ოზურგეთის მუნიციპალიტეტის საკრებულოს სხდომაზე, დღის წესრიგის დასრულების შემდეგ, ოზურგეთის ალ. წუწუნავას სახელობის თეატრის სამხატვრო ხელმძღვანელმა, ვასო ჩიგოგიძემ ითხოვა, მოესმინათ მისთვის, არც ისე ძნელად თავგასართმევ საქმეებზე, რაც თეატრის თემას ეხებოდა.
_თეატრმა მოახერხა, შვიდი ახალი პრემიერა მოემზადებინა. ვმუშაობთ მერვე პრემიერაზე. ეს უნიკალური შემთხვევაა. ვფიქრობ, ივლისში მაინც, როცა ნოდარ დუმბაძის სახელობის საერთაშორისო ფესტივალის ჩატარებას შევძლებთ და პანდემია ხელს არ შეგვიშლის, უფრო ორგანიზებული უნდა ვიყოთ. მე მინდა, არა მარტო თეატრის გახსნა, არამედ სპექტაკლის ჩვენება. გულისტკივილით უნდა აღვნიშნო, რომ ცივილიზებულ მსოფლიოში ვერსად ვერ ნახავთ, სააფიშო სტენდი არ იყოს. ეს მხოლოდ ჩვენთან არის. ასევე რამდენჯერმე დავსვი საკითხი მემორიალური დაფის შესახებ, სადაც დამსახურებული ადამიანების გვარ-სახელი უნდა განთავსდეს. რა ვქნა, ვიყივლო? მამალი მე არ ვარ, _ თქვა მან.
საკრებულოს წევრმა, ლავრენტი ბიგვავამ პასუხად უთხრა, რომ ინიციატივით უნდა შემოხვიდეთ, საკრებულოს წევრი კი ხართ, თუმცა მაინც საჭიროა ეს პროცედურაო.
საკრებულოს თავმჯდომარის მოადგილემ, გიორგი ღუირჯუმელიძემ აღნიშნა, რომ მემორიალური დაფის გაკეთების წესი მიიღეს ერთ-ერთ სხდომაზე.
_გახორციელებული მე ვერ ვნახე და რა ვიცი, _ უკმაყოფილოდ თქვა ვასო ჩიგოგიძემ.
გიორგი ღურჯუმელიძემ გაიმეორა, რომ ეს წესი მიღებულია.
_თქვენ კი გაქვთ და გექნებათ მხარდაჭერა ამ საკითხზე, _ მიმართა მან ვასო ჩიგოგიძეს.
