7 მაისს, საფრანგეთში საპრეზიდენტო არჩევნების მეორე ტური გაიმართება. ვინ გაიმარჯვებს? „ახალგაზრდა“, „ასაკოვანი“ მეუღლის „პატრონი“ ემანუელ მაკრონი თუ ამბიციური მარინ ლე პენი?
იმის მიუხედავად, რომ მაკრონის პირადი ცხოვრება მთელ დუნიაზე განსაკუთრებული ქილიკის საგანი გახდა, ფრანგი პოლიტოლოგები 7 მაისს გამარჯვებას მაინც ამ უკანასკნელს უწინასწარმეტყველებენ.
გუშინ კომპანიამ „Opinion Way” საფრანგეთის მასშტაბით მოსახლეობის გამოკითხვა ჩაატარა. აღმოჩნდა რომ ბატონ ემანუელს ხმათა 61 პროცენტი უკვე ჯიბეში უდევს და მარინ ლე პენს მნიშვნელოვნად სჯობნის.
საინტერესოა, რომ წარმატების შემთხვევაში, მაკრონი ქვეყანაში რეფერენდუმის გამართვას აპირებს. ცნობილია, რომ ის ევროკავშირის დაუძინებელი მტერია და ამ კავშირიდან თავისი ქვეყნის გამოყვანა სურს.
ევროკავშირის წინააღმდეგ ილაშქრებს მეორე საპრეზიდენტო კანდიდატი – მარინ ლე პენიც. ქალბატონი მარინი განსაკუთრებით ევროკავშირის მთავარ ფულად ერთეულს – ევროს არ სწყალობს. მართალია, მაკრონის მსგავსად, არჩევნებში საბოლოო გამარჯვების შემთხვევაში საფრანგეთის ევროკავშირიდან გამოყვანას ჯერ არ გეგმავს, მაგრამ ქვეყნის მთელ ტერიტორიაზე ევროს აკრძალვასა და მიმოქცევაში ფრანგული ფრანკის დაბრუნებას აპირებს.
შვიდ მაისამდე რამდენიმე დღეა დარჩენილი. მოვლენებს წინ ნუ გავუსწრებთ. ფაქტი ერთია. რომელმა კანდიდატმაც არ უნდა გაიმარჯვოს, ევროკავშირს და მის ფულად ერთეულს – ევროს საფრანგეთში დიდი დრო არ უწერია.
რამდენიმე დღის წინ, პორტუგალიელმა ნათელმხილველმა მესამე მსოფლიო ომის დაწყების თარიღად 13 მაისი დაასახელა. მისი მტკიცებით, საომარი კონფლიქტი ბირთვული იარაღის გამოყენებით წარიმართება, მასში ჩაბმულნი კი აშშ, ჩინეთი, ჩრდილოეთ კორეა, რუსეთი და სირია აღმოჩნდებიან. კონფლიქტი ოქტომბრის თვემდე გასტანს და ამ საომარ მოქმედებებს მსოფლიოს მოსახლეობაში დიდი მსხვერპლი მოყვება.
ნამდვილად ვერ გეტყვით, რამდენად რეალურია ამ „პროგნოზის“ „პრაქტიკაში განხორციელება“. ჩრდილოეთ კორეა უკან დახევას არ აპირებს და აშშ-ს კვლავინდებურად „ემუქრება“. მართალია დონალდ ტრამპმა დროებით უკან დაიხია და მოვლენების განვითარებას აკვირდება, მაგრამ ჩრდილოეთ კორეელები მაინც არ „წყნარდებიან“.
გუშინ გავრცელდა ცნობა, რომ ოფიციალური ფხენიანი „კაპიტალისტ ამერიკელებს“ ატომური წყალქვეშა ნავი „მიჩიგანის“ განადგურებით დაემუქრა. ინფორმაცია სამხრეთ კორეულმა საინფორმაციო საშუალებებმა გაავრცელეს.
„მიჩიგანი“ ამ დღეებში სამხრეთ კორეულ ნავსადგურ პუსანში იმყოფება და სრულ საბრძოლო მზადყოფნაშია მოყვანილი.
ჩრდილო კორეა ომისთვის ემზადება, ჩინეთი კი მშვიდობისმყოფელის მანტიას ირგებს. გუშინ გაერთიანებული ერების ორგანიზაციის ერთ-ერთ სხდომაზე სიტყვით ჩინეთის სახალხო რესპუბლიკის საგარეო საქმეთა მინისტრი ვან ი გამოვიდა და როგორც ჩრდილოეთ კორეას, ასევე აშშ-ს მოთმინებისაკენ და ერთმანეთში დიალოგის დაწყებისაკენ მოუწოდა.
ვან ი ჩრდილოეთ კორეის ხელისუფლებას ბირთვული იარაღის გამოცდის დაუყოვნებლივ შეწყვეტას სთხოვს, წინააღმდეგ შემთხვევაში სამომავლოდ არადამაკმაყოფილებელ პროგნოზებს აკეთებს და შიშობს რომ მსოფლიო საშიშ სამხედრო კონფლიქტში ჩათრეული აღმოჩნდება.
როდესაც საფრანგეთში საპრეზიდენტო არჩევნების მეორე ტურისთვის ემზადებიან, ჩრდილოეთ კორეაში კი ვითარება დღითი დღე იძაბება, ცნობილი ამერიკელი კინორეჟისორი ოლივერ სტოუნი რუსეთის პრეზიდენტი ვლადიმერ პუტინის შესახებ… მხატვრული ფილმის გადასაღებად ემზადება.
გამოცემა „The Sydney Morning Herald”-ის მტკიცებით, მომავალი კინოსურათის მთავარი მოქმედი გმირი ვლადიმერ პუტინი იქნება. სურათში დიდი ადგილი დაეთმობა მის ბიოგრაფიას, კარიერულ წინსვლას, საგარეო პოლიტიკას, აშშ-თან ურთიერთობას და რასაკვირველია იმ როლს რაც რუსეთმა და მისმა ლიდერმა აშშ-ის ბოლო საპრეზიდენტო არჩევნებში ითამაშეს.
საინტერესოა, რომ ბოლო ორი წლის განმავლობაში ოლივერ სტოუნი პუტინს ოთხჯერ შეხვდა და რუსეთის ლიდერთან საუბარში დიდი დრო გაატარა.
ჯერჯერობით უცნობია ამ სურათის დასახელება და მსოფლიო კინოეკრანებზე მისი გამოსვლის სავარაუდო თარიღი. ასევე, უცნობია იმ კინომსახიობის ვინაობაც რომელიც ვლადიმერ პუტინის როლს განასახიერებს.
