დღეს ჩვენი “სიკეთისფერი მოძღვრის, მამა თომას გარდაცვალებიდან 40 დღე გავიდა.
ამ 40 დღის განმავლობაში არ შეწყვეტილა მამა თომასთან გამოსათხოვარი თუ მოსაგონარი პოსტების გამოქვეყნება სოციალურ ქსელში. მრევლი, ნაცნობი თუ უცნობი ადამიანები სიყვარულით იხსენებენ უძვირფასეს მოძღვარს.
პოსტს აქვეყნებს ჩოხატაურის ღვთისმშობლის სახელობის სამრევლო სკოლაც. “გურია ნიუსი” ამ პოსტს უცვლელად გთავაზობთ.
“40 დღე გარდაცვალებიდან.
“ჩემს ჩოხატაურში სხვანაირად თენდება”, _ ამბობდა მამა თომა, უყვარდა ყველა და ყველაფერი, ასეთი სიყვარულის ძირები მის სამყაროში იყო, “არსებაგრძელი სიკეთის” სამყაროში. სიყვარულის სიბრძნის კარს უხსნიდა მოყვასის გულს და შინდაბრუნებულ უძღებ შვილად აქცევდა, სჯეროდა დაცემულის აღდგენის, ბოროტების სიკეთედ გადაქცევისა და სინათლის სამსახურში ჩაყენების, ამ რწმენას გამოხატავდა თითოეული მისი სიტყვა, ფიქრი, საქმე…ყველაფერს მარადიულობის თვალსაზრისით უყურებდა, არაფერს ანაწევრებდა, პატარა საგანსაც კი არ უშვებდა თავის გარშემო შეუყვარებლად, როცა ყველასა და ყველაფერს გულის ძილით ეძინა.
დარჩა ყველგან მისი სიცოცხლე, ყველგან, სადაც ცხოვრობდა, სადაც მოღვაწეობდა, ყველგან შეიძლება მისი სულის სიდიადის დანახვა, იმ სულის, რომელიც დარდობდა სიკეთისა და რწმენის დაცოტავებაზე, ღმერთის მაუწყებელი წილის დაშრეტაზე ადამიანში.
მიუყვებოდა ვარდის ფურცლებით მოფენილ უკანასკნელ გზას სიყვარულისფერი მოძღვარი და თან მიჰქონდა “ზღვიერი”ცრემლი.” ჩვენ ხომ ყველას ჩვენი სევდისფერების ქვეყანა გვაქვს”, ჩვენებური ცრემლებით ვეთხოვებოდით.იყო წამიერი შეყოვნებაც ტკივილიანი ფიქრის, ყოფის აუტანელ სიმძიმესა და აბსურდულობაზე, მაგრამ თქვენი ღირსეულად განვლილი სიცოცხლე, ადამიანად ყოფნის ნამდვილ მნიშვნელობას გვაგრძნობინებდა.
მაინც როგორ დაიტიეთ ამდენი ადამიანის სიყვარული, როგორ ჩასახლდით თითოეულ სულში, რომ მთელი ჩოხატაური თქვენს ჭირისუფლად ვთვლიდით თავს, ყველას მოგვიკვდი, მამა თომა, თითოეული ერთი ცრემლით მეტი ვიყავით საკუთარ თავზე.
ამ დღეს ისეთი სიკვდილის აუცილებლობის რწმენა აღდგა, რომელიც სიცოცხლეს ალამაზებს, ადამიანს შიშისა და მარტოობისაგან იფარავს, ანუგეშებს, ხვედრს უმსუბუქებს, იმ უსახელო სინათლესა და სითბოს უგზავნის, გარდაცვლილთა და ცოცხალთა სამყაროს რომ აერთიანებს, უძირო რწმენით ავსებს.
ღვთისადმი კრძალვით მიძღვნილმა სიცოცხლემ მადლობა უთხრა უფალს…მამა თომა, ისე ლამაზად იცხოვრეთ, მზის ჩასვლას ჰგავდა თქვენი სიკვდილი…
“დედამიწა სიყვარულს უჭირავს”, თქვენნაირი ადამიანების სიყვარულს, ღამღამობით კი თქვენს საფლავთან დღით მოწყენილი სულები ვთბებით.
გვიყვარხარ, მამა თომა და გვენატრებით, _ წერს სამრევლო სკოლა ფეისბუქის საკუთარ გვერდზე.
შეგახსენებთ, რომ ჩოხატაურის საკათედრო ტაძრის წინამძღვარს, დეკანოზი თომას (სიხარულიძე) კორონავირუსი დაუდასტურდა. ის ჯერ ჩოხატაურში, მედალფას კლინიკაში მკურნალობდა, საიდანაც რეფერალურმა სამსახურმა ბათუმში გადაიყვანა. ბოლოს კი თბილისში გადიოდა მკურნალობის კურსს. მამა თომა 21 ივნისს გარდაიცვალა.
