გუშინ, კატარის მუნდიალზე მეორე ფინალისტის ვინაობა გახდა ცნობილი. ორმოცდაათი ათასი ერთგული თაყვანისმცემლის წინაშე მაროკოს ნაკრები ძალიან კი ეცადა, მაგრამ საფრანგეთის ეროვნული გუნდის კლასი უფრო მაღალი აღმოჩნდა. კილიან მბაპემ და მისმა თანაგუნდელებმა აფრიკის კონტინენტის წარმომადგენელი დამაჯერებლად დაამარცხეს – 2:0.
მსოფლიო პირველობის გადამწყვეტ შეხვედრაში ერთმანეთს საფრანფეთისა და არგენტინის ნაკრებები დაუპირისპირდებიან, მაროკო და ხორვატია კი მესამე ადგილის ბედს გადაწყვეტენ.
არგენტინის ეროვნული გუნდი კატარის მუნდიალის ფინალურ დაპირისპირებაში იასპარეზებს და ლეო მესი ოცნების ასრულებას შეეცდება. ლეოს თანამედროვე ფეხბურთში არსებული ყველა ტიტული გააჩნია, მსოფლიო ჩემპიონის წოდების გარეშე.
არგენტინა – ხორვატიის ნახევარფინალური მატჩის დასრულების შემდეგ მსოფლიო მასმედია ძირითადად ლეო მესისა და მის ოცნებაზე საუბრობდა.
ფინალური მატჩის საგზურის მოპოვების შემდეგ მესიმ შემდეგი კომენტარი გააკეთა:
„ძალიან მოხარული ვარ, რომ მსოფლიო ჩემპიონატებზე ჩემს მოგზაურობას ფინალით ვასრულებ და ჩემი ბოლო შეხვედრა ასეთი მნიშვნელობის იქნება. ამის ძალიან მადლიერი ვარ. ყველაფერი, რაც ამ მსოფლიო ჩემპიონატზე გამოვცადე, ემოციური იყო.
ამ მსოფლიო ჩემპიონატიდან მომდევნომდე ბევრი წელია, თუმცა არ მგონია, რომ კიდევ ვითამაშებ. ასე დასრულება ძალიან კარგი იქნება“.
არგენტინის ნაკრების მთავარმა მწვრთნელმა ლიონელ სკალონიმ ხორვატიასთან მოგების შემდეგ ძირითად თავისი გუნდის კაპიტანზე ისაუბრა.
„ძნელია ამ ემოციის სიტყვებით გადმოცემა. როგორც არგენტინელი, ამაზე ყოველთვის ვოცნებობდი. ემოციური მომენტია და ჩვენი გულშემატკივრის მხარდაჭერაც დაუვიწყარია. ჩვენ ისტორიას ვწერთ. ვზეიმობთ, ეს არის რაღაც ემოციური, მაგრამ კიდევ ერთი ნაბიჯია გადასადგმელი. ზეიმის დროა, თუმცა, უკვე უნდა ვიფიქროთ იმაზე, თუ რა უნდა გავაკეთოთ. ნებისმიერი არგენტინელისთვის საოცნებო ადგილას ვარ. როდესაც საუდის არაბეთთან წავაგეთ, ხალხი ჩვენს გვერდით იყო, ყველას თანადგომას ვგრძნობდით და ეს დიდებულია. ყველანი ერთი მიმართულებით მივდივართ.
მესი? ზოგჯერ შეიძლება ჩანდეს, რომ ამას მხოლოდ იმიტომ ვამბობთ, რომ არგენტინელები ვართ, მაგრამ ეჭვი არ მეპარება, რომ ის ისტორიაში საუკეთესოა. ყოველთვის, როცა თამაშობს, თანაგუნდელებისთვის მოტივაციის უდიდესი წყაროა. მისი ყოლა პრივილეგიაა, მესის შესახებ მეტი სათქმელი აღარაფერია“, – განაცხადა ლიონელ სკალონიმ.
ლეო მესიმ ხორვატიის წინააღმდეგ ბრწყინვალე მატჩი ჩაატარა, რამაც მსოფლიო ფეხბურთის ბრიტანელი ვარსკვლავებიც კი აალაპარაკა.
გარი ლინეკერი: „კიდევ არსებობს დებატები იმაზე თუ ვინ არის მსოფლიოს საუკეთესო ფეხბურთელი?“
ჯეიმი კარაგერი: „მესი საუკეთესოა ვინც კი ამ სპორტში ოდესმე ყოფილა.“
ალან შირერი: „ძალიან დიდი სიამოვნება იყო სტადიონზე ყოფნა და ამ არგენტინის მატჩის წაყვანა. მესი და ალვარესი დღეს შთამბეჭდავები იყვნენ.“
გარი ნევილი: „წარმოდგენა არ მაქვს ამ სიჩქარეს როგორ ანვითარებს. 12 წლის წინ ის ხალხს გვერდს მარტივად უვლიდა, ახლა კი ამას კარიერის ბოლო პერიოდში კვლავ მარტივად აკეთებს. ახლა შეუძლია წავიდეს და 15-20 წუთით დაიძინოს. მთელი გუნდი მის ზურგს უკან მეტად მიზანდასახულია“.
მსოფლიო ჩემპიონატის ნახევარფინალური მატჩის დასრულების შემდეგ ხორვატიის ნაკრების ლიდერი ლუკა მოდრიჩი მსაჯის მიმართ უკმაყოფილებას ვერ მალავდა.
„არ მიყვარს მსაჯებზე საუბარი, ეს ყველაზე ცუდი იყო. მის მიმართ კარგი მოგონებები არ მაკავშირებს, უბრალოდ კატასტროფაა. ჩემი აზრით პენალტი არ ყოფილა. ამის მიუეხედავად, არ მინდა არგენტინა დავაკნინო. პენალტმა საქმე ძალიან გაგვიფუჭა. მესამე ადგილისთვის უნდა ვიბრძოლოდ და ეს პოზიცია დავიკავოთ.
არგენტინა უკეთესი იყო და გამარჯვებასაც იმსახურებდა, თუმცა ასეთი რაღაცეები მსაჯების შესახებ აუცილებლად უნდა ითქვას. როგორც წესი ასე არ ვიქცევი, თუმცა დღეს ეს აუცილებელი“, – განაცხადა ლუკა მოდრიჩმა.
განცხადება გააკეთა ხორვატიის ნაკრების მთავარმა მწვრთნელმა ზლატკო დალიჩმაც:
„პირველ რიგში მინდა არგენტინას ფინალში გასვლა მივულოცო. ჩემი ფეხბურთელებისთვის არაფერი მაქვს სათქმელი, ნახევარი საათი კარგად ვითამაშეთ, მაგრამ შემდეგ ძვირად დაგვიჯდა ერთი კონტრშეტევა და პენალტი.
არაფერი მაქვს საწუწუნო, ახლა მესამე ადგილისთვის მატჩისთვის მოვემზადებით. შეტევით ფაზაში კარგად ვერ ვითამაშეთ. მუნდიალის დაწყებამდე თუ ვინმე იტყოდა, რომ ნახევარფინალში გავიდოდით, მოგვეწონებოდა, ეს დიდი მიღწევაა და ვამაყობთ“, – განაცხადა ზლატკო დალიჩმა.
არგენტინისა და ხორვატიის მატჩში დანიშნულ თერთმეტმეტრიანზე ისაუბრა ხორვატმა მსაჯმა ბრუნო მარიჩმა:
„მე არ ვარ ერთ–ერთი მათგანი, ვისაც შეთქმულების თეორიების სჯერა, მაგრამ უნდა ითქვას, რომ პეპეს სიტყვებში სიმართლის მარცვალი იყო და აზრი ჰქონდა. არგენტინას ნამდვილად აქვს პრივილეგიები. პენალტი არ იყო, ლივაკოვიჩს თამაშის წესი არ დაურღვევია, იქ მხოლოდ მეკარეზე შეიძლებოდა ყოფილიყო თამაშის წესის დარღვევა.
სამწუხაროა, რომ ორსატომ წარმოუდგენელი გადაწყვეტილება მიიღო. გადაწყვეტილება, რომელმაც შედეგზე პირდაპირი გავლენა მოახდინა. ეს უსამართლო და მიუღებელია“.
ახლო წარსულში ცნობილ ბრაზილიელ ფეხბურთელ რონალდოს არ სურს, რომ არგენტინა მსოფლიოს ჩემპიონი გახდეს…
„მთელი ბრაზილიის სახელით პასუხის გაცემა არ შემიძლია, მხოლოდ ჩემი სახელით ვიტყვი, რომ რასაკვირველია, გამიხარდება თუ მესი მსოფლიოს ჩემპიონატს მოიგებს. თუმცა, თქვენ იცით ბრაზილიასა და არგენტინას შორის დიდი მეტოქეობა არსებობს, ამიტომ, თვალთმაქცი ვიქნები, თუ ვიტყვი, რომ არგენტინის ჩემპიონობით ბედნიერი ვიქნები. ეს რა თქმა უნდა, სიმართლეს არ შეესაბამება. არგენტინა არ თამაშობს დიდებულ ფეხბურთს, მაგრამ წარმოუდგენელი სურვილი ჩანს, ყველა ბევრს დარბის, ყველა აგრესიულია და ჰყავთ მესი, რომელიც საჯარიმოს როცა უახლოვდება, ძალიან გადამწყვეტია“, – განაცხადა რონალდომ.
გუშინ, ბრაზილიის ნაკრების წინააღმდეგ სასამართლოში სარჩელი შევიდა და ამის მიზეზი მისი წარმომადგენლის მიერ ცხოველზე არაჰუმანური მოპყრობაა.
შემთხვევა კატარის მუნდიალის მიმდინარეობისას მოხდა, როდესაც ჟურნალისტების წინაშე ვინისიუს ჟუნიორი გამოდიოდა. მაგიდაზე კატა ახტა, რომელსაც ბრაზილიის ნაკრების პრესსამსახურის თანამშრომელმა ხელი უხეშად ჩაავლო და ძირს ჩააგდო.
ამის გამო ცხოველთა უფლებების დამცველმა რამდენიმე არასამთავრობო ორგანიზაციამ ბრაზილიის ფეხბურთის კონფედერაციის წინააღმდეგ სარჩელი შეიტანა და 200 ათასი დოლარი მოითხოვა. ბრაზილიის ნაკრებისგან ასევე მოითხოვენ სახალხოდ ბოდიშის მოხდას და ფედერაციის ყველა თანამშრომლისთვის გაკვეთილის ჩატარებას ცხოველებთან ჰუმანურად მოპყრობის თემაზე.
ავტორი
