„მამუკა ხაზარაძის პოლიტიკაში გამოჩენა ხელისუფლებისთვის კატასტროფის ტოლფასი იქნება“_ გია ხუხაშვილი

„იმ შემთხვევაში, თუ მამუკა ხაზარაძის სახით ახალი პოლიტიკური რესურსი გაჩნდება, ეს ხელისუფლებისთვის კატასტროფის ტოლფასი იქნება“, _ აღნიშნა „გურია ნიუსთან“ პოლიტიკის ექსპერტმა გია ხუხაშვილმა.

ხუხაშვილი ფიქრობს, რომ პოლიტიკაში  მამუკა ხაზარაძის გამოჩენის შანსი მაღალია.  ექსპერტი “თიბისი ბანკის ’’ დამფუძნებლის პოლიტიკური მომავლის ეკა ბესელიას თანამოაზრეებთან დაკავშირებას გამორიცხავს. „მამუკა ხაზარაძიდან  ეკა ბესელიამდე მანძილი ბევრად უფრო დიდია, ვიდრე ხაზარაძიდან ბიძინა ივანიშვილამდე“,_ აღნიშნავს ხუხაშვილი.

_ ბატონო გია, “თიბისი ბანკის“ დამფუძნებელმა მამუკა ხაზარაძემ ბანკში გაწეული 27-წლიანი საქმიანობის შემდეგ და მისმა მოადგილემ ბადრი ჯაფარიძემ “თიბისის“ სამეთვალყურეო საბჭო დატოვეს. მანამდე კი წერილში, რომელიც ხაზარაძემ ბანკის თანამშრომლებს გაუგზავნა, დაადასტურა, რომ ბანკი სახელმწიფო უწყებების მხრიდან უპრეცენდენტო შემოტევისა და წნეხის ქვეშ იმყოფებოდა. როგორ ფიქრობთ, ხაზარაძემ და ჯაფარიძემ ბანკიდან წასვლის გადაწყვეტილება საკუთარი ნებით მიიღეს თუ პოლიტიკური ზეწოლის მსხვერპლნი გახდნენ?

_ მამუკა ხაზარაძის მიერ მიღებულმა გადაწყვეტილებამ საქმესთან დაკავშირებით კითხვის ნიშნების რაოდენობა კიდევ უფრო გაზარდა და დაამძიმა. დღეს მთავარი გლობალური კითხვა ისმის, რა სჭირს და საით მიდის ჩვენი ქვეყანას?! ბუნებრივია, მამუკა ხაზარაძე იძულებული გახდა, საბოლოოდ გაემიჯნა საკუთარი პრობლემები ბანკის პრობლემებისგან. მოგეხსენებათ, ბანკი ძალიან სენსიტიური სისტემაა, რომელიც ნებისმიერი ტიპის რყევებზე ფაქიზად რეაგირებს. პროცესს, რომელიც მამუკა ხაზარაძესთან და მის მოადგილესთან დაკავშირებით წარიმართა, შესაძლოა, ბანკისა და მთლიანად ფინანსური სისტემის სტაბილურობისთვის შეექმნა საფრთხე. ფაქტია, რომ ხაზარაძის წასვლა აქციონერთა კრებაზე გადაწყდა. „თიბისი ბანკის“ დამფუძნებლისა და მისი მოადგილის შესახებ აღნიშნული საქმის ამოქექვას რომ პოლიტიკური საფუძველი აქვს, ყველასთვის გასაგებია.

_ იმ შემთხვევაში, თუ მამუკა ხაზარაძემ საკუთარი მომავალი პოლიტიკას დაუკავშირა, რისი შანსი ბანკიდან წასვლის შემდეგ კიდევ უფრო გაიზარდა, მისი პარტია „ქართულ ოცნებაზე“ ანგარიშგასაწევი ძალა იქნება?

_შანსი იმისა, რომ  მამუკა ხაზარაძე პოლიტიკისკენ გადაიხაროს, გაიზარდა, თუმცა აღნიშნული შედარებით გრძელ პროცესებს უკავშირდება. თუ ხაზარაძე პოლიტიკაში მოვიდა, მისი პარტია  ანგარიშგასაწევი ძალა ნამდვილად იქნება, მაგრამ განა იმიტომ, რომ ის განსაკუთრებული პოლიტიკური ფიგურაა, არამედ იმიტომ, რომ ხელისუფლებას ელექტორალური ბაზა აღარ აქვს. იმ შემთხვევაში, თუ მამუკა ხაზარაძის სახით ახალი პოლიტიკური რესურსი გაჩნდება, რა თქმა უნდა, ხელისუფლებისთვის ეს კატასტროფის ტოლფასი იქნება, მით უფრო, როცა ხელისუფლების სურვილი, პოლიტიკურ ბაზარზე  „ნაციონალური მოძრაობის“ შენარჩუნება და ალტერნატიული ძალების გამოჩენისთვის ხელის შეშლაა.

_თუკი მამუკა ხაზარაძეს პოლიტიკაში წასვლა აქვს გადაწყვეტილი, იმ ფონზე, როცა „ქართლი ოცნება“ საკონსტიტუციო უმრავლესობასა და ამომრჩევლის კეთილგანწყობას ნელ-ნელა კარგავს, შეიძლება ითქვას, რომ მან აღნიშნულის განსახორციელებლად პოლიტიკურად მომგებიანი დრო შეარჩია. ვივარაუდოთ, რომ ეკა ბესელიას თანამოაზრეთა გუნდი, რომლებიც მმართველ პარტიას, სავარაუდოდ, გამოეყოფა, პოლიტიკურ მომავალს მამუკა ხაზარაძეს დაუკავშირებს?

_ ვფიქრობ, რომ მამუკა ხაზარაძიდან  ეკა ბესელიამდე ბევრად უფრო დიდი მანძილია, ვიდრე ხაზარაძიდან ბიძინა ივანიშვილამდე, ამით ყველაფერი ნათქვამია.  

_ პოლიტიკოსთა ნაწილი „თიბისი ბანკის“ ირგვლივ განვითარებულ მოვლენებს  „ქართული ოცნების“ ლიდერის, ბიძინა ივანიშვილის კერძო ინტერესებს უკავშირებს.  მათი თქმით, ივანიშვილის მიზანი ბანკის ხელში ჩაგდება და ანაკლიის პორტის მშენებლობის შეჩერებაა. აღნიშნულ საქმეში ივანიშვილის შესაძლო ინტერესებზე ეჭვს აჩენს შემდეგი გარემოება, პროკურატურამ გამოძიება, ბანკის მიერ 2007-2008 წლებში განხორციელებულ ტრანზაქციებზე, უკანონო შემოსავლის ლეგალიზაციის ფაქტზე გამოძიება მას შემდეგ დაიწყო, რაც ბიძინა ივანიშვილმა მამუკა ხაზარაძის მიმართ უკმაყოფილება საჯაროდ გამოხატა. როგორ ფიქრობთ, ივანიშვილს სურს, ანაკლიის პროექტის განხორციელებას ხელი შეუშალოს?

_ ეს პოლიტიკური ბრალდებებია და დაბეჯითებით რაიმეს მტკიცება რთული იქნება. საერთოდ, ანაკლიის პორტის საკითხი მრავალწახნაგიანი საკითხია. მისი მიზანშეწონილობა ჩემთვის ბოლომდე გასაგები არ არის, ჩემთვის საერთოდ გაუგებარია, რატომ მოხდა ამ პროექტის ინიცირება. შესაძლოა, ვიღაცას სურს, რომ ანაკლიის პორტის პროექტი “დაითრიოს“ და ვიღაც ჩაანაცვლოს, რაც პროცესის მიმდინარეობის დროს კარგად გამოჩნდება.