გასულ კვირას, ჩოხატაურის მუნიციპალიტეტის მერმა ირაკლი კუჭავამ, საკრებულოს დეპუტატებს გასული წლის მუშაობის ანგარიში ჩააბარა.
ანგარიშის ჩაბარებამ საკმაოდ მშვიდ ვითარებაში ჩაიარა _ თუ არ ჩავთვლით აუდიტის დასკვნას, რომელზეც გასულ ნომერში ვწერდით, მერთან დეპუტატებს მწვავე შეკითხვები არ ჰქონიათ.ირაკლი კუჭავას თქმით, 2017 წლის 12 თვის შემოსულობებმა შეადგინა 13 456.1 ათასი ლარი _ გადასახადების სახით ბიუჯეტში მთლიანობაში მობილიზებულია 1 581,7 ათასი ლარი. მერის თქმით, თანხის უდიდესი ნაწილი ქონების გადასახადზე მოდის.
ქონების გადასახადიდან საანგარიშო პერიოდში მიღებულია 1 206,3 ათასი ლარის შემოსავალი, ნაცვლად დაგეგმილი 650,0 ათასი ლარისა (185,6%).
“საშემოსავლო გადასახადმა 375,4 ათასი ლარი შეადგინა, გეგმით განსაზღვრული გვქონდა 450 ათასი ლარი (83,4%).
საანგარიშო პერიოდში, გრანტების სახით, ბიუჯეტში ჩარიცხულია 8 328,5 ათასი ლარი, გეგმით გათვალისწინებული იყო 6 020,0 ათასი ლარი (138,3%)”, _ განაცხადა ირაკლი კუჭავამ.
მერის ანგარიშის თანახმად, შერეული და სხვა არაკლასიფიცირებული შემოსავლებიდან საანგარიშო პერიოდში მიღებულია 8,3 ათასი ლარი.
არაფინანსური აქტივებიდან მიმდინარე პერიოდში შემოსულია 50,7 ათასი ლარი, მათ შორის: 8,5 ათასი ლარი მიღებულია ძირითადი აქტივების გაყიდვიდან, მატერიალური მარაგების გაყიდვიდან _ 0,9 ათასი ლარი, ხოლო მიწის გაყიდვიდან _ 41,3 ათასი ლარი.
ირაკლი კუჭავას თქმით, ბიუჯეტის გადასახდელების დამტკიცებულმა გეგმამ შეადგინა 11 017,4 ათასი ლარი, გაწეულმა საკასო ხარჯმა შეადგინა 10 833,3 ათასი ლარი, რაც გეგმიური მაჩვენებლის 98,3%-ია
ჩოხატაურის მერმა, მისივე ანგარიშის თანახმად, 50 000-ლარიანი სარეზერვო ფონდიდან 48.8 ათასი ლარი დახარჯა.
“2017 წლის მუნიციპალიტეტის ბიუჯეტით სოციალური და ჯანმრთელობის პროგრამების დაფინანსებისთვის, დაზუსტებული გეგმით, გათვალისწინებული იყო 529,5 ათასი ლარი, ხარჯმა კი შეადგინა 538 503 ათასი ლარი. ხარჯებიდან ოჯახებისა და ბავშვების სოციალურ დაცვას მოხმარდა 101,7 ათასი ლარი; სამედიცინო მომსახურების თანადაფინანსებას და მედიკამენტებით დახმარებას _ 326,7 ლარი; იძულებით გადაადგილებულ პირთა დახმარებას _ 6,450 ლარი; მძიმე საცხოვრებელ და ეკონომიკურ პირობებში მყოფ, უბედური შემთხვევებისა და სხვადასხვა სტიქიური მოვლენების შედეგად დაზარალებულ ოჯახებს _ 80,3 ლარი; საქართველოს თავისუფლებისა და ტერიტორიული მთლიანობისთვის ბრძოლაში დაღუპულთა და დაზარალებულთა ოჯახებს _ 22,230 ლარი. მარტოხელა ადამიანთა დაკრძალვის ხარჯებმა შეადგინა 5500 ლარი”, _ აღნიშნა კუჭავამ.
მისივე ინფორმაციით, გასულ წელს სამედიცინო მომსახურების თანადაფინანსებისთვის დაზუსტებული გეგმით გათვალისწინებული იყო 325,8 ლარი, ხარჯი კი შეადგენს 326 728 ათას ლარს.
ჩოხატაურის მერის მიერ წარმოდგენილ 2017 წლის მუშაობის ანგარიშში აღნიშნულია, რომ გასული წლის ბიუჯეტით, ოჯახებისა და ბავშვების სოციალური დაცვისთვის დაზუსტებული გეგმით გათვალისწინებული იყო 94 5 ლარი, ხარჯი კი შეადგენს 101 750 ათას ლარს.
“2017 წელში მუნიციპალიტეტის მიერ გახორციელებული იქნა ადგილობრივი ბიუჯეტით 271,6 ათასი ლარის შესყიდვა, სახელმწიფო ბიუჯეტით ბოლო დაზუსტებით 3 300,9. ათასი ლარის შესყიდვა, დადებული იქნა 227 ხელშეკრულება: გამარტივებული შესყიდვით _ 131 ხელშეკრულება, ელექტრონული ტენდერით _ 81 ხელშეკრულება, კონსოლიდირებული ტენდერით _ 15 ხელშეკრულება.
სულ ჩატარებული იქნა 101 ტენდერი, მათ შორის: 81 ელექტრონული ტენდერი, უარყოფითი შედეგით დასრულდა 3, არ შედგა 11 ტენდერი, შეწყვეტილი იქნა 6 ტენდერი”, _ განაცხადა ირაკლი კუჭავამ.
მისივე ინფორმაციით, ინსპექტირების ჯგუფის მიერ საჯარიმო სანქცია დაერიცხა 15 მიმწოდებელს, შესყიდვების სააგენტოს გადაეგზავნა კანონით გათვალისწინებული დოკუმენტაცია 1 მიმწოდებლის შავ სიაში განთავსების მიზნით.
“შესრულებულ მომსახურებასა და სამუშაოებზე შედგენილი იქნა მიღება-ჩაბარების აქტები და ექსპერტიზის დასკვნები, გაცემული ლევან სამხარაულის ექსპერტიზის ბიუროს ან აკრედიტირებული საექსპერტო ორგანოების მიერ. დასკვნების საფუძველზე ჩანს, რომ სამუშაოების შესრულების ხარისხი არის დამაკმაყოფილებელი”, _ აღნიშნა ჩოხატაურის მერმა.
ირაკლი კუჭავას ანგარიშის თანახმად, საქართველოს მთავრობის 2017 წლის 14 მარტის #480 განკარგულების საფუძველზე, ჩოხატაურის მუნიციპალიტეტს საქართველოს რეგიონებში გასახორციელებელი პროექტების ფონდიდან ინფრასტრუქტურული პროექტების გახორციელებისთვის გამოეყო 2 552 808 ლარი, ხოლო ადგილობრივი ბიუჯეტიდან თანადაფინანსებამ შეადგინა 134 356 ლარი, სულ 2 687 164 ლარი.
როგორც ირაკლი კუჭავამ საკრებულოს სხდომაზე აღნიშნა, სახელმწიფო შიდა ფინანსური კონტროლის შესახებ საქართველოს კანონის მოთხოვნით დამტკიცებული 3-წლიანი სტრატეგიული გეგმის შესაბამისად, შიდა აუდიტისა და ინსპექტირების სამსახურის მიერ შემოწმებული იქნა 7 არასამეწარმეო, არაკომერციული, იურიდიული პირი:
“ა(ა)იპ საფეხბურთო კლუბ “ბახმაროს” შესაბამისობის აუდიტი 2016 წლის საანგარიშო პერიოდისაა. შემოწმება ჩატარდა იმ ბუღალტრული დოკუმენტაციის საფუძველზე, რომელიც წარმოდგენილი იქნა ა(ა)იპ საფეხბურთო კლუბ “ბახმაროს” ხელმძღვანელობის მიერ. შემოწმების შედეგად გამოვლინდა ნაკლოვანებები და ხარვეზები.
კერძოდ: კლუბის მენეჯმენტის მიერ წლის განმავლობაში, ვერ იქნა ხარჯვითი ნაწილის კონტროლის უზრუნველყოფა, რამაც გამოიწვია კრედიტორული დავალიანება; არ ხდებოდა კლუბის ვალდებულებების გასტუმრება დაფინანსების წყაროების მიხედვით, რამაც გამოიწვია ბავშვთა ფეხბურთის აკადემიასთან კრედიტორული დავალიანების წარმოშობა, მიუხედავად იმისა, რომ ადგილობრივმა ბიუჯეტმა გაზარდა დაფინანსება დასაწყისში დაგეგმილთან შედარებით; არ ხდებოდა შესყიდვის გახორციელებისას, შესყიდვის დამადასტურებელი დოკუმენტების სრულყოფილად წარმოდგენა.
ა(ა)იპ “კულტურის ცენტრის” ფინანსური აუდიტი 2015-2016 წლების საანგარიშო პერიოდს მოიცავს და გამოვლენილია რიგი ნაკლოვანებებისა: ქონების ინვენტარიზაციის გახორციელებისას საქართველოს ფინანსთა მინისტრის 2010 წლის 23 ივლისის #605 ბრძანებით დამტკიცებული “საბიუჯეტო ორგანიზაციებში ქონების, მოთხოვნებისა და ვალდებულებების ინვენტარიზაციის ჩატარების წესის” გაუთვალისწინებლობა.
ა(ა)იპ “ჯანდაცვის ცენტრის” ფინანსური აუდიტიც 2015-2016 წლების საანგარიშო პერიოდისაა და მთლიანობაში შეიძლება ითქვას, რომ არსებული ფინანსური და ადამიანური რესურსის ხარჯზე, ორგანიზაცია ახერხებს დასახული მიზნის მიღწევას. თუმცა, მიუხედავად იმისა რომ ცენტრს გააჩნია ყველა შესაბამისი საშტატო ერთეული და ადამიანური რესურსი, ვერ ხერხდება კანონით გათვალისწინებული ყველა ნორმისა და მოთხოვნის სიზუსტით დაცვა. ეს ეხება საბუღალტრო ოპერაციებს, სახელმწიფო შესყიდვებს, საწვავის ჩამოწერას.
ა(ა)იპ “საბიბლიოთეკო გაერთიანების” 2016 წლის ფინანსური აუდიტის შედეგები გვაძლევს საშუალებას გამოვთქვათ მოსაზრება, რომ გაერთიანების ადმინისტრაციის მიერ ვერ ხერხდებოდა, როგორც საბუღალტრო აღრიცხვის სრულყოფა, ასევე, სახელმწიფო შესყიდვების კანონის მოთხოვნების სრულად დაცვა, რაც წინა წლების შემოწმების ანგარიშშიც მოხვდა, მაგრამ მიუხედავად ამისა, ადმინისტრაციამ ვერ მოახერხა რეკომენდაციების გათვალისწინება (საბიბლიოთეკო გაერთიანება ახლა ცალკე ა(ა)აიპი აღარ არის. ავტ).
ა(ა)იპ “მოსწავლე ახალგაზრდობის სახლის” ფინანსური აუდიტიც 2016 წლის საანგარიშო პერიოდისაა და აქაც უნდა აღინიშნოს, რომ, მიუხედავად შიდა აუდიტის ჯგუფის მიერ გაცემული რეკომენდაციებისა, ჩოხატაურის მუნიციპალიტეტის “მოსწავლე ახალგაზრდობის სახლის” ადმინისტრაცია ვერ ახერხებდა რეკომენდაციების გათვალისწინებას, რაც 2016 წლის საანგარიშო პერიოდის შემოწმებისას აღმოჩენილ ხარვეზებში კარგად ჩანს”, _ თქვა ირაკლი კუჭავამ.
მისივე ინფორმაციით, 2015-2016 წლის ფინანსური აუდიტი გვაძლევს საშუალებას, გამოვთქვათ მოსაზრება, რომ შპს “აგრარული ბაზრის” გამართულად ფუნქციონირებისთვის საჭირო პროცესები ვერ იმართება სრულყოფილად ორგანიზაციის ადმინისტრაციის მიერ, რაც ანგარიშში სრულად არის ასახული.
“ა(ა)იპ კომუნალური სამსახური “სხივის” შესაბამისობის აუდიტი 2016 წლის საანგარიშო პერიოდის მოიცავს და გამოვლენილია რიგი ხარვეზებისა _ ადგილი აქვს საწვავის ჩამოწერას სრულყოფილი დოკუმენტაციის გარეშე და დარღვეულია ეკონომიკური საქმიანობიდან მიღებული შემოსავლების დეკლარირების პროცედურები”, _ აღნიშნა სხდომაზე ჩოხატაურის მერმა.
ირაკლი კუჭავას თქმით, “გასული წლის შეჯამებისას შეიძლება ითქვას, რომ ეს იყო სოციალური პროგრამებისა და ინფრასტრუქტურული პროექტების დაფინანსების მხრივ გამორჩეული წელი”.
