განათლების სამინისტრომ ოზურგეთის #4 საჯარო სკოლის უკვე ყოფილ დირექტორს, ტარიელ კალანდაძეს დირექტორობის კანდიდატად დარეგისტრირებაზე უარი უთხრა.
განათლების სამინისტროს გადაწყვეტილება გააპროტესტეს ოზურგეთის #4 საჯარო სკოლის წინ. აქციაზე სიტყვით არაერთი ადამიანი გამოვიდა.
„გურია ნიუსმა“ აქციის დასრულების შემდეგ აღნიშნული სკოლის პედაგოგები ჩაწერა.
ეკა დარჩია, დაწყებითი კლასების წამყვანი მასწავლებელი: 6 ოქტომბერს, მასწავლებლის საერთაშორისო დღეს, ძალიან დიდი „საჩუქარი“ მოგვიძღვნეს. ჩვენი სკოლის დირექტორს, ბატონ ტარიელ კალანდაძეს უფლება აღარ მისცეს გაეგრძელებინა მონაწილეობა დირექტორების არჩევნებში. მაინტერესებს, რის საფუძველზე ეთქვა უარი? ის არის გამოცდილი კადრი და პროფესიონალი თავისი საქმის. რა დაუწუნეს? ძალიან ბევრი კითხვა არსებობს და ველოდებით პასუხებს.
ნათია ბოლქვაძე, დაწყებითი კლასების მასწავლებელი: #4 საჯარო სკოლის პედაგოგების სახელით, დღეს სოციალურ ქსელში ღია წერილი გავავრცელეთ და განათლების სამინისტროს მივმართეთ. გვაინტერესებს, რის საფუძველზე ეთქვა უარი ტარიელ კალანდაძეს შემდეგ ეტაპზე გადასულიყო და წარმდგარიყო სამეურვეო საბჭოს წინაშე. ვიცით, რომ ბატონმა ტარიელმა კარგად გაიარა გასაუბრება. ასე შეიძლება?! ეს არ არის დემოკრატიული პროცესები!
თუ რა ფორმით გაგრძელდება პედაგოგების და მოსწავლეების პროტესტი, ჯერ არ არის ცნობილი. ცნობილი მხოლოდ ის არის, რომ აქციის მონაწილეები სამართლიანობას მოითხოვენ.
ავტორი
