გუშინ ოფიციალურად დადასტურდა რომ საქართველოს ეროვნული გუნდისა და ავსტრიული „ვოლფსბერგის“ 24 წლის მცველი ლუკა ლოჩოშვილი კარიერას იტალიურ „ვერონაში“ გააგრძელებს.
ინფორმაცია ავსტრიული კლუბის პრეზიდენტმა დიტმარ რიგლმა უკვე დაადასტურა.
„ეს ისეთი შემოთავაზება იყო, უარს ვერ ვიტყოდი. ამას გარდა, ჩვენ მიზნად გვქონდა, ლუკა ისე მოგვემზადებინა, რომ შემდეგ სარფიანად გაგვეყიდა“.
საქართველოს ნაკრების მცველი „ვერონას“ მწვრთნელ გაბრიელე ჩოფის პირადი არჩევანია. ის ეძებდა ფეხბურთელს უკანა ხაზის გასამაგრებლად და სწორედ ლოჩოშვილი მოეწონა ყველაზე მეტად.
გუშინ ბრიტანელმა ჟურნალისტმა ბრედ ჯონსმა გაავრცელა ცნობა რომ ფრანგული „მეცის“ ქართველი თავდამსხმელი გიორგი მიქაუტაძე შესაძლოა, ინგლისის ჩემპიონშიპის ბინადარ „ბარნლიში“ გადავიდეს.
ინგლისურ კლუბს ფეხბურთელის მიმართ დაინტერესება აქვს და მას აკვირდება, ჯერჯერობით ფრანგებისთვის ოფიციალური წინადადებით არ მიუმართავთ და ჯერ არ გადაუწყვეტიათ, ამას გააკეთებენ თუ არა. კლუბს ახლო წარსულში ცნობილი ბელგიელი მცველი და „მანჩესტერ სიტის“ კაპიტანი ვენსან კომპანი წვრთნის და მათი მთავარი მიზანი ამ სეზონშივე პრემიერლიგაში უკან დაბრუნებაა.
გუშინ „ნაპოლის“ ახალწვეულმა ხვიჩა კვარაცხელიამ კლუბის ოფიციალურ საიტს ინტერვიუ მისცა:
„საქართველოდან ვარ, ულამაზესი ქვეყნიდან. ბავშვობაში სულ ფეხბურთს ვთამაშობდი, რადგან ძალიან მიყვარს სპორტის ეს სახეობა. 8 წლიდან მოყოლებული მხოლოდ ფეხბურთელობაზე ვფიქრობდი. ფეხბურთი დაუყოვნებლივ გახდა ყველაზე მნიშვნელოვანი რამ ჩემს ცხოვრებაში. მამაჩემი აზერბაიჯანში ცნობილი ფეხბურთელი იყო, თუმცა ფეხბურთის თამაში მის გამო არ დამიწყია – თავად მსურდა. არასდროს დამჭირვებია, რომ ვინმეს ჩემთვის ეთხოვა, ივარჯიშეო.
შვებულებას ყოველთვის ჩემს ოჯახთან ვატარებ, საქართველოში. ორი ძმა მყავს, ჩემზე უფროსი და უმცროსი. უმცროსი 12 წლის არის და ის ძალიან კარგი ფეხბურთელია. როცა საქართველოში ჩავდივარ, მათთან და ჩემს მეგობრებთან დიდ დროს ვატარებ – ზღვაზე, მთებში, უფრო მთებში – საქართველოში ბევრი კარგი ადგილია მთებში სანახავი.
ხანდახან ჩოგბურთს და კალათბურთს ვთამაშობ, მაგრამ ჩემი სიყვარული ფეხბურთია. ჩემთვის ფეხბურთი სამსახური არაა, ის ვნებაა. მეგობრებთან ერთად კალათბურთის თამაში ძალიან მიყვარს. „გოლდენ სტეიტს“ ვგულშემატკივრობ, სტეფ კარის ფანი ვარ.
ფეხბურთის თამაში თბილისის „დინამოში“ დავიწყე, მის აკადემიაში და პირველ გუნდშიც გადავედი. შემდეგ რუსთავში გადავედი, რასაც რუსეთში ტრანსფერი მოჰყვა – ჯერ მოსკოვის „ლოკომოტივში“, შემდეგ ყაზანის „რუბინში“. წლეულს საქართველოში დავბრუნდი, „დინამო“ ბათუმში, ახლა კი ნეაპოლში ვარ”.
უკვე საქართველოში ვიცოდი, რომ ნეაპოლი ლამაზი ქალაქია. იტალიაში პირველად მოვხვდი და აღფრთოვანებული ვარ. ნეაპოლი საოცარია, ხალხს ძალიან უყვარს ფეხბურთი. ტაქსიდანაც კი ჩანდა, როგორ დადის ხალხი ქუჩებში „ნაპოლის“ დროშებით, აქ ფეხბურთი ვნებაა. აქ იმიტომ ვარ, რომ გავიზარდო როგორც ფეხბურთელი და მოვიგო ტიტულები, მინდა კლუბის წარმატებაში ჩემი წვლილი შევიტანო.
ეროვნულ ნაკრებში ვიმყოფებოდი და ამხანაგურ მატჩებში ვმონაწილეობდი. აგენტმა დამირეკა და მითხრა, რომ იყო იტალიაში გადასვლის შესაძლებლობა. ჩემი აგენტი „ნაპოლის“ ორი წლის განმავლობაში ელაპარაკებოდა. „ნაპოლი“ მსოფლიოს ერთ-ერთი მნიშვნელოვანი კლუბია და აქ ყოფნით ბედნიერი ვარ.
ვიცი, რომ ნეაპოლში მაგარი პიცა აქვთ, თუმცა ჯერ არ გამისინჯავს. ვიცი, რომ აქ მარადონა თამაშობდა და ეს ფანტასტიკურია. ჩემთვის აქ თამაში დიდი პატივია. ეს მსოფლიო კლასის კლუბია საოცარი ფანებით. ჩემი სურვილია, მას დავეხმარო წარმატებების მიღწევაში“.
გუშინ ცნობილი გახდა რომ თბილისის „დინამოს“ მცველი ლევან ხარაბაძე კარიერას კვიპროსულ „პაფოსში“ გააგრძელებს. ინფორმაცია ოფიციალურად დადასტურდა. ჯერჯერობით, კონტრაქტის ხანგრძლივობა და ტრანსფერის ფინანსური დეტალები უცნობია.
„პაფოსი“ კვიპროსის ჩემპიონატის უმაღლეს დივიზიონში გამოდის და აღსანიშნავია, რომ კლუბის ტექნიკურ დირექტორად ცოტა ხნის წინ ცნობილი ესპანელი ფეხბურთელი გაისკა მენდიეტა დაინიშნა, ხოლო მთავარი მწვრთნელი მადრიდის რეალისა და ესპანეთის ნაკრების ყოფილი მცველი მიჩელ სალგადოა.
„ბარსელონამ“ კი ახალწვეული რობერტ ლევანდოვსკი ოფიციალურად წარადგინა. პოლონელი ვარსკვლავის პრეზენტაცია „კამპ ნოუზე“ გაიმართა და მას 57 ათასზე მეტი ადამიანი დაესწრო.
33 წლის პოლონელი თავდამსხმელი მოედანზე 9 ნომრიანი მაისურით გავიდა. აღსანიშნავია, რომ გასულ სეზონში „ბარსელონაში“ ამ ნომრით მემფის დეპაი თამაშობდა.
კატალონიურმა კლუბმა მსოფლიო ფეხბურთში ბოლო ათწლეულის ერთ-ერთი საუკეთესო ბომბარდირი მიუნხენის „ბაიერნისგან“ 45 მილიონ ევროდ, ივლისში შეიძინა და პირველად ის მედიას მაიამიში, ამერიკულ ტურნეში ყოფნის დროს წარუდგინა. ლევანდოვსკიმ „ბარსელონასთან“ 4-წლიანი კონტრაქტი გააფორმა, რომელშიც გამოსასყიდ ფასად 500 მილიონი ევრო ჩაიწერა.
ესპანეთის 2021-22 წლების ჩემპიონატი 12 აგვისტოს დაიწყება. „ბარსელონა“ „ლა ლიგის“ პირველ ტურში, 13 აგვისტოს, შინ „რაიო ვალეკანოს“ უმასპინძლებს.
ავტორი
