„გურია ნიუსში“ გამოქვეყნებულ მასალას, თუ რა სავალალო ვითარებაა გურიის მუნიციპალიტეტებში, მათ შორის ლანჩხუთში, საზოგადოებრივი ტუალეტების ინფრასტრუქტურის კუთხით, თემურ ფირცხალაიშვილის სახელობის შემოქმედთა მუზეუმის ხელმძღვანელი დარეჯან ბიწაძე ეხმიანება და გვიყვება, მუზეუმში არსებულ პრობლემაზე.
ირკვევა, რომ მუზეუმის ეზოში მდებარე ხის ტუალეტი, უკვე ისეა მოძველებული, არც კედელი უვარგა და არც იატაკი, წვიმისას კი საერთოდ შეუძლებელია შიგ შესვლა.
მოკლედ, ტუალეტი, რომლითაც შემოქმედთა მუზეუმის თანამშრომლები თუ სხვადასხვა ღონისძიებებზე იქ მისული სტუმრები სარგებლობენ, საკმაოდ ექსტრემალურია, რადგან ვინიცობაა, ტუალეტის იატაკმა წონას ვერ გაუძლო, ფეკალიებში ჩავარდნა გარდაუვალი ფაქტია. კედლები კი, როგორც მუზეუმის დირექტორი, დარეჯან ბიწაძე ამბობს, სუროთი საგანგებოდ აქვს გამაგრებული.
“ტუალეტი კი არა უბორნიაა ეს, ასეთი ბახმაროშიც აღარაა უკვე, არათუ სადმე, რომელიმე დაწესებულებაში,”– აცხადებს ქალბატონი დარეჯანი.
შემოქმედთა მუზეუმი ლანჩხუთში 2011 წელს გაიხსნა პოეტ თემურ ფირცხალაიშვილის სახლში და ეს ხის ტუალეტიც სწორედ მაშინ გაკეთდა.
“მაშინ ეს ტუალეტი “ნაციონალური მოძრაობის” ხელისუფლებამ გააკეთა დაჩქარებულად, სახელდახელოდ, რომ მუზეუმის გახსნისთვის მოსწრებილიყო. მერე მალევე ხელისუფლება შეიცვალა და ახლის გაკეთება აღარ დაცალდათ. ჰოდა, ამდენი წელია ვართ შავ დღეში. წვიმის დროს ტუალეტი წყლით ივსება და შიგ უბრალოდ არ შეისვლება. მერიაში კარგად იციან აქ არსებული პრობლემა და გვითხრეს, ავდარში ნუ მოხვალთ სამსახურშიო. გაგიგიათ ასეთი რამ სადმე?! ტუალეტის კედლები დიქტისაა, დაძველებულია უკვე და რომ არ დაიშალოს, გასამაგრებლად, სურო გავუშვი ზედ. იატაკი ხომ ყანყალებს და ჩავარდნის პირასაა. ახალი ხის ტუალეტი მაინც გაგვიკეთეთ, მეთქი ვითხოვე, პასუხად კი მითხრეს, რომ მაგის გაკეთების უფლება არ აქვთ, – თუ გავაკეთებთ სტანდარტების შესაბამისი უნდა იყოს, თუმცა, საამისო თანხა არ გვაქვსო. აბა, იმის თანხა აქვთ, ბაბი ვსკირკიტაძე რომ ჩამოჰყავთ და ათი ათასობით ლარს იხდიან ერთ კონცერტში?!
არ არის შემოქმედთა მუზეუმი უმოქმედო, არააქტიური მუზეუმი. აქ სისტემატურად ეწყობა სხვადასხვა ღონისძიებები და ხშირი სტუმრიანობა გვაქვს. სირცხვილით სად წავიდეთ არ ვიცით, როცა მოსულ სტუმრებს უწევთ ამ ტუალეტით სარგებლობა. ამ ბოლოს ჰოლანდიიდან გვყავდნენ ვიზიტორები. დავიწვი მათ წინაშე სირცხვილით. კატასტროფულ მდგომარეობაში ვართ, როგორ შეიძლება ასე? მე ამ მთავრობის მხარდამჭერი რომ არ ვარ, მსჯიან ეტყობა. 2019 წლიდან მოყოლებული არაერთხელ მივმართე მერიასა და კულტურის დაწესებულებათა გაერთიანებას, რომ პრობლემა მოეგვარებინათ, მაგრამ უშედეგოდ… ახლა 2024 წელია და ყველაფერი ისევ ძველებურადაა. ყოფილი პრემიერის, ირაკლი ღარიბაშვილის აზრით, ჩვენს ქვეყანაში ეკონომიკა ყვავის, მაგრამ, რატომღაც ეს აყვავება არანაირად არ აისახა ჩვენს მუზეუმზე და განსაკუთრებით იქ მდებარე ხის ტუალეტზე,“– უკმაყოფილებას ვერ მალავს შემოქმედთა მუზეუმის ხელმძღვანელი.
ამავდროულად ბიწაძე მიიჩნევს, რომ ადგილობრივი ხელისუფლების მხრიდან მიზანმიმართულად ხდება, როგორც პირადად მისი, ისე შემოქმედთა მუზეუმის უგულვებელყოფა.
“ვერავინ დამარწმუნებს რომ ვერ გააკეთეს, უბრალოდ შეგნებულად არ გააკეთეს. ჰოდა, მითხრან მაინც, თუ ვინ ავალებს მერიას პირადად ჩემი და შემოქმედთა მუზეუმის ასე დასჯას, როცა ამდენი წელია ვითხოვ ამ პრობლემის მოგვარებას?! არაერთი განცხადება მაქვს შეტანილი მერიასა თუ კულტურის დაწესებულებათა გაერთიანებაში, რომ მუზეუმში ტუალეტი მოაწესრიგონ. ხელფასზე აღარაფერს ვამბობ, ვიცი რომ დამსაჯეს და წამართვეს. მაინტერესებს ვინ მებრძვის? გამცეს მერიამ ამაზე პასუხი საჯაროდ, პრესის საშუალებით,”– ამბობს დარეჯან ბიწაძე, რომლის ინფორმაციითაც, მისი სახელფასო ანაზღაურება 50 ლარით ნაკლებია დანარჩენი მუზეუმების ხელმძღვანელთა ხელფასზე –“ხელფასზეც 50 ლარი დამაკლეს, დანარჩენი მუზეუმების ხელმძღვანელებთან შედარებით. როცა მოვიკითხე მერის მოადგილესთან, ეკატერინე გუჯაბიძესთან, მითხრა, რომ პრესტიჟულობის მიხედვით განისაზღვრა. მასე თუა, მეც ვარ პრესტიჟული, ქართული კულტურის ამაგდარი ვარ, 50 ლარიდან 20 ლარი მაინც ხომ მერგება? ის 30 ლარი იყოს ხელისუფლებისკენ.
თავიდან არაფერს ვამბობდი ამ 50 ლარით ნაკლებ ხელფასზე, ვფიქრობდი, იქნებ სანაცვლოდ ტუალეტი მაინც გამიკეთონო, მაგრამ არც ტუალეტი გაკეთდა და არც ხელფასი მომიმატეს, სხვებისგან განსხვავებით. ჰოდა, მეც ამოვიღე ხმა და 22 დეკემბერს შევიტანე მერიაში განაცხადი, რომ სხვა მუზეუმების დირექტორების ანაზღაურებას გაუთანაბრონ ჩემი ხელფასი, მაგრამ ამ დრომდე არანაირი პასუხი არ მაქვს, არც კულტურის გაერთიანებიდან და არც მერიიდან“.
იმის გასარკვევად რა გეგმები აქვს ლანჩხუთის მერიას შემოქმედთა მუზეუმში ტუალეტის პრობლემის მოსაგვარებლად, უწყების პიარს მაკა სულაბერიძეს მივმართეთ და ვთხოვეთ, რომ პასუხი პარასკევს, 16 თებერვლის დღის ბოლომდე მოეწოდებინა, თუმცა დაპირების მიუხედავად, მერიისგან პასუხი არ მიგვიღია.
ამის შემდეგ მერის მოადგილეს, ეკატერინე გუჯაბიძეს დავეკონტაქტეთ, რადგან სწორედ რომ მერიის მისამართით იყო დარეჯან ბიწაძის მხრიდან გაჟღერებული პრეტენზიები და პასუხის საჯაროდ გაცემასაც მათგან ითხოვდა.
თუმცა, მერის მოადგილემ ჩვენთან საუბარი არ ისურვა და კულტურის დაწესებულებათა გაერთიანების ხელმძღვანელობასთან გადაგვამისამართა.
„ქალბატონ დარეჯანს ყავს ხელმძღვანელობა კულტურის დაწესებულებათა გაერთიანების სახით, სადაც საქმის კურსში არიან. მე მეტს არანაირ კომენტარს არ გავაკეთებ, მათ დაეკონტაქტეთ. ბოდიშით, კარგად ბრძანდებოდეთ!“-დაგვემშვიდობა ქალბატონი ეკა.
ავტორი
