იტალიის „ნაპოლი“ ახალი სეზონისათვის მზადებას აგრძელებს და მორიგი ამხანაგური შეხვედრა ჩაატარა. ხვიჩა კვარაცხელიას კლუბი ესპანურ „მალიორკას“ დაუპირისპირდა. მატჩი ფრედ – 1:1 დასრულდა. ხვიჩა კვარაცხელია ძირითადში იყო და 71-ე წუთზე შეცვალეს.
თამაშის შემდეგ ნეაპოლური გუნდის მთავარმა მწვრთნელმა ლუჩანო სპალეტიმ ქართველი შემტევის შესახებ შემდეგი განცხადება გააკეთა:
„ისევე როგორც სხვებმა, ხვიჩა კვარაცხელიამაც საკუთარი თავი კარგად წარმოაჩინა. მან იცის, როგორ აჯობოს მოედანზე მეტოქეს. მართალია, გარკვეულ მომენტებში არ გაუმართლა, მაგრამ მისი საუკეთესო თვისებები ყველამ დავინახეთ“.
სპალეტის გარდა ხვიჩა კვარაცხელიას თამაში იტალიური მასმედიის სხვადასხვა საშუალებებმა განიხილეს.
„ნაპოლის“ ვებ-გვერდმა დაწერა, რომ ქართველმა მცველები მიმოფანტა, 40 მეტრიდან კინაღამ გაიტანა, მოედანზე სხვაობას ქმნის, დაცვას მუდმივად ეხმარება და თავის კრისტალურ ტალანტს აჩვენებს.
გამოცემა „Areanapoli“ აღნიშნავს, რომ დაცვის დახმარებისა და შესანიშნავი ასპარეზობის გამო სპალეტისგან და სათადარიგოთა სკამისგან ხვიჩამ აპლოდისმენტები დაიმსახურა, რადგან მწვრთნელის თქმით, 77 ნომრის ძალისხმევას ძალიან აფასებს, ის შეტევისას ყოველთვის სახიფათოა და ამ ასაკის ასეთი ფეხბურთელის ამ ფასად შეძენა მისასალმებელია.
გამოცემამ „calcionapoli24“ ქართველი კიდევ ერთხელ შეაქო: „ორი დრიბლინგი პირველ სამ წუთში, მაყურებლების ოვაციები. კიდევ ერთი გარღვევის შემდეგ მოედანზე წააქციეს. ის კაშკაშებდა თავის და არა პატინის სტადიონის განათების ფონზე“.
იტალიური სპორტული მასმედიის მტკიცებით, „ნაპოლი“ ახლოსაა „ჩელსიდან“ 27 წლის მეკარე კეპა არისაბალაგა ინათხოვროს. შეთანხმების მიხედვით, ფეხბურთელის ხელფასის სამ მეოთხედს ლონდონელები დაფარავენ, დანარჩენს კი „ნაპოლი“.
კეპა ყველა დროის ყველაზე ძვირადღირებული მეკარეა. ის „ჩელსიმ“ „ბილბაოდან“ 2018 წელს 80 მილიონ ევროდ შეიძინა.
ამასობაში სამხრეთკორეულმა კლუბმა „ჯეონბუკ ჰიუნდაიმ“ თორნიკე ოქრიაშვილთან კონტრაქტი გაწყვიტა. „ჯეონბუკმა“ ოქრიაშვილის ტრანსფერი ოფიციალურად 15 ივლისს გამოაცხადა, დამატებით ჩატარებული სამედიცინო შემოწმების შემდეგ კლუბში განაცხადეს, რომ ტესტების შედეგები არადამაკმაყოფილებელი იყო და 30 წლის ოქრიაშვილთან ხელშეკრულება, ფეხბურთელთან შეთანხმებით, ანულირებულია.
გუშინ ცნობილი გახდა, რომ ბათუმის „დინამოსა“ და საქართველოს ნაკრების ფეხბურთელები, მცველი ირაკლი აზაროვი და ნახევარმცველი ზურიკო დავითაშვილი, კარიერას ბელგრადის „ცრვენა ზვეზდაში“ გააგრძელებენ.
„ცრვენა ზვეზდა“ სერბეთის ერთ-ერთი ყველაზე ტიტულოვანი კლუბია, რომელიც ჩემპიონთა ლიგის მე-3 საკვალიფიკაციო ეტაპზე სომხურ „პიუნიკს“ დაუპირისპირდება.
„Catalunya Ràdio“-ს ინფორმაციით, მომავალ წელს, ზაფხულის სატრანსფერო ფანჯარაზე ლიონელ მესის „ბარსელონაში“ დაბრუნების ალბათობა ძალიან დიდია.
რამდენიმე დღის წინ კატალონიური გუნდის პრეზიდენტმა ჟოან ლაპორტამ დაადასტურა, რომ ისინი არგენტინელის კლუბში დაბრუნებაზე მუშაობენ. მესის „ბარსელონაში“კვლავ ხილვის სურვილი გამოთქვა ასევე ხავიმაც.
მესი მომავალ ზაფხულს თავისუფალი აგენტი გახდება და მას „პსჟ“-ის დატოვება სრულიად უფასოდ შეეძლება.
გუშინ საფრანგეთის კალათბურთის ფედერაციამ ოფიციალურად გამოაცხადა, რომ იმ კალათბურთელებისთვის, რომლებიც რუსულ ან ბელარუსულ კლუბებში თამაშობენ, ეროვნული ნაკრების კარი დახურული იქნება. წესი იმოქმედებს იქამდე, სანამ უკრაინაში ომი არ დასრულდება.
„ფედერალური ბიუროს სხდომაზე გადაწყდა, რომ მოთამაშეებსა და მწვრთნელებს, რომლებმაც კონტრაქტს რუსულ ან ბელარუსულ კლუბებთან გააფორმებენ, საფრანგეთის ნაკრებში მიწვევას ვერ მიიღებენ, სანამ უკრაინაში ომი არ დასრულდება. წესი ასევე გავრცელდება იმ მოთამაშეებზე, რომლებმაც უკვე გააფორმეს ხელშეკრულებები რუსულ ან ბელარუსულ კლუბებთან“, – ნათქვამია ფედერაციის განცხადებაში.
აღსანიშნავია, რომ მანამდე რუსულმა „უნიკსმა“ ფრანგი თავდამსხმელი ლუი ლაბერის დამატების შესახებ გამოაცხადა, მოსკოვის „ცსკა“-მ კი – ლივიო ჟან-შარლის. საფრანგეთის ნაკრების შეკრებაზე, რომელიც მსოფლიოს ჩემპიონატის შესარჩევი ციკლის მორიგი ფანჯრისა (აგვისტოს ბოლოს) და ევრობასკეტისთვის (სექტემბერში) ემზადება, არცერთი მათგანი არ არის გამოძახებული.
საერთაშორისო შეჯიბრებებს რუსეთის და ბელარუსის ნაკრებები მას შემდეგ ჩამოაშორეს, რაც 24 თებერვალს, რუსეთი უკრაინის ტერიტორიაზე შეიჭრა და იქ ფართომასშტაბიანი ომი გააჩაღა, რასაც დიდი მსხვერპლი და ნგრევა მოჰყვა.
ავტორი
