“მეპატრონე თუ უნდა მილიონს დააფასებს“_ რა ღირს ჯიხური ოზურგეთში

ქალაქ ოზურგეთის რამდენიმე ცენტრალურ უბანში, მათ შორის ტროტუარებზე, ახალი ჯიხურები დგას. ბოლო რამდენიმე დღეა, გ.ჭანტურიას ქუჩაზე, რომელიც მშენებარე ფოლკლორის ცენტრისა და მუზეუმის მიმდებარე ტერიტორიაა, ახალი ობიექტების მშენებლობა მიმდინარეობს.

“გურია ნიუსს“ არა ერთმა დაინტერესებულმა პირმა მიმართა, გაერკვია, თუ ვისია აღნიშული ობიექტები:

“საინტერესოა, ვინ შეიძინა, როგორ, რამდენად, ვის სახელზეა რეგისტრირებული ოფიციალურად, რადგან ძალიან ძვირი ღირს. ერთი ჯიხურის ყოველთვიური ღირებულება 200 დოლარია ან მეტი, კვადრატულს გააჩნია. ვის აქვს ამდენი ფული დღეს ოზურგეთში? უბრალო ადამიანი ვერც იყიდდა, არც მისცემდნენ უფლებას ან დაიჭერდნენ, სად გქონდა ამდენი ფულიო, იქნებ თქვენ გაიგოთ ინფორმაცია და მოგვაწოდოთ“.

„გურია ნიუსი“ არაერთხელ იმყოფებოდა აღნიშნულ ადგილებში, თუმცა, პასუხისმგებელი პირი ვერ ვნახეთ. ობიექტებზე  მუშების ნახვა შევძელით. გასაუბრებისას მათ აღნიშნეს, რომ ისინი მხოლოდ დასაქმებულები არიან  და მათ ყოველდღიური სამუშაოს შესრულებისთვის თანხას უხდიან, თუმცა, ვინ, ამის დასახელებისგან თავს იკავებენ. როგორც მათ გვითხრეს, ერთი ჯიხურის გაქირავება თვეში 1500 ლარი ღირს  ან ამის ნახევარი, თუ ერთი ობიექტი ორ ნაწილად გაიყოფა.  მათთან გასაუბრებისას გავარკვიეთ მხოლოდ ერთი _ მშენებარე ობიექტის კურირებს შპს “მუხების“ წარმომადგენელი, ვინმე რობერტ გოთუა.

საჯარო რეესტრის ოფიციალური მონაცემების მიხედვით რობერტ გოთუა არის ოზურგეთის მუნიციპალიტეტის სოფელ კონჭკათის მკვიდრი.

საჯარო რეესტრის ეროვნულ სააგენტოში მიღებული იქნა განცხადება რობერტ გოთუას მიერ შპს “ მუხების“ დასარეგისტრირებლად 2017 წლის 15 მაისს.

თუ ვინ არის მიწის მესაკუთრე, სადაც მშენებარე ობიექტებია  განთავსებული, როდის და რა ფასად შეიძინა აღნიშნული მიწის ნაკვეთი, ამასთან დაკავშირებით “ გურია ნიუსი“ რობერტ გოთუას დაუკავშირდა, რომელმაც  მსგავსი ტიპის ინფორმაციის მისაღებად ქალაქ ოზურგეთის მუნიციპალიტეტის შესაბამის სამსახურებთან გადაგვამისამართა:

_ მე ვარ შპს “მუხების“ წარმომადგენელი,  რობერტი გოთუა. რა გნებავთ? _ გვკითხა მან. ეს მიწა არის კერძო საკუთრება და რაც შენდება ისიც. ჩემი არ არის, ბატონო,  ეს არის სხვისი კერძო საკუთრება. თუ რაიმე კონკრეტული გაინტერესებთ, მიმართეთ მერიაში სივრცით მოწყობის და ინფრასტუქტურის  სამსახურს, იქ გაიგებთ ყველაფერს, მე ვარ შპს “მუხების“ “დირექტორი“. სხვა არ ვიცი, მეპატრონე  თუ უნდა გააჩუქებს, თუ უნდა მილიონს დააფასებს, ეს მისი საქმეა, _ გვიპასუხა რობერტ გოთუამ.

“გურია ნიუსი“ დაუკავშირდა ქალაქ ოზურგეთის მუნიციპალიტეტის მერიის სივრცითი მოწყობის, არქიტეტურის, მშენებლობის ინსპექტირების, ურბანული განვითარების, ზედამხედველობის სამსახურის უფროსს მამია მახარაძეს, რომელმაც აღნიშნა, რომ კერძო მესაკუთრემ მიწის ნაკვეთი აუქციონის წესით შეიძინა და მათ გასცეს მშენებლობის ნებართვა:

_ ჩვენთან შემოვიდა მშენებლობის ნებართვით შპს“ მუხების“ დირექტორი  რობერტ გოთუა.  როგორც მე  ვიცი, მან აღნიშნული მიწის ნაკვეთი  აუქციონზე შეიძინა. ნებართვა გაცემულია ივნისში და ასევე, მშენებლობის პროექტიც დამტკიცებულია. ეს მიწა უკვე საკუთრებაშია გადაცემული  და ჩვენ რა უფლება გვქონდა, არ მიგვეცა მშენებლობის ნებართვა, _ამბობს “გურია ნიუსთან“ მახარაძე.

ქალაქ ოზურგეთის მუნიციპალიტეტის მერიის ეკონომიკური განვითარების, ქონების მართვის, ინფრასტრუქტურის, ტრანსპორტისა და კეთილმოწყობის სამსახურის უფროსმა, მერაბ წივწივაძემ, რომელიც ამავდროულად ხელმძღვანელობს აუციონის თემას მერიაში,  “გურია ნიუსთან“ საუბრისას ჯერ თქვა, რომ ჯერ იურისტებთან გადაამოწმებდა,  ინფორმაციის გაცემის უფლება აქვს თუ არა:

 _ რომ მოგვმართოთ ოფიციალური წერილით? უნდა ვიკითხო იურისტებთან იქნებ არ შეიძლება,  რომ გითხრათ ინფორმაცია, მოიცა გადავამოწმებ, _ გვითხრა წივწივაძემ, თუმცა, უმალვე გადაიფიქრა და თქვა, რომ თავად მოიძიებდა ინფორმაციებს და დაგვიკავშირდებოდა.

წივწივაძის განცხადებით, ქალაქ ქოზურგეთის მერიამ აღნიშნულ მიწის ნაკვეთი აუქციონის წესით გადასცა ვინმე ავთანდილ ბერიძეს:

_ აუქციონი ჩავატარე 2017 წლის  28 თებერვალს,  აუქციონზე,  მყიდველმა ავთანდილ ბერიძემ შეიძინა უძრავი ქონება, რომლის  ჯამური თანხა შეადგენს 42 ათას 216 ლარი 90 თეთრს, _ ამბობს წივწივაძე.