ოზურგეთში მერობის დამოუკიდებელმა კანდიდატმა კონსტანტინე შარაშენიძემ ბრიფინგი გამართა, სადაც მის მიერ გაჟღერებული ბრალდებების უშუალო ადრესატი მმართველი გუნდის მერობის კანდიდატის, ავთანდილ თალაკვაძის საარჩევნო შტაბი და გურიის მოქმედი გუბერნატორი იყვნენ.
კოტე შარაშენიძის თქმით, თალაკვაძის შტაბის მხრიდან ხორციელდება ამომრჩევლების მოსყიდვა და მათი დაშინება.
„ადამიანებს აყენებენ შეურაცხყოფას, როცა ხდება ფულით მათი გადაბირება და ამის უამრავი მცდელობა არსებობს. გურიის გუბერნატორს, რომელიც უნდა იყოს დაკავებული საქმით, დღეის მდგომარეობით, არაფერი არ გაუკეთებია საარჩევნო კამპანიაში მონაწილეობის გარდა. არიან ჩასაფრებულები, ზეწოლას ახორციელებენ ჩემს მხარდამჭერებზე, იმის ნაცვლად, რომ თანამშრომლობდეს მუნიციპალიტეტის მოქმედ ხელმძღვანელობასთან, მერის მოვალეობის შემსრულებელთან. ნაცვლად იმისა, რომ ხალხს დაეხმარონ, პიარითა და სურათის გადაღებებით არიან დაკავებულები“, _ თქვა შარაშენიძემ.
მისივე თქმით, ზეწოლა ხდება როგორც რიგით ამომრჩეველზე, ასევე, სოფლის რწმუნებულებზეც.
„პატარაა ეს მუნიციპალიტეტი და კარგად ჩანს მოსყიდვებისა და ზეწოლის ფაქტები. ყველანაირად ჩანს და დასტურდება, რომ თალაკვაძის შტაბი ეწევა შანტაჟს, მოსყიდვას, დაშინებას“.
კონსტანტინე შარაშენიძემ „ოცნების“ მერობის კანდიდატი დებატებში მიიწვია: „მარტო ვერ დადის და მოვიდეს ძმასთან ერთად, ვისაუბროთ ჩემსა და მათ განვლილ ცხოვრებაზე, გაკეთებულ საქმეებზე“.
[sexy_author_bio]
