სიტყვა მედიტაცია ფიქრს ნიშნავს. მედიტაცია მოდის ინდოეთიდან და ის შინაგანი პროცესების აღსადგენად და სარელაქსაციოდ გამოიყენება. ეს არის გონებრივი დისციპლინა, რომლის მთავარი მიზანი ღრმა ფიქრის მეშვეობით ცნობიერების გაღრმავება და განვითარებაა. ამ დროს,როგორც სპეციალისტები და ფსიქოლოგები ამბობენ, ცნობიერებას განსაკუთრებული კავშირი აქვს გონებასთან და სულთან. მედიტაციის შედეგად შესაძლებელია სტრესისა და შიშების მოხსნა, საკუთარი მიზნების ოპტიმიზირება და განწყობის გაუმჯობესება.
ამ პერიოდში, როდესაც ყველა და ყველაფერი ცდილობს ონლაინ მომსახურებაზე და კომუნიკაციაზე გადავიდეს, ეს მედიტაციის პრაქტიკასაც ეხება და ბევრმა ადამიანმა სწორედ ეპიდსიტუაციის, სტრესისა და გამოკეტილობის ფონზე დაიწყო მედიტირება. სწორედ ამ კატეგორიას მიეკუთვნება ჩვენი რესპონდენტი, რომელმაც სულ რამოდენიმე დღის წინ დაიწყო მედიტირების პრაქტიკა და მას ტრანცენდენტული მედიტაციის სპეციალისტი საშა ეხმარება ონლაინ კონსულტაციებით.
პირველ რიგში საშა სთხოვს შორენას კომფორტულად დაჯდეს, წელში არც ზედმეტად გასწორდეს და არც მოიხაროს, რომ მედიტაციის დროს ხელი არ შეუშალოს არჩეულმა მდგომარეობამ, პოზიციის შერჩევის შემდეგ შორენა ირჩევს მანტრა სიტყვას „დედამიწა“, რომელზეც საშა ეუბნება, რომ ეს არაა საკმარისი და რაიმე ისეთი უნდა შეარჩიოს, რაც მნიშვნელოვან ცნებასთან ასოცირდება ან განცდას ბადებს მასში, რის შემდეგაც შორენა მანტრად ირჩევს „მადლიერება დედამიწაზე“ . საშა ეუბნება რომ მისი მანტრა იმეოროს ხმამაღლა, ერთ ტემპში, რამდენიმე გამეორების შემდეგ სთხოვს თვალები დახუჭოს, ნელნელა ჩურჩულში გადაიყვანოს ხმის ტონალობა და რამდენიმე გამეორების შემდეგ იგივე ტემპით გააგრძელოს ჩუმად ამის გამეორება გონებაში, შორენა მიჰყვება მასწავლებლის ინსტრუქციას, საშა პროცესის თანადროულად აგრძელებს საუბარს და ეუბნება, რომ თვალები არ უნდა გაახილოს, სანამ ის არ ეტყვის. აგრეთვე აფრთხილებს, რომ შეიძლება მოვიდნენ სხვადასხვა ფიქრები, ან სახე ხატები, რომელსაც შეუძლია სურვილისამებრ მიაქციოს, ან არ მიაქციოს ყურადღება , თუმცა ორივე შემთხვევაში უნდა იმეოროს მისი არჩეული მანტრა. ამის შემდეგ სიჩუმე ისადგურებს, შორენას იშვიათად მიმიკა ეცვლება და ოდნავ ზურგში იხრება, ასე გრძელდება 15 წუთის განმავლობაში, შემდგომ საშა ეუბნება მანტრა ნელ -ნელა გაუშვას გონებიდან ისე, რომ თვალები არ გაახილოს. ისევ სიჩუმეა , რომელიც 5 წუთი გრძელდება და საშა სთხოვს შორენას ნელ-ნელა გაახილოს თვალები.
ეს არის ტრანსცენდენტული მედიტაციის 20 წუთიანი მონაკვეთი, როგორც საშა ამბობს ‘’ტმ’’ მედიტაციით დიდ შედეგებზე რომ გავიდეს ადამიანი დღეში ორჯერ , დილას უზმოზე და საღამოს დაძინებამდე 2-3 საათით ადრე უნდა იმედიტიროს.
კითხვაზე რა დანიშნულება აქვს მედიტაციის დროს მანტრას ის გვპასუხობს , რომ ‘’მანტრას ამ კონკრეტული მედიტაციის დროს უმთავრესი მნიშვნელობა აქვს, რადგან თითოეულ სიტყვას აქვს თავისი ვიბრაცია და შინაარსობრივი თუ ენერგეტიკული დატვირთვა, მანტრა არ უნდა გაამხილო, როდესაც დამოუკიდებლად წყვეტ მედიტაციას“. მისი თქმით მედიტაციას მხოლოდ მაშინ აქვს კარგი შედეგი, როდესაც ირჩევ სასიამოვნო მანტრებს, როგორც სასიამოვნო ენერგიას, „მანტრას გამეორების დროს გონებიდან ნეგატიური ფიქრები ქრება, ეს შლაკებისგან გაწმენდას გავს, სწორედ ამიტომ არ შეიძლება პირდაპირ გამოფხიზლება და თვალების გახელა“
საშა ბოლო ხუთ წუთს „ტმ“ მედიტაციაში გონების გადამტვირთველ დროდ მოიხსენიებს , როდესაც მანტრა წყდება გონებაში და თავისუფალ მდგომარეობას უბრუნდება .
რესპონდენტი შორენა შავაძე გვიამბობს თუ რატომ აირჩია კონკრეტულად ეს მანტრა, მისი თქმით კონკრეტული სიტყვები გარკვეულ შეგრძნებებს აღვიძებს, რომელიც უკავშირდება ამ სიტყვას.
„რომ ვფიქრდები ცხოვრებაში ერთადერთხელ მქონდა მადლიერების უდიდესი განცდა, რომელიც თუ დამიჯერებთ ნებისმიერ სხვა გრძნობას აღემატება, ყოველშემთხვევაში ჩემთვის, მადლიერების გრძნობის და კონკრეტული მომენტების ამოტივტივება მინდოდა გონებაში , როდესაც მადლიერებით ვიყავი , ან უნდა ვყოფილიყავი განწყობილი“. შორენა აღნიშნავს , რომ ის აპირებს გააგრძელოს „ტმ“ მედიტაცია, თუნდაც მანამ , სანამ მისი გონება დადებითადაა განწყობილი ამ პრაქტიკის მიმართ.
მედიტაციას ბევრ დადებით მხარესთან ერთად აქვს უარყოფითი გავლენებიც , ასე ვთქვათ გვერდითი მოვლენები, რომელიც შეიძლება გამოვლინდეს , როდესაც ადამიანი დიდი დროის მანძილზე მედიტირებს .
პირველი უარყოფითი მხარე არის გაღიზიანება უმნიშვნელო დეტალებით და მობეზრება. ‘’რამ დასი’’, რომელიც ხშირად მიმართავდა პაციენტებთან სხვადასხვა მედიტაციას ამ გვერდით მოვლენას უწოდებს ჭარბ მოწყენილობას და ჭარბ განსჯას გარშემომყოფებისა და გარემოს მიმართ. ასევე ხშირად ახლავს მედიტაციას მარტოობის მომეტებული განცდა , ემოციებისა და გრძნობების სიჭარბე , ბრაზი ადამიანების მიმართ, უძილობა, მომატებული ენერგიის გამო, ძირითადად ასეთი განცდები აქვთ ადამიანებს, რომლებიც ერთ წელზე მეტხანს მედიტირებენ, მათ შეიძლება ჩათვალონ, რომ უმნიშვნელოა კარიერა, ოჯახი, ურთიერთობები , თვითგანვითარება და დაეწყოთ ნეგატიური ფიქრები. შეიძლება ითქვას , რომ ეს მედიტაციის ერთ-ერთი მხარეა , რომელიც ზოგჯერ ვლინდება და ზოგჯერ არა. ფსიქოთერაპევტი მანანა ლეჟავა ამ საკითხს ასე განმარტავს :
‘’მედიტაციის დროს ხდება ღრმა ქვეცნობიერიდან დეტალების გაშიფრვა, ისეთი ნიუანსების აღმოჩენა, რაც ბუნებრივ მდგომარეობაში შესძლოა არასოდეს გაგეცნობიერებინა, თავიდან ეს ყველაფერი სასიამოვნოა, რადგან სამყარო უფრო საინტერესო ხდება , თუმცა რაღაც დროის შემდეგ , როდესაც ადამიანი განიცდის გარესამყაროს მიმართ ემოციურ სიჭარბეს, გარკვეული ეჭვები უჩნდება“
მთელს მსოფლიოში და მათ შორის საქართველოში ფსექოთერაპევტები და ფსიქოლოგები ხშირად იყენებენ მედიტაციის სხვადასხვა მეთოდს, როგორც ფსიქოლოგი მამუკა გურული ამბობს, ძალიან ინდივიდუალურია მედიტაციის შერჩევა პაციენტებისთვის და ხშირად გამოუცდელ პაციენტებთან სუნთქვითი მედიტაციით იწყებს მუშაობას , რადგან ტექნიკურად ეს მედიტაციის ყველაზე მარტივი ხერხია.
„ამ დროს ცვლილებები ხდება სიხშირეებში, მაგრამ მთავარი ისაა, რომ ხშირ შემთხვევაში მედიტაციის შედეგად ე.წ ძველი ტვინი მშვიდდება და ტვინის ქერქი აქტიურდება“,_ ამბობს ფსიქოლოგი.
სუნთქვითი მედიტაციის დროს მთლიანი ყურადღება სუნთქვაზეა კონცენტრირებული. ფსიქოლოგის თქმით ამ მეთოდს ადამიანები სრულიად გაუაზრებლადაც იყენებენ, რადგან ოდესღაც მსგავსი პრაქტიკით მეტად დამშვიდებულან და მთავარი ეფექტიც ინსტინქტური და ემოციური ცენტრების დამშვიდებაა, თუმცა ფსიქოლოგი იმასაც აღნიშნავს, რომ ფსიქოლოგიაში მხოლოდ დამშვიდებისთვის და განტვირთვისთვის არ იყენებენ ამ ხერხს.
