ოზურგეთის მუნიციპალიტეტის სოფელ ასკანაში გამართულ სოფლის დღესასწაულზე _ “ასკანობა 2018”, სოფლის საპატიო მოქალაქის სტატუსი ასკანელი ბიზნესმენი ძმების მამას _ ზაურ ჩხაიძეს მიანიჭეს. ბოლო დროს საპატიო მოქალაქეების დაჯილდოება ოზურგეთის მუნიციპალიტეტის რამდენიმე სოფელში ხდება. ასევე, ცნობილია, რომ ორი მუნიციპალიტეტის არსებობს დროს, სპეციალური საბჭო განიხილავდა და ამტკიცებდა, ვის უნდა მინიჭებოდა საპატიო მოქალაქის წოდება.
2017 წელს, ორი მუნიციპალიტეტის შეერთების შემდეგ, ახალი წესდება ოზურგეთის მუნიციპალიტეტის მერიას არ წარუდგენია ოზურგეთის მუნიციპალიტეტის საკრებულოსთვის. ოზურგეთის მუნიციპალიტეტის საკრებულოში გვითხრეს, რომ ახალი საპატიო მოქალაქის წოდებაზე არ უმსჯელიათ და არც განცხადებით მიუმართავს მათთვის ოზურგეთის მუნიციპალიტეტის მერიას.
“გურია ნიუსმა” ოზურგეთის მუნიციპალიტეტის მერიისგან საჯარო ინფორმაცია გამოითხოვა საკითხზე: _ 2018 წლის აგვისტოში, სოფელ ასკანაში გაიმართა “ასკანობა 2018″. ღონისძიების დროს დასახელდა საპატიო ასკანელი. მოგვაწოდეთ შესაბამისი დოკუმენტები, რის საფუძველზე დასახელდა სოფლის საპატიო მოქალაქე”.
“მოგეხსენებათ, სოფელი ასკანა ათწლეულებია, აღნიშნავს სოფლის დღესასწაულს _ “ასკანობას” და სახელდება საპატიო ასკანელი, რომლის როლი მნიშვნელოვანია სოფლის განვითარების საქმეში. სოფლის მცხოვრებთა ინიციატივით, “ასკანობა 2018″-ის საპატიო ასკანელად დასახელდა ზაურ ჩხაიძე”, _ ვკითხულობთ მერიისგან მოწერილ პასუხში, რომელსაც თან ერთვის დოკუმენტები, რის მეშვეობით ირკვევა, რომ საკითხის შესახებ მერის წარმომადგენელს ჯერ მიწერეს საინიციატივო ჯგუფის წევრებმა, შემდეგ გაიმართა სოფლის კრება და ბოლოს, ოზურგეთის მუნიციპალიტეტის მერს გაეგზავნა წერილი ზაურ ჩხაიძისთვის საპატიო ასკანელის წოდების მინიჭების ინიციატივით.
“ასკანობაზე”, რომელიც ათწლეულებია ტარდება, ტრადიციულად, სახელდება საპატიო ასკანელი, რომელმაც მნიშვნელოვანი როლი შეიტანა სოფლის განვითარების საქმეში.
სოფლის მცხოვრებთა ინიციატივით, მიმდინარე წელს საპატიო ასკანელად დასახელებულია ასკანის მკვიდრი ზაურ ჩხაიძე.
გთხოვთ, გაითვალისწინოთ სოფლის მცხოვრებთა მოთხოვნა და “საპატიო ასკანელი 2018″-ის წოდება მიანიჭოთ ბატონ ზაურ ჩხაიძეს”, _ წერს ოზურგეთის მუნიციპალიტეტის მერს კონსტანტინე შარაშენიძეს მისივე წარმომადგენელი სოფელ ასკანაში გურამ ცქვიტინიძე.
მანამდე კი გურამ ცქვიტინიძისთვის სოფლის მცხოვრებლებს მიუმართავთ:
“ბატონო გურამ, როგორც მოგეხსენებათ, ჩვენს სოფელში ცხოვრობს ზაურ ჩხაიძე, რომელიც არის ბიზნესმენი ძმების _ გოჩა, ზურაბ, ჯიმშერ ჩხაიძეების მამა. ზემოთ აღნიშნული პიროვნებები და პირადად ზაურ ჩხაიძე ბევრ სასიკეთო საქმეს აკეთებენ სოფლისთვის _ ზაურ ჩხაიძისა და მისი ვაჟების ინიციატივით სოფელში აიგო ამაღლების სახელობის ეკლესია, კეთილმოეწყო სოფლის ცენტრში მდებარე ფეხბურთის მოედანი, მათი ხელშეწყობით დაიგო ასფალტირებული გზა და გაყვანილი იქნა წყალი. ისინი სისტემატურ დახმარებას უწევენ ხელმოკლე თანასოფლელებს და მრავალშვილიან ოჯახებს. თავად ზაურ ჩხაიძის ინიციატივით, სოფლად დაფუძნდა ტრადიციული დღესასწაული _ “ასკანობა”.
ბატონ ზაურს წელს შეუსრულდა 80 წელი და გთხოვთ, მადლიერების აღსანიშნავად, გვიშუამდგომლოთ ოზურგეთის მუნიციპალიტეტის მერთან, ზაურ ჩხაიძისთვის საპატიო ასკანელის წოდების მინიჭების თაობაზე”, _ წერილს ხელს აწერენ საინიციატივო ჯგუფის წევრები.
ასევე, არსებობს კრების ოქმი, რომელიც 28 აგვისტოს ჩატარდა. კრებას ესწრებოდა თავად ზაურ ჩხაიძე.
ოზურგეთის მუნიციპალიტეტის საპატიო წოდებებისა და ჯილდოების შემოღებისა და მინიჭების წესი 2015 წლის 15 სექტემბერს დამტკიცდა, სადაც წერია, რომ საინიციატივო ჯგუფის შუამდგომლობას თან უნდა ახლდეს ოზურგეთის მუნიციპალიტეტის ამომრჩეველთა არანაკლებ 1%-ის ხელმოწერა. როგორც მერიისგან მოწოდებული ოქმიდან ირკვევა, კრებას 40 ადამიანი ესწრებოდა, მაგრამ ოქმს, რომელიც კრებაზე შედგა, მხოლოდ საინიციატივო ჯგუფის წევრები აწერენ ხელს.
უნდა შექმნილიყო თუ არა ახალი საბჭო და მათ შექმნამდე ძველ საბჭოს აქვს თუ არა იურიდიული ძალა? ამ კითხვით “გურია ნიუსმა” საქართველოს ახალგაზრდა იურისტთა ასოციაციის ოზურგეთის ოფისის ხელმძღვანელს თამაზ ტრაპაიძეს მიმართა:
“2017 წელს, ორი მუნიციპალიტეტის გაერთიანების შედეგად შექმნილ ახალ თვითმმართველობას არ მიუღია ნორმატიული აქტი, რომელიც არეგულირებს ოზურგეთის მუნიციპალიტეტში საპატიო წოდებებისა და ჯილდოების მინიჭების წესს. ამიტომ ადგილობრივი თვითმმართველობის კოდექსში 2017 წლის 29 ივლისის ცვლილების მე-2 მუხლის მე-4 პუნქტის შესაბამისად, საქართველოს პარლამენტის 2017 წლის დადგენილებით შექმნილი მუნიციპალიტეტების (თვითმმართველი თემების) საკრებულოების მიერ შესაბამისი ნორმატიული აქტების მიღებამდე ამ მუნიციპალიტეტების ადმინისტრაციულ ტერიტორიებზე მოქმედებს იმ თვითმმართველი ერთეულების ადმინისტრაციულ-სამართლებრივი აქტები, რომელთა გაერთიანების შედეგადაც შეიქმნა ახალი მუნიციპალიტეტები.
აქედან გამომდინარე, სანამ არ მოხდება ახალი ადმინისტრაციული აქტის მიღება, მოქმედებს ოზურგეთის მუნიციპალიტეტის საკრებულოს მიერ 2015 წლის 16 სექტემბერს მიღებული დადგენილება “ოზურგეთის მუნიციპალიტეტის საპატიო წოდებებისა და ჯილდოების შემოღებისა და მინიჭების წესის დამტკიცების შესახებ”, _ გვითხრა თამაზ ტრაპაიძემ.
ჩვენ, ასევე, დავინტერესდით, რადგან არსებული წესით არ იქნა “საპატიო ასკანელი” არჩეული, ითვლება თუ არა ლეგიტიმურად ეს წოდება, რაზეც თამაზ ტრაპაიძემ გვიპასუხა:
“კონკრეტულ შემთხვევაში, შეიძლება ჩავთვალოთ, რომ “საპატიო ასკანელი” სოფლის მცხოვრებთა მიერ მინიჭებული სახალხო წოდებაა, რომელიც გაცხადდა მუნიციპალიტეტის მერის მიერ. სხვა სახის იურიდიული ძალა ამ წოდებას არ აქვს”.
სტატიის მომზადების დროს “გურია ნიუსისთვის” ცნობილი გახდა, რომ ოზურგეთის მუნიციპალიტეტის მერიამ ოზურგეთის მუნიციპალიტეტის საკრებულოს მიაწოდა პროექტი, რომლის მიხედვითაც მოხდება საპატიო წოდებებისა და ჯილდოების შემოღება.
ბიუროს სხდომაზე უკვე წარადგინეს პროექტი და იწყება ადმინისტრაციული წარმოება. ბიუროს სხდომაზე დეპუტატებისგან აღინიშნა, რომ “ეს არის ძველი პროექტების მიქსი და აქ ახალი არაფერია”.
ჩვენ მიერ მოპოვებული ინფორმაციით, ახალი პროექტის დამტკიცება ჩქარი ტემპით უნდა მოხდეს, რადგან ოქტომბერში მერია “ალეგრობის” ჩატარებას აპირებს, სადაც საპატიო ოზურგეთელს დაასახელებენ.
