ოფიციალურად დადასტურებულია რომ მომავალი სეზონიდან ლუჩანო სპალეტი „ნაპოლის“ მთავარი მწვრთნელი აღარ იქნება. უკვე რამდენიმე დღეა იტალიურ მასმედიაში სპალეტის შესაძლო შემცვლელების შესახებ არაერთი დაუზუსტებელი ინფორმაცია გავრცელდა. ორი დღის წინ ცნობილი გახდა რომ ხვიჩა კვარაცხელიას მომავალ სეზონში „ატალანტას“ ამჟამინდელი დამრიგებელი ჯან პიერო გასპერინი გაწვრთნიდა.
გათენდა გუშინდელი დილა და აღმოჩნდა რომ ეს ინფორმაციაც სიმართლეს არ შეეფერებოდა.
გამოცემა „La Gazzetta dello Sport“-ის მტკიცებით, ნეაპოლური კლუბის პრეზიდენტი ლაურენტისი მოლაპარაკებებს ესპანელ ლუის ენრიკესა და იტალიელ ანტონიო კონტესთან აწარმოებს, ამ საუბრების ძირითადი მიზანი კი ხვიჩა კვარაცხელიასათვის სპეციალური ტაქტიკური გეგმების შემუშავებაა.
„მოსალოდნელია, რომ სეზონის დასრულების შემდეგ, „ნაპოლიდან“ ლუჩანო სპალეტის წასვლა ოფიციალურად დადასტურდება. ეს მას შემდეგ, რაც მან გუნდს უკანასკნელი 33 წლის განმავლობაში პირველი ტიტული მოაგებინა და თავადაც კარიერაში პირველი სკუდეტო დაისაკუთრა.
„ნაპოლის“ უკვე არაერთი ცნობილი სპეციალისტი დაუკავშირეს, ბოლო ცნობები კი „ბარსელონას“, „რომასა“ და ესპანეთის ნაკრების ყოფილ დამრიგებელ ლუის ენრიკეს უკავშირდება. ის ნეაპოლელებისთვის იდეალური კანდიდატურაა, რადგანაც მისი საყვარელი სქემა 4-3-3 გახლავთ და ბურთის კონტროლის მოტრფიალეა, რაც „ნაპოლის“ მოთამაშეების ხასიათს შეესაბამება.
თუმცა, 53 წლის ესპანელი ერთადერთი კანდიდატი ნამდვილად არაა. მის სერიოზულ კონკურენტად ანტონიო კონტე უნდა მივიჩნიოთ. „ინტერისა“ და „იუვენტუსის“ ყოფილი მთავარი მწვრთნელი მორიგი დანიშვნის მოლოდინშია და ცნობილია, რომ „ნაპოლისადმი“ ინტერესი გააჩნია, მიუხედავად იმისა, რომ ტაქტიკის შეცვლა და ხელფასის დაკლება მოუწევს.
კონტეს ნამდვილად შეუძლია თავისი იდეებისა და მის ხელთ არსებული ფეხბურთელების უნარების შეხამება მოახერხოს. როდესაც გუნდში გყავს კვარაცხელია, რომელსაც საოცარი დრიბლინგი აქვს და მეტოქეთა მოტყუება შეუძლია, 4 მცველითა და თუნდაც 4-2-4 სქემით თამაში არ უნდა იყოს პრობლემა“, – დაწერა „La Gazzetta dello Sport“-მა.
საინტერესოა, რომ ანტონიო კონტეს შესანიშნავი ურთიერთობა აქვს აურელიო დე ლაურენტისთან და ესეცაა, ერთ-ერთ მიზეზი, რომ შესაძლოა გაცილებით ნაკლებსარფიან შეთავაზებას დათანხმდეს. თუკი იტალიელი მწვრთნელი ლონდონის „ტოტენჰემში“ სეზონში 14 მილიონ ევროსა და ამას დამატებული ბონუსებსაც იღებდა, „ნაპოლიში“ მისი სავარაუდო ხელფასი 7 მილიონი ევრო თუ იქნება.
ლუის ენრიკესა და ანტონიო კონტეს გარდა, „ნაპოლის“ სასურველ მწვრთნელთა სიაში ვინჩენცო იტალიანო, რაფა ბენიტესი, ჯან პიერო გასპერინი და იულიან ნაგელსმანი ფიგურირებენ.
გუშინ, ესპანური „ვალენსიას“ ქართველმა მეკარემ საგანგებო განცხადებით მიმართა მადრიდის „რეალის“ ბრაზილიელ ლეგიონერ ვინისიუსს, რომლის გარშემოც ბოლო დღეებია დიდი აჟიოტაჟია ატეხილი, მიზეზი კი, რასისტული შეურაცხყოფაა.
„ყველა ადამიანი არის თანასწორი. ეს ჩემთვის ცხოვრების ყველაზე მთავარი და პირველი წესია, რომელიც მე არასდროს დამირღვევია. ვინისიუს, პატივისცემა ჩემგან და შენს გვერდით ვარ, იმ მომენტში კი მხოლოდ თანაგუნდელის დაცვას და მხარდაჭერას ვცდილობდი, სხვა რაიმე განზრახვა არ მქონია. ფეხბურთში რასიზმის ადგილი არ არის და ამას ყველა და ერთად უნდა ვებრძოლოთ“.
ესპანეთის „ლა ლიგის“ გასულ ტურში „ვალენსიასა“ და „რეალის“ დაპირისპირება სკანდალური გამოდგა. თამაში რამდენიმე წუთით შეწყდა, რადგან ვალენსიელი ქომაგები ვინისიუსს რასისტულ შეურაცხყოფას აყენებდნენ.
მატჩის გაგრძელების შემდეგ, ერთმანეთში უკვე ფეხბურთელები წაკამათდნენ და ინციდენტში მამარდაშვილიც მონაწილეობდა, რომელიც ვინისიუსს მივარდა და მასთან ურთიერთობის გარკვევას ცდილობდა. ყველაფერი ბრაზილიელი ვარსკვლავის გაძევებით დასრულდა, რომელმაც შეხლა-შემოხლისას უგო დუროს სახეში ხელი ჩაარტყა.
იტალიის ფედერალური სააპელაციო სასამართლოს გადაწყვეტილებით ტურინის „იუვენტუსს“ 10 ქულა ჩამოაკლეს. ამ საბოლოო გადაწყვეტილების შემდეგ ტურინულ კლუბს 59 ქულა აქვს და „სერია A“-ში მე-7 პოზიციაზეა ანუ ევროთასების ზონის მიღმა. ჩემპიონთა ლიგის ზონაში კი მის ნაცვლად „მილანი“ შევიდა.
ეს განაჩენი თავიდან გამოიტანეს, რადგან პირველი სასჯელი – 15 ქულის დაკლება, იტალიის ეროვნულმა ოლიმპიურმა კომიტეტმა გააუქმა. თავიდან „იუვენტუსს“ კაპიტალის ხელოვნური მოგებისა და ყალბი ხარჯთაღრიცხვის ბრალდებით იტალიის ფეხბურთის ფედერაციამ სატურნირო ცხრილში 15 ქულა ჩამოაკლო, რაც ტურინული გრანდის ხელმძღვანელობამ გაასაჩივრა.
პროკურორმა „იუვენტუსისთვის“ 11 ქულის დაკლება და კლუბის ხელმძღვანელი პირების 8 თვით მოკვეთა მოითხოვა. სხდომა დახურულ კარს მიღმა მიმდინარეობდა და სასამართლომ თითქმის სრულად დააკმაყოფილა პროკურორის მოთხოვნა.
ცნობილია, რომ უეფა ისედაც აპირებდა „იუვენტუსის“ დასჯას. იტალიური მედიის ცნობით, ტურინულ კლუბს სავარაუდოდ, ერთი წლით ჩამოაშორებდნენ ევროთასებს. ყველაფერი კი მაშინ დაიწყო, როცა „იუვემ“ სუპერლიგის ინიციატორის როლი მოირგო.
თუმცა, ეს ყველაფერი არაა: „იუვენტუსის“ საწინააღმდეგოდ გამოძიება მიმდინარეობს „ხელფასების მანევრის“ საქმეზეც, სადაც განაჩენი ივნისშია მოსალოდნელი. ამ შემთხვევაშიც ტურინულ კლუბს ქულების დაკლება ემუქრება.
ავტორი
