაშში უკეთესი იქნება. „მილანი“ ყველა ასპექტით რთული მეტოქეა,“ – განაცხადა ლუჩანო სპალეტიმ.
ჩემპიონთა ლიგის წილისყრა შეაფასა „მილანის“ მთავარმა მწვრთნელმა სტეფანო პიოლიმაც:
„ვარჯიშზე გავიგეთ წილისყრის შედეგი. ნებისმიერი მეტოქე ძალიან რთული იქნებოდა, ჩვენთვის მოტივაციის მომცემი. მეოთხედფინალში ვართ, „მილანი“ ვართ და გვინდა წინ ვიაროთ. „ნაპოლი“ ძლიერია, „სერია A“-ში ჩვენზე უკეთ თამაშობს, მაგრამ ჩემპიონთა ლიგა ჩემპიონთა ლიგაა და „მილანი“ „მილანია“.
მეოთხედფინალში დამსახურებულად ვართ, მოტივაცია და ამბიციები არ გვაკლია, გვინდა მომდევნო ეტაპზე გავიდეთ. სპალეტისთან კარგი ურთიერთობა მაქვს, შესანიშნავი მწვრთნელია. „სერია A“-ს და ჩემპიონთა ლიგას შორის განსხვავება აშკარაა, მაგრამ ჯერ ჩემპიონატის მატჩებზე უნდა ვიფიქროთ. ნეაპოლში უკვე ზეიმობენ? თუმცა, მე მირჩევნია თამაშის შემდეგ ვიზეიმო, ვიდრე მანამდე.
ლეაუ უკეთესია თუ კვარაცხელია? ძნელი სათქმელია, მათ განსხვავებული მახასიათებლები აქვთ. „სერია A“-ს პირველ წრეში ჩვენ ლეაუ არ გვყავდა, მათ – ოსიმენი. ახლა კი კარგი მატჩები იქნება,“ – თქვა სტეფანო პიოლიმ.
„ნაპოლი“ და „მილანი“ ჩემპიონთა ლიგის მეოთხედფინალის წინ 2 აპრილს, „სერია A“-შიც შეხვდებიან. შემდეგ კი, 12 აპრილს („სან სიროზე“) და 18 აპრილს („სტადიო მარადონაზე“) ჩემპიონთა ლიგაზე. თითქმის ორ კვირაში ისინი სამჯერ დაუპირისპირდებიან. საინტერესოა, რომ ნეაპოლელებმა მიმდინარე სეზონში „მილანს“ გასვლაზე მოუგეს – 2:1.
გუშინ, „მილანის“ ყოფილმა ფეხბურთელმა დანიელე დაინომ „ნაპოლისა“ და „მილანის“ გასამართი მატჩის შესახებ ისაუბრა.
„მილანს“ უპირატესობა აქვს, რადგან წყვილის ფავორიტი „ნაპოლია“, რაც მეტოქე გუნდზე ზეწოლას ზრდის. „მილანი“ ჩემპიონთა ლიგაზე სულ სხვა გუნდია“. – განაცხადა დანიელე დაინომ.
ამ მომავალი დაპირისპირების შესახებ ისაუბრა ცნობილმა ფეხბურთის სპეციალისტმა ფაბიო კაპელომაც:
„მილანი“ გამარჯვებას მხოლოდ რაფაელ ლეაოსა და ტეო ერნანდესის ხარჯზე შეძლებს, ორივე ფეხბურთელმა მაქსიმუმი უნდა გაიღოს და გუნდს გამარჯვებისკენ გაუძღვნენ. სხვა შემთხვევაში, „მილანს“ ძალიან გაუჭირდება,“ – ასეთია ფაბიო კაპელოს აზრი.
ავტორი
