მერაბ ჟორდანია: „გურიას” ყველა ფინანსური დავალიანება დაიფარება“

მერაბ ჟორდანიამ გადაცემაში “სპორტი იმედზე” სტუმრობისას  თქვა, რომ საფეხბურთო კლუბ  “გურიას” ყველა ფინანსური დავალიანება დაიფარება და შექმნის ბიუჯეტს, რისი საშუალებითაც კლუბი Crystalbet ეროვნულ ლიგაში დაწინაურდება.

მისივე ინფორმაციით, “გურიას” პრეზიდენტი მისი ვაჟი კახი ჟორდანია იქნება, თუმცა თავად მერაბიც კლუბის მართვაში აქტიურად იქნება ჩართული.

_ “გურიას“ წინაშე არსებული ფინანსური დავალიანება სრულად დაიფარება და შეიქმნება ღირსეული ბიუჯეტი საიმისოდ, რომ ორ წელიწადში ლანჩხუთის კლუბი Crystalbet ეროვნულ საფეხბურთო ლიგაში აღზევდეს. გუნდს ჩემი შვილი კახი ჟორდანია უხელმძღვანელებს, რომელმაც პირობა მომცა, რომ ნებისმიერი შედეგის მიუხედავად, კლუბს არასოდეს მიატოვებს და ამ კლუბის ფინანსურ უზრუნველყოფაზე უარს არასოდეს იტყვის. გარდა ამისა, მინდა გითხრათ, რომ დირექტორთა საბჭოს წევრები ვიქნებით მე, მამუკა აბუსერიძე, ავთო ქანთარია, ბადრი დანელია, გოჩა ტყებუჩავა, დავით ცომაია, ოთარ კორღალიძე, გია გურული, ბესო ფრიდონაშვილი და მერაბ თევზაძე – ანუ ის ფეხბურთელები, რომელთა დახმარებითაც 1989 წელს კლუბმა უმაღლესი ლიგის საგზური მოიპოვა,  – განაცხადა მერაბ ჟორდანიამ.

„გურიაზე“ საუბრისას ჟორდანია სტადიონის თემასაც შეეხო –  „მიმდინარეობს აქტიური სამუშაოები ჩვენს ქალაქში სტადიონის გაკეთების თაობაზე, რომლის ტრიბუნებიც 5 ათას მაყურებელზე იქნება გათვლილი, თუმცა ჩემი ვარაუდით და იმ უდიდესი სიყვარულიდან გამომდინარე, რაც ლანჩხუთელებს ფეხბურთის მიმართ აქვთ, ტევადობის გაზრდა აუცილებლად დაგვჭირდება”.