პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი პრემიერ-მინისტრის მიერ რუსეთის ხელისუფლების მიმართ გაკეთებულ განცხადებას გამოეხმაურა. მმართველი გუნდის წევრმა პრემიერ-მინისტრის განცხადება ჰუმანურ ნაბიჯად შეაფასა.
კითხვაზე _ ხომ არ უქმნის საფრთხეს პრემიერ-მინისტრის მიერ აფხაზეთთან და სამხრეთ ოსეთთან პირდაპირი დიალოგის მოწოდების შესახებ გაკეთებული განცხადება ოკუპირებული ტერიტორიების, როგორც დამოუკიდებელი სახელმწიფოების არაღიარების პოლიტიკას? _ ირაკლი სესიაშვილი „გურია ნიუსთან“ ამბობს, ამ ნათქვამით არანაირად არ იცვლება რუსეთის მიერ ჩვენი ტერიტორიების ოკუპაცია და ჩვენი მუდმივი პრინციპული პოზიცია, რომ ჩვენი ტერიტორიების მთლიანობა უნდა აღდგეს.
,,სამწუხაროა, რომ ჩვენი ოპონენტები ცდილობენ ამ სიტუაციის პოლიტიკური მიზნებისთვის გამოყენებას. მთავარია, ყველამ ერთად წავიკითხოთ ქვეტექსტი. მიმაჩნია, რომ ძალიან ღირსეული პრემიერი გვაქვს, ძალიან ღირსეული ვაჟკაცი ადამიანი, რომელმაც მიუხედავად იმისა, რომ იცოდა ამ პოლიტიკური განცხადების შემდგომ გინებით თავს დაესხმებოდნენ ჩვენი ოპონენტები, ეს ნაბიჯი ჰუმანური მოტივებით მაინც გადადგა, რაც, ჩემი აზრით, განპირობებული იყო იმით, რომ ორი ადამიანი ჩვენს კონტროლირებად ტერიტორიას ჯანმრთელი დაბრუნებოდა და მეორე ის, რომ ოჯახმა შეძლოს ძალიან ღირსეული ქართველის დატირება. მეორეს მხრივ, მისი განცხადება ითავსებს ყველა მხრივ საერთაშორისო ნორმას. პრემიერს არაფერი უთქვამს ისეთი, რომ საფუძველი გახდეს, სხვანაირად ვთარგმნოთ და მეტიც, ამ ნათქვამით არანაირად არ იცვლება რუსეთის მიერ ჩვენი ტერიტორიების ოკუპაცია, არანაირად იცვლება, ის, რომ საერთაშორისო საზოგადოება მხარს გვიჭერს და არანაირად არ იცვლება ჩვენი მუდმივი პრინციპული პოზიცია, რომ ჩვენი ტერიტორიების მთლიანობა უნდა აღდგეს და გაგრძელდეს ჩვენი ქვეყნის სწრაფვა ევროპულ და ევროატლანტიკურ სივრცეში.
კიდევ ერთხელ ვიმეორებ, რომ მეამაყება ასეთი ღირსეული პრემიერი რომ მყავს, რომელმაც საკუთარი პოლიტიკური დარტყმის მიუხედავად, გადადგა ასეთი ჰუმანური ნაბიჯი. ვიტყოდი, რომ გარდა შიდაპოლიტიკური თავდასხმებისა, განცხადებას სხვა საერთაშორისო უარყოფითი შედეგი არ მოყვება და სამწუხაროდ, ბევრი ჩვენივ ოპონენტი ჩასაფრებულის პოზიციაში შეეცადა, ეს განცხადება სხვანაირად ეთარგმნა. არსებულმა კიდევ ერთხელ გამიმყარა მოსაზრება, რომ ოპონენტებს, რომლებსაც ბუნებრივად სურთ, ჰქონდეთ ძალაუფლება, პატივისცემა გარდაცვლილის ცხედრის დაბრუნებასთან მიმართებაში არ გააჩნიათ“,_ განაცხადა “გურია ნიუსთან” სესიაშვილმა.
