ფეიერვერკისა და რესპირატორების ყიდვა გაჭირდა. პიროტექნიკის მაღაზიებს საშემოსავლო სამსახური ამოწმებს, რესპირატორების მარაგი კი უცბად ყველგან „ამოიწურა“.
4 დეკემბერს ფეიერვერკები, რომლებსაც აქციის მონაწილეები ისროდნენ, დეფიციტური პროდუქტი გახდა. პიროტექნიკის რამდენიმე მაღაზია დროებით დაიხურა. შემოსავლების სამსახურში აცხადებენ, რომ ეს გეგმური შემოწმებაა და როგორც კი შეამოწმებენ, მაღაზიები ისევ გაიხსნება. ეს შეიძლება ერთ კვირაში მოხდეს, ორში, ერთ თვეში… დამოკიდებულია იმაზე, თუ რამდენად დროულად წარმოადგენენ კომპანიები დოკუმენტებს.
შემოწმების დაწყებიდან მეორე დღეს პრემიერმა ირაკლი კობახიძემ თქვა, რომ 1-27 ნოემბერს პიროტექნიკის გაყიდვა, შარშანდელთან შედარებით, 90%-ით გაიზარდა, ანუ „ვიღაცებმა წინასწარ დაგეგმეს და მოამზადეს“ ძალადობა რუსთაველზეო.
რადიო თავისუფლებამ პიროტექნიკის იმპორტის სტატისტიკა საქართველოს სტატისტიკის ეროვნული სამსახურის მონაცემებით გადაამოწმა. ბოლო მონაცემი აქ 2024 წლის ოქტომბრისაა.
2023 წლის ნოემბერში შემოიტანეს 615 000 დოლარის ღირებულების 115 ტონა პიროტექნიკა. თუ დავიჯერებთ კობახიძის განცხადებას 90%-იან ზრდაზე – 2024 წლის ნოემბრის მოცულობა შეიძლება იყოს დაახლოებით $1.2 მლნ და 218.5 ტონა.
ეს არ არის რეკორდული მაჩვენებელი. სხვადასხვა დროს ამაზე მაღალი რიცხვებიც დაფიქსირებულა, მაგალითად:
- 2023 წლის აგვისტოში – 1.9 მლნ და 237 ტონა;
- 2023 წლის დეკემბერში – 1.8 მლნ და 440 ტონა;
- 2024 წლის აპრილში – 2.2 მლნ და 41 ტონა;
- 2024 წლის აგვისტოში – 1.7 მლნ და 177 ტონა.
კომპანია „სამი ძმა“, რომელიც პიროტექნიკით ვაჭრობს, რადიო თავისუფლებასთან ამბობს, რომ ახლა პიროტექნიკა მათ პროდუქციაში არ არის, თუ რატომ, ამას უკვე აღარ აკონკრეტებს.
მაშინ, როდესაც ახალ წლამდე სამი კვირაა დარჩენილი, ონლაინმაღაზიებში პიროტექნიკაზეც და რესპირატორებზეც მითითებულია: „მარაგი ამოიწურა“.
„შეიძლება კერძო გამყიდველს კიდევ ჰქონდეს შემორჩენილი პიროტექნიკა, მაგრამ მსხვილ მაღაზიებში აღარ არის. რაც ქუჩაში ჯერ კიდევ იყიდება, ეს არის ჩვეულებრივი „ხლაპუშკა“, – ამბობს ჟორჟ ჟამერაშვილი, სამოქალაქო აქტივისტი.
პიროტექნიკის გაყიდვასთან ან ფლობასთან დაკავშირებით კანონში ცვლილება არ შესულა. ოფიციალურად მისი ყიდვაც შესაძლებელია, შემოტანაც და შენახვაც, რეალურად კი, წინა დღეების გამოცდილება აჩვენებს, რომ ოპოზიციური პარტიების ოფისებში, მაგალითად, „დროას“ ოფისში შესულმა პოლიციამ პიროტექნიკა „ნივთმტკიცებად“ ჩათვალა და კონფისკაცია გაუკეთა.
