გუშინ ბელგიურ გამოცემა „RTBF“-ს, საქართველოს ნაკრებისა და კლუბი „სერენის“ თავდამსხმელი გიორგი მიქაუტაძის თანაგუნდელი იუსეფ მაზიზი ესაუბრა და ქართველი შემტევი ტკბილი სიტყვებით მოიხსენია.
„ჯორჯიელი ჟორჟი კარგი ახალგაზრდა ფეხბურთელია, მას უდიდესი ნიჭი აქვს. დარწმუნებული ვარ, ადრე თუ გვიან, დიდ წარმატებას მიაღწევს! აქ ცოტა ხნის წინ დაბრუნდა და ლიგაში უკვე 5 გოლის გატანა მოასწრო. მე და ჟორჟი მოედანზე ერთმანეთს კარგად ვუგებთ, კომუნიკაცია ჩვენ შორის ადვილად დგება და თამაშის დროს ერთმანეთს ხშირად ვუყურებთ. მიზეზი კი ის არის, რომ ორივეს მსგავსი საფეხბურთო გემოვნება გვაქვს. ბავშვობიდან მარტივი ფეხბურთი მომწონდა, ისეთი, როგორსაც ზიდანი, რონალდინიო და მესი თამაშობდნენ”, – განაცხადა ფრანგმა.
პორტუგალიის პრემიერ ლიგის გუნდის, „ჟილ ვისენტეს“ მთავარმა მწვრთნელმა რიკარდუ სუარეშმა კი ქართველი ნახევარმცველის, გიორგი აბურჯანიას შესახებ ისაუბრა და აღნიშნა, რომ ფეხბურთელს ნაკრებში ხშირი გამოძახება ხელს უშლის.
„გიორგი აბურჯანია მაღალი დონის ფეხბურთელია და ჩვენ მას ვენდობით. მაგრამ, ნაკრებში ხშირი გამოძახება მისთვის და ჩემთვის პრობლემად იქცა, რადგან ბევრ ვარჯიშს აცდენს. სხვა მხრივ, მისი შრომით კმაყოფილები ვართ და თავად გიორგისაც კარგად ესმის, რას ითხოვს გუნდი მისგან, მაგრამ უდავოა, ნაკრებში გამოძახებები აბურჯანიას ზიანს აყენებს. აბურჯანიას გარდა, გუნდში მაღალი დონის ბევრი ფეხბურთელი მყავს. ქართველს ხშირად თამაში ამ ორი ფაქტორის გათვალისწინებით არ უწევს,”- განაცხადა სუარეშმა პორტუგალიურ გამოცემა „Record“-თან საუბარში.
მიმდინარე სეზონში 26 წლის აბურჯანიამ „ჟილ ვისენტეს“ რიგებში 7 შეხვედრაში მიიღო მონაწილეობა და მოედანზე, ჯამში 49 წუთი გაატარა. ამ დროში გიორგიმ 1 გოლის გატანა მოახერხა.
ქუთაისის „ტორპედოს“ ახალი მთავარი მწვრთნელი ჰყავს – კლუბს გია ცეცაძე უხელმძღვანელებს, რომელიც ბოლოს სამტრედიაში მუშაობდა. 47 წლის ცეცაძემ „ტორპედოში“ კახა ჩხეტიანი შეცვალა.
„მიხარია, რომ ასეთ გუნდში ვიწყებ მწვრთნელობას. საქართველოს ერთ-ერთ ყველაზე ტიტულოვან კლუბში ვიმუშავებ. მიმაჩნია, რომ მომავალ სამ ტურში ისეთ შედეგს დავაფიქსირებთ, რაც ახალ სეზონზე ფიქრის საშუალებას მოგვცემს. სამწუხაროდ, „ტორპედო“ ამჟამად ისეთ მდგომარეობაშია, რასაც ნამდვილად არ იმსახურებს”, – განაცხადა გია ცეცაძემ.
ინგლისური მასმედიის მტკიცებით, „მანჩესტერ იუნაიტედის“ ხელმძღვანელობა უახლოეს დღეებში მთავარ მწვრთნელ ოლე გუნარ სულშერს თანამდებობიდან გაათავისუფლებს. ნორვეგიელთან დამშვიდობება მაშინ მოხდება, როდესაც კლუბი მის შემცვლელს შეარჩევს.
მანამდე ვრცელდებოდა ინფორმაცია, რომ ინგლისური კლუბის მმართველობა სულშერს მხარდაჭერას უცხადებდა, თუმცა ხვდებოდა იმისაც, რომ მიმდინარე სეზონის მსვლელობისას, გარკვეულ ეტაპზე, მისი გათავისუფლება გარდაუვალი იქნებოდა.
ინგლისელი ჟურნალისტები ოლე გუნარ სულშერის სავარაუდო შემცვლელებს ასახელებენ. ხელმძღვანელობისთვის პრიორიტეტული ვარიანტი „ლესტერის“ მთავარი მწვრთნელი ბრენდან როჯერსია. მანჩესტერში ასევე განიხილავენ ერიკ ტენ ჰაგის („აიაქსი“) და ლუის ენრიკეს (ესპანეთის ნაკრები) კანდიდატურებს.
ოლე გუნარ სულშერი „მანჩესტერ იუნაიტედში“, რომლის ღირსებას ფეხბურთელობისას იცავდა, მწვრთნელის რანგში 2018 წლის დეკემბერში დაბრუნდა – ჯერ მოვალეობის შემსრულებლად, მოგვიანებით კი უკვე სრულფასოვანი თანამდებობა და სამწლიანი კონტრაქტი მიიღო, რომელიც გასულ ზაფხულს 2024 წლამდე გახანგრძლივდა. 48 წლის ნორვეგიელი სპეციალისტის ყველაზე დიდი წარმატება კლუბში ამ დრომდე ევროპალიგის ფინალში გასვლა რჩება.
ზინედინ ზიდანმა კი შეიძლება „პარი სენ-ჟერმენი“ ჩაიბაროს. ბოლო დროს ევროპული მასმედია ზიდანის შესახებ აქტიურად წერს და ფრანგი სპეციალისტის მომავალს რამდენიმე გუნდს უკავშირებს.
ბოლოს „ზიზუ“ „მანჩესტერ იუნაიტედს“ დაუკავშირეს. ამჯერად კი ესპანური გამოცემა „Mundo Deportivo“ „პსჟ“-ს დაინტერესების შესახებ წერს.
გამოცემის მტკიცებით, პარიზელები ზიდანს პირველად 2021 წლის ზაფხულში დაუკავშირდნენ, მაგრამ მისგან უარი მიიღეს. ამჟამად, მაურისიო პოჩეტინოს მუშაობით უკმაყოფილო კლუბის ხელმძღვანელობა ზიდანის კანდიდატურას კვლავ მიუბრუნდა და ახალი წლიდან მისთვის ოფიციალური შეთავაზების გაკეთებას გეგმავს.
პოჩეტინოს მიმართ უკმაყოფილება მას შემდეგ გაჩნდა, რაც „პსჟ“-მ მესის ტრანსფერის შემდეგ ისე ათამაშება ვერ მოახერხა, რასაც ქომაგები ელოდნენ.
